1 Kodiko cön ï nïnö më acël më cabït na pïny onwongo pod cöl, Maria më Magadala öcïdhö ï bur lyël cë önënö nï ëkwanyö kidi ökö kï ï dhö lyël. 2 Ën obino na tye ka ngwëc both Cimon Petero ëka alübkör Yecu nökënë na Yecu onwongo marö, cë okobo nï, "Ökwanyö gïnï kom Rwoth ökö kï ï bur lyël. Wan ba engeo kanya gïn oketho ën ïë!"

3 Cë Petero ëka alübkör Yecu nökënë nön, öcakö gïnï cïdhö yo bur lyël. 4 Gïn kïbëc onwongo tye ka ngwëc kanya acël, ëntö alübkör Yecu nökënë nön oyomo Petero ökö ëka öcakö thuno ï bur lyël. 5 Ën ogungo, ëka önënö ï bur lyël, cë önënö böngü na leng na gïn oboo ën ködë odong kany nön, ëntö ba ödönyö ï ïë. 6 Cë Cimon Petero n’onwongo odong cen ï nge, othuno ëka ödönyö ï bur lyël. Ën önënö böng na leng n’onwongo eboo ën ködë odong kany nön, 7 nakun atam n’onwongo eumo kï wii Yecu onwongo ëdölö ökö ëka ba tye kanya acël kï böng na leng nökënë. 8 Cë alübkör Yecu nökënë nön n’öcakö thuno ï bur lyël, ödönyö thon ï ïë. Ën önënö ëka oye. 9 (Gïn thon onwongo bara önïang gïnï kï ï kom Cöc na Leng nï Yecu myero ocer kï ï kin jö n’öthöö.)

10 Cë ëlübkör Yecu ödök gïnï cen yo pecigï, 11 ëntö Maria ocung yökö kï ï bur lyël nakun kok. Na ën tye ka koko, ën ogungo pïny më nënö ï bur lyël, 12 ëka önënö emalaika arïö n’oruko gïnï böng na tar. Gïn onwongo obedo kanya onwongo epyelo kom Yecu ïë, acël ï kuwie, ëka acël ï kutyënë.

13 Gïn openyo ën nï, "Dhakö, pïngö in itye ka koko?"

Cë ën okobo nï, "Gïn ökwanyö kom Rwothna ökö, ëka an ba angeo kanya gïn oketho ën ïë." 14 Kinge na ën dong ötwakö köp ni, cë ölökërë ëka önënö Yecu ocung ï nyime, ëntö ën ba ongeo nï Yecu onwongo ënön.

15 Yecu openyo ën nï, "Dhakö, pïngö in itye ka koko? Nga na in itye ka rangö?"

Ën öthamö nï gwök onyo ën obedo apur, ën öcakö kobo nï, "Adwong, ka in ënë itero ën ökö, kob nïna kanya in iketho kome ïë, ëk acïdh akwany."

16 Cë Yecu okobo nïnë nï, "Maria."

Ën ölökërë yo bothe ëka okok kï lëb Iburu nï, "Rabbi!" (na gönyö nï Apwony.)

17 Yecu okobo nï, "Kür ïmaka, pïën an bara adök yo both Apap. Ëntö apë both ëlübköra, ëka ikob bothgï nï, ‘An atye ka dök yo both Apapna ëka Apapwu, both Obangana ëka Obangawu.’"

18 Maria më Magadala öcïdhö both ëlübkör Yecu k’emuth ëka okobo bothgï nï: "An anënö Rwoth!" Ëka ën okobo nïgï nï Yecu okobo nïnë jami ni kïbëc.

19 Ï kothyeno nön më nïnö më acël më cabït, n’ëlübkör Yecu onwongo tye gïnï kanya acël, na dholokek kïbëc eloro ökö pï lworo ëtëla k’Eyuda. Athura, Yecu onen ëka ocung ï dyeregï cë okobo nï, "Kuc obed kodwu!" 20 Kinge na ën okobo köp ni, cë onyutho nïgï wang ret kï ï cïngë ëka kï ï lak ngete. Ëlübkör Yecu obedo gïnï kï yom cwiny rwök ï caa na gïn önënö Rwoth.

21 Yecu dökï okobo nïgï nï, "Kuc obed kodwu! Kite n’Apap oora, an thon aorowu." 22 Ï karë na ën okobo köp ni, cë oyweo ï komgï ëka okobo nï, "Gam unu Tipo Naleng. 23 Ka ïtïmö unu kïca ï bal ka jïï, nwongo ëtïmö nïgï kïca; ëka ka ba ïtïmö unu kïca ï balgï, nwongo ba ëtïmö kïca nïgï."

24 Ngat acël kï kin ëlübkör Yecu apar wie arïö, Tomaci (n’ecwodo nï Rudi), onwongo ope bothgï ï karë na Yecu onen athura. 25 Ëlübkör Yecu nökënë obino okobo nïnë nï, "Wan ënënö Rwoth!"

Ëntö Tomaci okobo nïgï nï, "Thwara ka an anënö poo më ëcümarï kï ï cïngë, ëka aketho nya cïnga ï wang poo më ëcümarï, ëka aketho cïnga ï lak ngete, an ba abino yee."

26 Kinge na nïnö aboro opoth, ëlübkörë onwongo obedo gïnï ï öt dökï, ëka Tomaci thon onwongo tye kanya acël ködgï. Kadï bed onwongo eloro dholokek ökö, athura, Yecu onen ëka ocung ï dyeregï cë okobo nï, "Kuc obed kodwu!" 27 Cë okobo both Tomaci nï, "Keth nya cingi kany; nën cïnga gïnï. Ryë cingi ëka iketh ï ret më lak ngeta. Wëk bedo k’akalakala ëka iyee."

28 Tomaci okobo both Yecu nï, "In ibedo Rwothna ëka Obangana!"

29 Cë Yecu okobo nïnë nï, "Pïën in ïnëna, ënë ömïö in iye; tye gïnï kï gum jö na ba önëna ëka pod oyee gïnï."

30 Yecu otio anyuth më tango na pol ï nyim ëlübkörë, na ba ëcöögï ï buk ni. 31 Ëntö man ëcöögï ëk iyee unu nï Yecu ënë Meciya, Wod k’Obanga, ëka pï yeewu ï kome, ibino unu nwongo kwö ï nyïngë.