1 Utmegowa, na lübërë kï köp ï kom dwogo ka Rwoth onu Yecu Kiricito ëka cökërë onu më rwatërë ködë, wan ëkwaöwu nï 2 kür ïwëk thamawu orubere ökö pïöpïö, cwinywu thon kür opodhi kadï pï köp k’adwarpïny onyo köp n’ëtïtö onyo waraga mörö n’ekobo nï öya kï bothwa na kobo nï nïnö ka Rwoth dong othuno. 3 Ngat mörö kür öbwölwu ï yore mörö këkën, pïën nïnö ka Rwoth bara bino naka ka jëm ï kom Obanga obedo na tye ëka atür cïk thon onen, ngat na myero ebol ï mac më kapïny. 4 Ën bino pyem ëka bino tingere malö ën kënë na löö gin na kïbëc n’ecwodo nï Obanga onyo gin mörö më awöra, ëk ebed ï öt k’Obanga nakun nyuthere kënë nï ën ebedo Obanga.

5 Ba ipo unu nï an akobo niwu köp ni ï karë na an atye bothwu? 6 Un dong ingeo ngö na tye ka jükö, ëk Ngat na Rac onen ka karë mërë n’opore örömö. 7 Pïën müng më tëkö k’atür cïk dong tye ka tic; ëntö ngat na tye ka jükö pod mëdërë më jükö naka ka ëryëmö ën ökö. 8 Cë atür cïk bino nen ëka Rwoth Yecu bino neko ën ökö kï yamö më dhögë cë tyeko ökö ï karë na ën bino dwogo. 9 Bino k’atür cïk bino yaa kï ï tic ka Catan nakun tio kï koth twodo kïbëc më tango, anyuth ëka gin më aura gïnï, 10 ën bino tic kï bwöl na reco kïbëc ï kom jö na bino rwenyo. Gïn bino rwenyo pïën ökwërö gïnï marö köp adyer na larögï. 11 Pï manön, Obanga bino kethogï ï thë twër më bwöl ëk gïn oyee köp më twodo 12 ëk köp ölöö jö kïbëc na yee köp më twodo ëntö cwinygï yom ï tïmö gin na ba tye atïr.

13 Utmegowa na Rwoth marö, myero wan ëmïï pwöc both Obanga pïrwu ï karë kïbëc pïën Obanga öyëröwu ï acaki laröwu pï Tipo Naleng na lönyöwu më bedo na leng ëka pï yee köp më adyer. 14 Ën ocwodowu ï larë ni k’Emuth na Bër na wan ëtïtö niwu; ëk ömïï ïnywak unu dheo ka Rwoth onu Yecu Kiricito. 15 Pï manön utmegona, cung unu na tëk ëka ïmak unu pwony na wan epwonyowu ködë kadï kï köp më dhök onyo kï waraga.

16 Kobedini ëk Rwoth onu Yecu Kiricito kikome ëka Obanga Apap onu na marö onu kï kïca mërë okwe cwiny onu kï gen na bedo naka naka, 17 öcük cwinywu ëka öjïngwu ï gin na kïbëc na bër ï tic ëka ï köp.