1 Ï karë n’opoth un onwongo ibedo calö jö n’öthöö pï türö cïk ëka balwu. 2 Ï karë ca onwongo un ïlübö yodhi na reco më lobo ni, nakun iwinyo unu köp ka ngat na rac na löö twër mökö na tye malö ï yamö, na ënë cwiny na kobedini tye ka tic ï cwiny jö na ba mïtö winyo köp k’Obanga. 3 Onu kïbëc onwongo ëröm kï jö nön ï lübö miti më kwö më anywölï, nakun ecobo miti më kom onu kï gin na onu ëthamö. Ï kite na yam onu etye ködë, akëmö k’Obanga onwongo myero opodh ï kom onu calö jö nökënë kïbëc. 4 Ëntö Obanga obedo alönyö ï kïca mërë, mar na ën ömarö kï onu ködë dit rwök, 5 kadï bed nï onu ëdökö jö n’öthöö ökö pï türö cïk mërë, ën ömïö onu kwö kanya acël kï Kiricito—obedo pï kïca k’Obanga ënë ömïö ïlarë unu. 6 Obanga ocero onu kï ï thöö kï Kiricito, ëka ömïö onu kabedo më bedo kanya acël kï Kiricito Yecu ï polo. 7 Obanga ötïmö jami ni kïbëc ëk enyuth ï karë kïbëc na tye anyim lönyö mërë na thwönë na ba pimere më kïca n’onen ï mar mërë both onu na Kiricito Yecu tïmö nï onu. 8 Pïën pï kïca mërë ömïö Obanga ölaröwu pï yeewu—ëka man ba ötïmërë pï tic mörö na un ïtïmö, manön obedo mïc k’Obanga— 9 pathï pï tic na dhanö tïmö, ëk kür ömïï ngat mörö öwakërë. 10 Onu ebedo gin n’Obanga otio, ën ocweo onu ï Kiricito Yecu ëk ebed jö na tio tic na bëcö na ën yam öyübö cön nï ëk onu ëtïm.

11 Pï manön, po nï un cön onwongo ibedo unu Erok ï kite n’ënywölöwu ködë ëka Eyuda cwodowu nï "jö na ba ëlïrö," nakun gïn cwodere kën-gï nï "jö n’ëlïrö" (na cïng dhanö ënë ötïmö ï komgï)— 12 po unu nï ï karë nön un onwongo ipokere ökö kï both Kiricito. Un onwongo ëkööwu ökö kï ï kom jö Icarael, ba ïnywakö unu cïkërë k’Obanga ëka kï gin na kïbëc na ën öcïkö nï ebino tïmö pï jögë. Ibedo unu ï lobo ni abonge gen ëka na ba ingeo unu Obanga. 13 Ëntö kobedini ï Kiricito Yecu un n’onwongo itye unu na bor k’Obanga, ekelowu dong ökö na cwök pï remo ka Kiricito. 14 Ën kikome okelo kuc ï kin jö arïö, ömïöwa kodwu dong etye acël, ëka ën ötürö cël më gero n’opoko onu. 15 Pï kelo kuc, ën öjwaö cïk ka Muca ökö kï cïk mërë kïbëc. Ën ötïmö man ëk eketh jö arïö obed rok acël na nyen n’örïbërë kanya acël ï ën. 16 Pï thöö mërë ï kor yath arïa, Kiricito odwongo jö arïö both Obanga ï kom acël, ömïö adagë ojik ökö. 17 Kiricito obino ötïtö köp më kuc bothwu un jö n’onwongo itye unu na bor kï both Obanga ëka both jö n’onwongo tye na cwök. 18 Pï Kiricito onu kïbëc etyeko yabö nï onu yoo më thuno both Apap kï Tipo Naleng acël. 19 Kobedini dong un ba ibedo erok onyo wele, ëntö un ibedo jö më pacö acël kï jö k’Obanga na leng ëka ibedo unu jö më ödë. 20 Un dong ïcal kï gedo n’ëgërö, n’acaki thërë obedo ëkwëna ëka edwarpïny, kï Kiricito Yecu kikome na calö kidi më gwïc. 21 Gedo ni kïbëc okubere kanya acël ï Kiricito ëka tye ka döngö më bedo öt k’Obanga na leng pï Rwoth. 22 Kiricito thon tye ka gëröwu kanya acël ï kome, ëk ibed unu kanya Tipo k’Obanga bedo ïë.