1 Kinge nïnö na nönök, Yecu dökï onen both ëlübkörë ï dhö nam më Tiberia.* Ën onen bothgï nï köman: 2 Cimon Petero, Tomaci (n’ecwodo ni Rudi), Nathanael më Kana më Galilaya, ëthïnö ka Jebedayo, ëka ëlübkör Yecu arïö nökënë onwongo tye gïnï kanya acël. 3 Cimon Petero okobo nïgï nï, "An acïdhö ka makö rëc." Gïn ögamö nï, "Wan ebino cïdhö kodi." Cë öcïdhö gïnï ëka ödönyö gïnï ï yeya, ëntö ï kiwor nön gïn ba ömakö gin mörö.

4 Kodiko cön na pïny dong oruu, Yecu onwongo ocung ï lak kulo, ëntö ëlübkörë ba ongeo gïnï nï Yecu onwongo ënön. 5 Ën openyogï nï, "Ëthïnö, ïmakö unu rëc mörö?"

Gïn ögamö nï, "Wan ba ëmakö."

6 Yecu okobo nïgï nï, "Bol unu bööwu ï cïngwu kucem më yeya, cë ibino unu nwongo gin mörö." Ï karë na gïn ötïmö, ywaö böö ölöögï ökö pïën rëc onwongo pol rwök.

7 Cë alübkör Yecu na ën onwongo marö okobo both Petero nï, "Manön Rwoth!" Cücüth na Cimon Petero owinyo ka ën kobo nï, "Manön Rwoth," öcakö ruko böng mërë, (pïën onwongo ögönyögï ökö) ëka opye ï pii. 8 Ëlübkörë nökënë obino gïnï ï yeya nakun ywaö gïnï böö n’opong kï rëc, pïën gïn onwongo ba bor kï lak kulo, na mïtö römö mita pyer abungwën. 9 Ï karë na gïn dong othuno ï lak nam, önënö gïnï mac makaa kunön na lyël, n’eketho rëc ï wie, ëka ogati.

10 Yecu okobo nïgï nï, "Kel unu rëc mörö na un pod ïmakö unu amaka."

11 Cë Cimon Petero öcakö dök cen ëka öïdhö ï yeya, öywaö böö, okelo ï lak kulo. Rëc onwongo opong ïë na pol, 153, ëntö kadï bed onwongo rëc pol rwök, böö ba öyëc. 12 Yecu okobo nïgï nï, "Bin unu ï cem." Ëntö ba tye ngat mörö kï kin ëlübkörë n’ödïö cwinye më penyo ën nï, "In ënë nga?" Pïën gïn ongeo nï manön ënë Rwoth. 13 Yecu obino, ëka ökwanyö ogati, cë ömïö bothgï, ëka ötïmö nï kömanön thon kï rëc. 14 Man onwongo dong wang më adek na Yecu onen ködë both ëlübkörë, kinge n’ecero ën kï ï kin jö n’öthöö.

15 Kinge na gïn dong otyeko cem, Yecu openyo Cimon Petero nï, "Cimon wod ka Jon, in adyer ïmara na löö jö ni?"

Ën ögamö nï, "Eyo, Rwoth, in ingeo nï an amari."

Yecu okobo nï, "Kwa ëthïnö romna."

16 Yecu openyo Petero dökï wang më arïö nï, "Cimon wod ka Jon, in adyer ïmara?"

Ën ögamö nï, "Eyo, Rwoth, in ingeo nï an amari."

Yecu okobo nï, "Gwök romna."

17 Yecu openyo Petero wang më adek nï, "Cimon wod ka Jon, in ïmara?"

Petero ïë öwang pïën Yecu openyo ën wang më adek nï, "Cimon wod ka Jon, in ïmara?" Cimon okobo nïnë nï, "Rwoth, in ingeo jami kïbëc; in ingeo nï an amari."

Yecu okobo nï, "Kwa romna. 18 Adyer, akobo nini nï ï karë na in pod ibedo athïn, itweo böngüni keni, ïcïdhö yo kanya in ïmïtö; ëntö ka dong itii, in ibino ryëö cingi gïnï, cë ngat mörö nökënë bino tweo nini böngüni, ëka bino teroni yo kanya in ba ïmïtö." 19 (Yecu okobo köp ni më nyutho kit thöö n’ebino ketho ï kome na Petero bino mïö dheo ï kom Obanga.) Cë okobo nïnë nï, "Lüb köra!"

20 Petero ölökërë, ëka önënö alübkör Yecu nön na ën onwongo marö tye ka lübö körgï. (Man obedo ngat acël n’onwongo obedo na cwök kï Yecu ï dhö cem më kothyeno ëka onwongo okobo nï, "Rwoth, nga na bino ketho örörö ï komi?") 21 Ï karë na Petero önënö ën, cë openyo Yecu nï, "Rwoth, cë dhanö ni kono?"

22 Yecu ögamö nï, "Ka an amïtö nï ën obed na kwö naka ka an adwogo, manön ënë ngö kï bothi? In myero ïlüb köra." 23 Pï tyën köp ni, ömïö anïï ökëth ï kin utmego nï alübkör Yecu ni ba bino thöö. Ëntö Yecu ba okobo nï ën ba bino thöö; ëntö Yecu okobo nï, "Ka an amïtö nï ën obed na kwö naka ka an adwogo, manön ënë ngö kï bothi?"

24 Man ënë alübkör Yecu n’okobo caden ï kom köp ni, ëka n’öcöö köp ni gïnï pïny. Wan engeo nï caden mërë na ën okobo tye atïr.

25 Jami nökënë tye na pol na Yecu otio. Ka onwongo ëcöögï pïny k’acëlacël, athamö nï kadï wi lobo thükül ba tye kï kabedo na römö buke n’ebino cöögï.