1 Dhanö mörö onwongo tye n’obedo Aparicayo na nyïngë Nikodemo. Ën onwongo obedo ngat acël ï kin edong më öd okiko k’Eyuda. 2 Ën öcïdhö both Yecu ï kiwor cë okobo nïnë nï, "Apwony, wan engeo nï in ibedo apwony n’Obanga ooro. Pïën ngat mörö ope na twërö tio anyuth më tango na in ïtïmö ka Obanga onwongo ba tye ködë."

3 Yecu ögamö nïnë nï, "An akobo nini köp adyer nï ngat mörö ope na bino nënö ker k’Obanga ka ba ënywölö ën dökï."

4 Nikodemo openyo Yecu nï, "Ëtwërö nywölö dhanö nïngö dökï ka dong oti ökö? Adyer ën ba twërö dönyö ïï aya mërë ëk ënywöl dökï!"

5 Yecu ögamö nïnë nï, "An akobo nini köp adyer nï ngat mörö ope na bino dönyö ï ker k’Obanga ka ba ënywölö kï pii ëka kï Tipo Naleng. 6 Dhanö n’ënywölö kï kom tye kï kwö më kom, ëntö dhanö n’ënywölö kï Tipo Naleng tye kï kwö më cwiny. 7 In myero kür ibed kï ur ï kom ngö na an akobo, ‘Un myero ënywölwu dökï.’ 8 Yamö kudho yo kanya ën mïtö. Iwinyo ngür mërë, ëntö ba ïrömö ngeo kanya ën öya kï ïë onyo kanya ën tye ka cïdhö yo ïë. Dhanö acëlacël n’ënywölö kï Tipo Naleng tye nï kömanön." 9 Nikodemo openyo Yecu nï, "Man twërö tïmërë nïngö?"

10 Yecu ögamö nï, "In ibedo apwony më Icarael, ëka in ba itye ka nïang ï köp ni kïbëc? 11 An akobo niwu köp adyer, wan ëtwak ï kom gin na wan engeo, ëka wan ëmïö caden ï kom gin na wan ënënö, ëntö un bara iyeo köp na wan ekobo. 12 Ka an akobo niwu köp ï kom jami më lobo ëka ba iye unu; cë un ïtwërö yee nïngö ka an akobo niwu köp ï kom jami më polo? 13 Ngat mörö ope na naka yam öcïdhö ï polo na path kï ngat n’obino kï ï polo—na ënë Wod ka Dhanö. 14 Kite na calö Muca otingo thwol malö ï kor yath kï ï thim, cë Wod ka Dhanö thon myero eting malö, 15 ëk dhanö acëlacël na yee ï kome onwong kwö na ba thum.

16 "Obanga ömarö jö më lobo ni rwök, cë ömïö Wode acël këkën, ëk dhanö acëlacël na yee ï kome kür öthöö, ëntö onwong kwö na ba thum. 17 Adyer, Obanga ba ooro Wode më ngölö köp nï jö më lobo, ëntö nï jö më lobo myero ölarë pïrë. 18 Dhanö na yee ï kome, ba ebino ngölö köp nïnë, ëntö dhanö na ba yee ëngölö köp nïnë dong ökö, pïën ba oyee ï nyïng Wod k’Obanga acël këkën. 19 Ngölö-köp tye nï köman: Tar obino ï lobo, ëntö jïï ömarö cöl pïny nakaka tar pïën ticgï onwongo obedo gin na rac. 20 Jö kïbëc na tïmö gin na rac dag gïnï tar, ëka ba bino gïnï ï tar pï lworo nï ticgï bino nen ökö kanyalër. 21 Ëntö jö na tïmö gin na tye atïr bino gïnï ï tar, ëk ticgï onen ökö kanyalër nï gin na gïn otio obedo gin n’Obanga mïtö."

22 Kinge, Yecu k’ëlübkörë öcïdhö gïnï ï lobo Yudea, kanya ën obedo ïë pï nïnö mörö k’ëlübkörë nakun batica jïï. 23 Jon Abatica thon onwongo tye ka batica jïï ï Ainon na cwök kï Calim, pïën pii onwongo dwong kunön, ëka jïï onwongo tye ka bino bothe ëk ebaticagï. 24 (Man ötïmërë na bara eketho Jon ï buc.) 25 Cë pyem öcakërë ï kin ëlübkör Jon mökö ëka Ayuda mörö ï kom kite më lönyërë. 26 Gïn obino both Jon ëka okobo gïnï bothe nï, "Apwony, dhanö ca n’onwongo tye kodi yo löka kulo Jordan—na in ikobo köp ï kome—nën, ën tye ka batica jïï, ëka jö kïbëc tye ka cïdhö yo bothe."

27 Jon ögamö nï, "Dhanö twërö nwongo gin n’ëmïö ën këkën kï ï polo. 28 Un kï komwu ïtwërö unu moko nï an akobo, ‘An ba abedo Meciya ëntö an eora anyim nïnë.’ 29 Ngat na cung ï nget nyakö n’ënyömö ënë obedo anyom. Okone k’anyom, na cung ï ngete ëka winye, bedo na ïë opong kï yom cwiny rwök ka owinyo dwön anyom. Pï manön, an apong kï yom cwiny rwök. 30 Ën myero ömëdërë; an myero adök pïny.

31 "Ngat na bino kï malö löö jami kïbëc; ngat n’öya kï ï lobo ën obedo dhanö më lobo, ëka twak na calö ngat n’öya kï ï lobo. Ngat n’öya kï ï polo löö jami kïbëc. 32 Ën mïö caden ï kom gin na ën önënö ëka owinyo, ëntö ngat mörö ope na yeo caden mërë. 33 Ngat n’oyeo köp mërë, omoko kanya leng nï Obanga ënë Obanga më adyer. 34 Ngat n’Obanga ooro twakö köp k’Obanga, pïën Obanga mïö Tipo Naleng n’opong na ba pimo apima. 35 Apap marö Wod ëka oketho jami kïbëc ï cïngë. 36 Dhanö na yee ï kom Wod tye kï kwö na ba thum, ëntö ngat na kwërö Wod ba bino nwongo kwö, pïën akëmö k’Obanga bedo ï kome."