1 Timoteo, athïn-na, cung na tëk ï kïca n’ëmïö both onu ï Kiricito Yecu. 2 Gin na in iwinyo kï botha ï nyim ecaden na pol, in thon ikob both jö na genere na römö pwonyo kï jö nökënë. 3 Dang gin na rac n’ëtïmö ï komi kanya acël ködwa, calö acikari na bër ka Kiricito Yecu. 4 Acikari mörö ope na tye ï dhö tic na mïö tic kï yökö bodo wie, pïën thama mërë tye nï myero eyom cwiny adit n’öcöö ën ï acikari. 5 Röm aröma, ka ngat na tye ka pyem ï ngwëc, ba twërö löönö ngwëc ka ba ölübö cïk më ngwëc. 6 Apur n’otio tic na tëk ënë myero öcak camö gin n’öcëk kï ï pwodho mërë. 7 Tham pï gin na an atye ka kobo. Rwoth bino mïöni kite më nïang ï kom jami ni kïbëc.

8 Po ï kom Yecu Kiricito, akwar Daudi n’Obanga ocero kï kin jö n’öthöö. Man ënë köpna më Emuth na Bër, 9 na an atye ka lïmö can pïrë, nakun etwea kï nyör calö abal. Ëntö köp k’Obanga ba etweo. 10 Pï manön ënë gin n’ömïö atye ka lïmö can kïbëc pï jö n’ëyërögï, ëk gïn thon onwong larë na tye ï Kiricito Yecu, kanya acël kï dheo na ba thum.

11 Man ënë köp më adyer:

Ka onu ëthöö ködë,

onu thon ebino kwö kanya acël ködë;

12 ka onu ëdangö can,

onu thon ebino löc kanya acël ködë.

Ka onu ëkwërö ën,

ën thon bino kwërö onu,

13 ka onu ba egenere,

ën gire genere naka naka,

pïën ën ba twërö kwërë kënë.

14 Bed ka po wi jö k’Obanga ï kom köp ni, ëka ïcïkgï dökï ï nyim Obanga ëk öwëk gïnï pyem ï kom köp mökö; pïën manön ba bino könyö ngat mörö, ëntö balö jö kïbëc na winyo. 15 Tïm kï tëk më miri keni both Obanga na calö atic n’ëpwöyö, atic na lewic myero kür ömakï ëka makö köp më adyer ï yoo n’atïr. 16 Kwër boko köp mökö na ba obedo më wörö Obanga, pïën jö na dönyö ïë bino rwenyo arwenya ï kite më wörö Obanga. 17 Pwonygï bino këth calö bür na camö kom dhanö. Kumenayo gïn kï Pileto tye gïnï ï kin jö nön, 18 n’ölökërë gïnï ökö kï kom köp më adyer. Gïn kobo nï cer ötïmërë dong ökö, ëka tye ka balö gïnï yee ka jö mökö. 19 Ëntö acaki thërë n’Obanga oketho tye n’ocung na tëk, na tye kï cöc ï kome nï: "Rwoth ngeo jö n’obedo mëgë,"✝ ëka nï, "Dhanö acëlacël na cwodo nyïng Rwoth myero ölökërë ökö kï ï kom bal."

20 Ï öt na thwönë, ba bedo ïë jami më gol kï ryal këkën, ëntö bedo ïë thon jami mökö n’ëyübögï kï bao ëka lobo; mökö ëyübö pï tic na pïrë tëk ëka nökënë pï tic na pïrë ba tëk. 21 Ka dhanö mörö ölönyërë nakun öwëkö kite mërë na reco ökö, ën bino bedo gin më tic n’etio ködë ï karë më dheo, kwö mërë bino bedo na leng, ëka bino bedo dhanö na pïrë tëk both Adwong nakun yübërë më tio tic mörö këkën na bër.

22 Pï manön, kwër miti më awobi ökö, ëntö iketh cwinyi ï kite n’atïr, yee, mar kï kuc, kanya acël kï jö kïbëc na tye ka cwodo gïnï Rwoth kï ï cwinygï na leng. 23 Kwër pyem më mingo ökö na bino pï kwia pïny, pïën in ingeo koth pyem na calö manön kelo dhaa. 24 Atic ka Rwoth myero obed ngat na ba dhaa atata, ëntö myero obed ngat n’obedo akïca both jö kïbëc, obed apwony na ryëk na ngeo pwony, ngat na dïö cwinye. 25 Obed ngat na twërö tïrö jö na pyem ködë kï mwolo, ëk karë nökënë Obanga twërö mïö jö nön cwiny më ngut ëk önïang gïnï na bër ï kom köp adyer, 26 cë mïö ryëkögï dwogo ëka bino gïnï bwöth kï kom pawaka ka Catan n’onwongo mïögï tio gin na ën mïtö.