1 Ï ticwa kanya acël k’Obanga, wan ëkwaöwu nï kür ïwëk unu kïca mërë öbal nono. 2 Pïën ën okobo nï,

"Yam awinyi ï karë më tïmö dhanö na bër,

ëka ï karë më larë abino akonyi."✝6:2 Icaya 49:8

Winy unu, tin ënë caa më tïmö dhanö na bër. Tin ënë nïnö më larë.

3 Wan ba eketho orii ï yoo ka ngat mörö, ëk kür enwong bal mörö ï ticwa. 4 Ëntö na calö etic k’Obanga, wan enyutho bërwa kënwa ï kite na papath: kï dangö pëkö na tëk, ï ayela na pol, ï can, ëka kï kwö na tëk n’ödïöwa, 5 epwodowa, etweowa ï buc, ëcüpö lwak ï komwa, etio tic na tëk, ebedo abonge nïnö ëka cem oremowa. 6 Wan enyutho nï wan etic k’Obanga pï kitewa na leng, pï ngec na wan etye ködë, pï dïïnö cwinywa ëka kïcawa, pï Tipo Naleng, ëka pï mar na wan etye ködë na twodo ope ïë, 7 ï twakwa n’atïr, ëka pï tëkö k’Obanga, wan ëmakö jami lwëny më kite atïr ï cïngwa kucem ëka kucam. 8 Gïn öwöröwa, ëka ba öwöröwa gïnï thon, ëyanyöwa ëka ëpaköwa. Eterowa na calö etwodo, nakun wan ëtwakö köp adyer, 9 eterowa na calö jö na ba engeo, ëntö engeowa na bër, na calö jö n’öthöö ëntö ëkwö, na calö jö n’epwodogï ëntö ba enekowa, 10 na calö jö na kumo ëntö cwinywa nwongo pod tye na yom, na calö ëcan ëntö ëmïö jö na pol ödökö ëlönyö, na calö jö n’ope kï gin mörö ëntö etye kï jami kïbëc.

11 Un jö Korinti, wan dong ëtwak kodwu kanyalër, ëka ëyabö cwinywa na lac bothwu. 12 Wan ba eumo cwinywa kï bothwu, ëntö un ënë iumo unu cwinywu kï bothwa. 13 An atwak kodwu na calö un ëthïnöna, yab unu thon cwinywu na lac.

14 Kür ïrïbërë unu kï jö na ba oyee. Kite atïr twërö rïbërë kanya acël kï kite na ba tye atïr nïngö? Onyo tar twërö rïbërë kï cöl pïny kanya acël nïngö? 15 Thama ka Kiricito twërö rwatërë kï më ka Belial nïngö? Onyo ngö na dhanö n’oye Kiricito twërö nywakö kï dhanö na ba oye Kiricito? 16 Öt k’Obanga twërö rïbërë kï cal jwogi nïngö? Pïën wan ënë ebedo öt k’Obanga na kwö, na calö Obanga okobo nï, "An abino bedo ködgï, ëka abino woth ï kin-gï, abino bedo Obangagï, ëka gïn thon bino bedo jöga."

17 "Pï manön dong yaa unu ökö kï bothgï,

ëka ipokere unu, man köp na Rwoth okobo.

Kür igud unu gin na ba leng,

ëka abino gamöwu."✝6:17 Icaya 52:11

18 "An abino bedo apapwu,

ëka un ibino bedo awopena ëka anyirana,

man köp na Rwoth Won Twër Kïbëc okobo."✝6:18 2 Camuel 7:14; 2 Camuel 7:8