1 Na bara nïnö më kwero karama më Poth othuno, Yecu onwongo ongeo nï caa mërë örömö dong më wëkö lobo ni më cïdhö both Apap. Ën onwongo ömarö ëlübkörë na tye ï lobo, ëka onyutho nïgï mar mërë naka ï ajiki.

2 Ï karë na gïn tye ï dhö cem më kothyeno, Catan onwongo oketho thama ï cwiny Yuda, wod ka Cimon Ikariot, më ketho örörö ï kom Yecu. 3 Yecu onwongo ongeo nï Apap otyeko mïö jami kïbëc ï thë twër mërë, ëka nï ën ëya kï both Obanga ëka onwongo etye ka dök yo both Obanga. 4 Ën öya malö kï ï dhö cem, ögönyö böngü mërë më yökö, ëka otweo taulo ï wang pyërë. 5 Kinge, ën öönyö pii ï bëcën. Cë öcakö lwökö tyën ëlübkörë, ëka odunyo kï taulo na ën onwongo otweo ï wang pyërë.

6 Ï karë na Yecu othuno both Cimon Petero, Petero okobo nïnë nï, "Rwoth, in ibino lwökö tyëna?"

7 Yecu ögamö nï, "In ba itye ka nïang ï gin na an atye ka tïmö kobedini, ëntö in ibino nïang kinge."

8 Petero okobo nïnë nï, "Pe, in ba ibino lwökö tyëna na twal!"

Yecu ögamö nïnë nï, "Ka an ba alwoki, ba ibino bedo alübköra."

9 Cë Cimon Petero ögamö nï, "Rwoth pathï tyëna këkën, ëntö cïnga ëka wia thon!"

10 Yecu ögamö nï, "Dhanö na dong otyeko lwök ökö, ba dökï lwökö kome ëntö tyënë këkën; pïën nwongo kome kïbëc dong leng. Un dong ileng, ëntö pathï un kïbëc." 11 Yecu onwongo ngeo ngat na bino ketho örörö ï kome, ënë ömïö ën okobo nï, "Pathï un kïbëc ënë ileng unu."

12 Ï karë na dong otyeko lwökö tyën-gï, ën oruko böng mërë ëka ödök obedo ï kabedo mërë cë openyogï nï, "Ïnïang unu ï ngö na an atïmö ï komwu? 13 Un icwoda unu nï ‘Apwony’ ëka ‘Rwoth,’ manön tye atïr pïën manön ënë nga na an abedo. 14 Dong ka an, abedo Rwothwu ëka Apwonywu, alwökö tyënwu, un thon myero ïlwök unu tyën ngat acëlacël. 15 An anyutho niwu apor më alüba ëk un thon ïtïm unu kite na an thon atïmö ködë ï komwu. 16 Adyer an akobo niwu nï opii mörö ope na dit na löö adwong mërë, onyo aor mörö ope na dit na löö ngat n’ooro ën. 17 Kobedini na dong ingeo unu köp ni gïnï, ibino unu bedo kï gum ka iketho unu ï tic.

18 "An ba atye ka kobo köp ni ï komwu kïbëc; an angeo jö na an dong ayërö. Ëntö ëk Cöc na Leng ocobere kakarë nï: ‘Ngat n’ocemo köda ölökërë ï koma.’✝

19 "An akobo niwu kobedini na bara ötïmërë, ëk ka bino tïmërë, iyee unu nï ‘An ënë An.’ 20 Adyer an akobo niwu nï ngat na jölö dhanö na an aoro, nwongo öjöla thon; ëka ngat na jöla, nwongo öjölö ngat n’oora."

21 Kinge na Yecu okobo köp ni, cwinye ocwer rwök cë okobo both ëlübkörë kanyalër nï, "Adyer, an akobo niwu nï ngat acël kï ï kinwu bino ketho örörö ï koma!"

22 Ëlübkörë öcakö rïpërë gïnï kën-gï, pïën gïn ba önïang nga na ën tye ka twak ï kome. 23 Ngat acël kï ï kin ëlübkörë na Yecu onwongo marö rwök onwongo obedo na cwök ködë ï dhö cem. 24 Cimon Petero ögwëlö ën ëk openy Yecu nï nga na ën tye ka twak ï kome.

25 Cë alübkör Yecu n’obedo na cwök ködë, openyo ën nï, "Rwoth, nga ënön?"

26 Yecu ögamö nï, "Obedo ngat na an abino mïö ogati ni ka an alutho ï bakuli." Cë Yecu olutho ogati ï bakuli ëka ömïö both Yuda, wod ka Cimon Ikariot. 27 Cücüth na Yuda ögamö ogati, Catan ödönyö ï cwinye.

Cë Yecu okobo nïnë nï, "Gin na in ïmïtö tïmö, tïm ökö pïöpïö." 28 Ï kin jö n’onwongo obedo ï dhö cem, ngat mörö ope n’önïang pïngö Yecu okobo nïnë kömanön. 29 Kite na Yuda ënë onwongo gwökö cïlïng, jö mökö öthamö nï Yecu onwongo tye ka kobo nïnë më wïlö gin mörö na mïtërë pï karama, onyo më mïö gin mörö both ëcan. 30 Cücüth na Yuda ögamö ogati, ën ödönyö yökö pïöpïö. Pïny onwongo dong cöl.

31 Ï karë na Yuda öcïdhö ökö, Yecu okobo nï, "Kobedini dong eketho dheo ï kom Wod ka Dhanö ëka pïrë ebino ketho dheo ï kom Obanga. 32 Ka eketho dheo ï kom Obanga pïrë, Obanga thon bino ketho dheo ï kom Wod pïrë kënë, ëka bino ketho dheo ï kome pïöpïö.

33 "Ëthïnöna, an abino bedo kodwu pï karë na nönök. Un ibino rangöna, ëka kite na an akobo ködë both ëtëla k’Eyuda, an thon akobo niwu kobedini: Kanya an acïdhö yo ïë, un ba ïtwërö bino ïë.

34 "Kobedini an amïöwu cïk na nyen: Marë unu kenwu. Kite na an amaröwu ködë, un myero ïmarë unu kenwu. 35 Manön bino mïö jö kïbëc ngeo nï un ibedo ëlübköra, ka ïmarë unu kenwu."

36 Cimon Petero openyo Yecu nï, "Rwoth, in itye ka cïdhö yo kwene?"

Yecu ögamö nï, "Kanya an acïdhö yo ïë, in ba ïrömö lübö köra kobedini, ëntö ibino lübö köra kinge."

37 Petero openyo ën nï, "Rwoth, ngö na jüka më lübö kori kobedini? An abino jalö kwöna piri."

38 Cë Yecu ögamö nï, "In adyer ibino jalö kwöni pïra? Adyer, an akobo nini nï, na thwön gwënö bara okok, in ibino kwëröna wang adek!