1 Gin na an atye ka kobo ënë nï alee jami ka pod obedo athïn, bedo na röm aröma k’opii, kadï bed ën obedo won jami kïbëc. 2 Ën bedo ï thë löc ka jö na gwökö ën ëka edite na gwökö jami naka ka karë n’apap mërë öcïkö örömö. 3 Man ënë kite n’obedo ködë ï kom onu, ï karë na onu pod ebedo calö ëthïnö, onu onwongo etye calö opii na tye ï thë twër më lobo ni. 4 Ëntö ka karë n’ëcïkö kikome örömö, Obanga obino ooro Wode na dhakö önywölö ëka ökwö ï thë cïk, 5 më kökö jö n’onwongo tye ï thë cïk, ëk ëlök onu ëdök ëthïnö k’Obanga kï twër n’örömö. 6 Kobedini kite na un dong ibedo ëthïnö k’Obanga, ënë ömïö Obanga ooro Tipo ka Wode ï cwinywu na kok nï, "Aba, Apap." 7 Pï manön un ba dökï ibedo unu opii. Un ibedo ëthïnö k’Obanga, ëka ebino mïöwu gin na ën öcïkö.

8 Ï karë na un bara ingeo Obanga, onwongo ibedo unu opii ka gin mökö na ba obedo gïnï obanga kikome. 9 Ëntö kobedini dong un ingeo Obanga—onyo nï Obanga dong ngeowu—pïngö un dökï ïmïtö dök cen ï opii më bedo ï thë twër më lobo ni na görü ëka na pïny ölöögï? Ïmïtö unu dök më bedo opiigï dökï? 10 Un iketho cwinywu më kwero nïnö mökö, dwe, karë na papath, ëka mwaka. 11 An atye kï lworo rwök nï ticna kïbëc na an atio pïrwu onwongo obedo më nono.

12 Utmegona, an akwaöwu nï ibed unu calö an, pïën an dong adökö calö un. Un ba ïtïmö gin mörö na rac ï koma. 13 Kite na un ingeo nï onwongo obedo pï lïth koma, ënë ömïö an acakö tïtö niwu köp më Emuth na Bër. 14 Un ba ibino ïcaa onyo ïkwëra unu kadï bed lïth koma onwongo obedo atëmatëma bothwu, ëntö ïjöla unu na bër na calö an onwongo abedo malaika k’Obanga, onyo na calö an onwongo abedo Kiricito Yecu kikome. 15 Ngö n’öbalö yom cwinywu kïbëc n’onwongo itye unu ködë? An arömö mïö caden nï, ka onwongo twërë, onwongo myero igol wangwu ökö ëka ïmïï unu botha. 16 An dong adökö langöwu pïën an akobo niwu köp adyer?

17 Jö nökënë ca tëmö gïnï kï tëk më lököwu, ëntö thamagï rac. Gin na gïn mïtö ënë nï ïlökërë unu ökö kï botha ëk ïcak unu winyogï. 18 Ka ngat mörö tye kï miti më tïmö gin na bër bothwu, manön kïbëc bër, ëntö myero ötïm gïnï ï karë kïbëc, pathï ka an atye kodwu këkën. 19 Ëthïnöna më amara, pod dökï atye ka dangö arem kodwu calö dhakö na dangö arem ï karë më nywöl naka ka Kiricito obedo na tye rwök ï kwöwu. 20 An onwongo amïtö nï kono abin abed bothwu kobedini ëk anïang ï kom gin na myero atwak bothwu, pïën thama ï komwu dong ocungo wia ökö!

21 Un jö na mïtö nï cïk ölööwu, un ba ingeo ngö na cïk kobo? 22 Pïën ëcöö nï Abraam onwongo tye k’awope arïö, acël obedo wod ka dhakö n’onwongo obedo opii, ëka acël wod ka dhakö na ba obedo opii. 23 Wod ka dhakö n’onwongo obedo opii ënywölö ï kite më kom; ëntö wod ka dhakö na ba obedo opii ënywölö na calö adwogi më cïkërë n’Obanga öcïkö.

24 Man ërömö nïang ïë na calö carolok, mon arïö ni nyutho cïkërë arïö. Cïkërë acël öya kï ï wi kidi Cinai, önywölö ëthïnö na bino bedo gïnï opii: Dhakö ni ënë Aga. 25 Kobedini Aga cung pï kidi Cinai na tye ï Arabia na röm aröma kï Jerucalem më karë ni pïën tye ï opii kanya acël k’ëthïnö mërë. 26 Ëntö dhakö nökënë ca cung pï Jerucalem na tye ï polo; ën löörë kënë ëka ënë obedo aya onu. 27 Pïën ëcöö nï:

"Bed kï yom cwiny, in dhakö nï bedo alür,

na ba önywölö ëthïnö mörö;

red kï yom cwiny rwök,

in n’arem më nywöl ba ogoi;

pïën ëthïnö ka dhakö na cwörë öwëkö pol

na löö ëthïnö ka dhakö na tye kï cwörë."

28 Utmegona, un ibedo ëthïnö më cïkërë k’Obanga, na calö Icaka. 29 Ï karë nön, athïn n’ënywölö ï kite më kom obedo yelo athïn n’ënywölö pï tëkö ka Tipo k’Obanga, ëka röm aröma thon kobedini. 30 Ëntö ngö na Cöc na Leng kobo? "Ryëm dhakö n’obedo opii ökö kï wode, pïën wode ba bino leeno jami kanya acël kï wod ka dhakö na ba obedo opii."✝ 31 Pï manön, utmegona, onu ba ebedo ëthïnö ka dhakö n’obedo opii, ëntö ëthïnö ka dhakö na ba obedo opii.