1 Kinge karë mörö Yecu öcïdhö yo löka Nam më Galilaya (n’ecwodo thon nï Nam më Tiberia), 2 ëka lwak na pol ölübö ën pïën gïn önënö anyuth më tango n’onwongo ën ötïmö më cangö etwoe. 3 Cë Yecu öïdhö malö ï wi kidi ëka obedo pïny k’ëlübkörë. 4 Karë më karama më Poth k’Eyuda onwongo dong cwök. 5 Na Yecu önënö lwak tye ka bino yo bothe, ën okobo both Pilipo nï, "Kwene na onu ebino wïlö cem kï ïë më pïdhö jö ni?" 6 Yecu okobo köp ni më tëmö Pilipo, pïën Yecu onwongo dong ngeo gin na ën ebino tïmö.

7 Pilipo ögamö nïnë nï, "Denario mia arïö ba bino römö më wïlö ogati ëk ngat acëlacël ögam na nönök!"

8 Ngat acël n’obedo alübkörë n’ecwodo nï Anderiya, ömïn Cimon Petero, okobo nïnë nï, 9 "Awobi mörö tye kany n’ömakö ogati abic më cayiri ëka rëc arïö na thïthïnö, ëntö kara man twërö könyö ngö both jö na pol nï köman?"

10 Yecu okobo nï, "Mïï unu jïï obed pïny." Lum onwongo ölöth rwök ï kabedo nön, ëka jïï obedo pïny, kï kin jö n’obedo pïny, wel cwö këkën onwongo mïtö römö elip abic. 11 Cë Yecu ökwanyö ogati abic, öpwöyö Obanga, ëka ömïö both ëlübkörë cë gïn opoko both jö n’onwongo obedo pïny. Ën ötïmö nï kömanön thon ï kom rëc ëka jö kïbëc öcamö kite na gïn ömïtö ködë.

12 Ï karë na gïn kïbëc ocemo oyeng, Yecu okobo both ëlübkörë nï, "Cök unu ngïnyë n’odong ëk gin mörö kür öbal." 13 Cë ëlübkörë öcökö ngïny ogati më cayiri na jïï öcamö ëwëkö ökö ëka ëpïkö pong aditi apar wie arïö. 14 Kinge na jïï önënö anyuth më tango na Yecu otio, gïn öcakö kobo nï, "Adyer man ënë Adwarpïny na myero obin ï lobo." 15 Ï karë na Yecu önïang nï gïn onwongo mïtö bino më dïönë bedo rwoth, cë ën ölüü ökö kënë yo wi kidi.

16 Ï karë na pïny ocido, ëlübkörë öcïdhö gïnï ï dhö nam, 17 cë ödönyö gïnï ï öd yeya ëka öngölö ï nam më cïdhö yo Kaperanaum. Ï caa nön pïny onwongo dong cöl, ëka Yecu onwongo bara obino bothgï. 18 Yamö na tëk onwongo tye ka kudho ëka onwongo tye ka rubo pii. 19 Ï karë na gïn ökwang na römö kilomita abic onyo abicël, gïn önënö Yecu ka tye ka bino yo bothgï na wotho ï wi pii, cë lworo ömakögï rwök. 20 Ëntö Yecu okobo nïgï nï, "An ënön; kür ibed unu kï lworo." 21 Ëlübkör Yecu ömïö ën ödönyö ï yeya bothgï. Cücüth yeya othuno ï lak nam kanya onwongo gïn tye ka cïdhö yo ïë.

22 Kodiko mërë lwak n’onwongo odong gïnï yo löka nam önïang nï yeya acël këkën ënë onwongo tye kunön, ëka Yecu onwongo ba ödönyö ïë k’ëlübkörë, ëntö gïn kara onwongo öcïdhö kën-gï. 23 Cë yeya mökö n’öya gïnï kï ï Tiberia obino ëka ocung gïnï na cwök ï kabedo na jïï onwongo öcamö ogati ïë kinge na Rwoth öpwöyö Obanga. 24 Ï karë na lwak önënö nï Yecu onyo ëlübkörë onwongo ope gïnï kunön, gïn ödönyö ï yeya ëka öcïdhö gïnï yo Kaperanaum më rangö Yecu.

25 Ï karë na gïn onwongo Yecu ï löka nam tung ca, gïn openyo ën nï, "Apwony, in ithuno kany awene?"

26 Yecu ögamö nï, "Adyer an akobo niwu, un itye ka rangöna pïën an apïdhöwu kï cem ëka iyeng unu, pathï nï pïën un ïnënö anyuth më tango. 27 Kür itii unu pï cem na töp ökö, ëntö tii unu pï cem na bedo naka ï kwö na ba thum, na Wod ka Dhanö bino mïöwu. Obanga Apap omoko nakun ketho anyuth mërë ï kome."

28 Cë gïn openyo Yecu nï, "Ngö na wan myero ëtïm ëk ëtïm gin n’Obanga mïtö?"

29 Yecu ögamö nï, "Tic k’Obanga ene: më yee ï kom ngat na ën ooro."

30 Gïn openyo Yecu dökï nï, "Anyuth më tango mënë na in ibino mïö ëk wan ënën ëka eyee köp na in ikobo? Ngö na in ibino tïmö? 31 Kwerewa öcamö manna ï thim; kite n’ëcöö ködë: ‘Ën ömïögï ogati n’öya kï ï polo ëk öcam gïnï.’✝"

32 Yecu okobo nïgï nï, "An akobo niwu köp adyer, pathï Muca ënë ömïöwu ogati n’öya kï ï polo, ëntö Apapna ënë mïöwu ogati n’atïr na yaa kï ï polo. 33 Ogati k’Obanga n’atïr ënë ngat na bino kï ï polo yo pïny ëka mïö kwö both jö më lobo."

34 Gïn okobo nï, "Adwong, cakërë kobedini mïïwa ogati ni ï karë kïbëc."

35 Cë Yecu okobo bothgï nï, "An ënë ogati na mïö kwö. Ngat na bino botha kec ba bino neko, ëka ngat na yee ï koma örïö ba bino neko. 36 Ëntö an akobo niwu nï ïnëna unu ökö ëka pod bara iyee unu. 37 Jö kïbëc n’Apapna mïö botha bino bino gïnï botha, ëka ngat n’obino botha an ba abino ryëmö ökö. 38 Pïën an abino pïny kï ï polo pathï më cobo mitina këna ëntö më cobo miti ka ngat n’oora. 39 Man ënë miti ka ngat n’oora, nï kür arweny ngat mörö acël kï kin jö kïbëc na ën ömïa, ëntö acergï ï nïnö më ajiki. 40 Man ënë gin n’Apapna mïtö, nï dhanö acëlacël na nënö Wod ëka yee ï kome, myero onwong kwö na ba thum cë an abino cero ën ï nïnö më ajiki."

41 Cë ï caa nön Eyuda n’onwongo pyem kï Yecu öcakö ngüngüta ï kome pïën ën okobo nï, "An ënë ogati n’obino pïny kï ï polo." 42 Gïn okobo nï, "Man pathï Yecu, wod ka Yocepu, n’apap mërë ëka aya mërë wan engeo? Pïngö ën kobo nï, ‘An abino pïny kï ï polo’?"

43 Yecu ögamö nï, "Kür ïngüngüta unu ï kinwu kenwu." 44 Ngat mörö ope na twërö bino botha thwara k’Apap n’oora ömïö ën më bino botha, ëka an abino cero ën ï nïnö më ajiki. 45 Ëcöö ï buke k’edwarpïny nï: "Obanga bino pwonyogï kïbëc.✝ Ngat acëlacël na winyo köp kï both Apap ëka pwonyere kï bothe bino yo botha. 46 Ngat mörö ope n’önënö Apap na path kï ngat n’öya kï both Obanga; ën këkën ënë önënö Apap. 47 An akobo niwu köp adyer, ngat na yee tye kï kwö na bedo naka naka. 48 An abedo ogati na mïö kwö. 49 Kwerewu öcamö manna ï thim, ëka öthöö gïnï kïbëc. 50 Ëntö ngat mörö na bino camö ogati n’obino kï ï polo ba bino thöö. 51 An abedo ogati na mïö kwö n’obino pïny kï ï polo. Ka ngat mörö öcamö ogati ni, ën bino kwö na twal. Ogati ni ënë koma, na an abino mïö ëk jö më lobo obed kï kwö më cwiny."

52 Cë Eyuda n’onwongo pyem kï Yecu öcakö gïnï pyem na gwaü ï kin-gï, "Dhanö ni twërö mïöwa kome më acama nïngö?"

53 Yecu okobo nïgï nï, "An akobo niwu köp adyer, thwara ka ïcamö unu kom Wod ka Dhanö ëka ïmadhö unu remo mërë, ba ibino bedo unu kï kwö ï komwu. 54 Ngat n’öcamö koma ëka ömadhö remona bedo kï kwö na ba thum, ëka an abino cero ën ï nïnö më ajiki. 55 Pïën koma obedo cem më adyer, ëka remona obedo gin më amadha më adyer. 56 Ngat na camö koma ëka madhö remona bedo ï an ëka an abedo ï ën. 57 Kite n’Apap na kwö oora ëka an akwö pï Apap, kömanön thon ngat na camö koma bino kwö pï an. 58 Kwerewu öcamö manna ëka öthöö gïnï, ëntö ngat na camö ogati n’obino pïny kï ï polo bino kwö na twal." 59 Yecu okobo köp ni nakun tye ka pwony ï cinagoga ï Kaperanaum.

60 Ï karë n’ëlübkör Yecu na pol owinyo köp mërë, gïn okobo nï, "Man obedo pwony na tëk. Nga na twërö yeo köp ni?"

61 Ï karë na Yecu ongeo nï ëlübkörë onwongo tye ka ngüngüta ï köp ni, ën okobo nïgï nï, "Köp ni öbalö thamawu ökö? 62 Cë ngö na un ibino thamö ka ïnënö unu Wod ka Dhanö tye ka cïdhö yo polo kanya ën onwongo tye ïë cön? 63 Gin na mïö kwö ënë Tipo Naleng; kom ba könyö gin mörö. Köp na an atwakö bothwu obedo köp më cwiny ëka kwö. 64 Ëntö jö mökö pod tye ï kinwu na ba yee ï koma." Pïën cakërë ï acaki, Yecu onwongo ongeo jö na ba bino yee ëka kï ngat na bino ketho örörö ï kome. 65 Ën ömëdërë më kobo nï, "Man ënë ömïö an akobo niwu nï ngat mörö ope na twërö bino botha thwara k’Apap ömïö ën më bino botha."

66 Cakërë ï karë nön ëlübkörë na pol öwëkö gïnï lübö körë ëka ba dökï ömëdërë gïnï më lübö ën.

67 Yecu openyo ëlübkörë apar wie arïö nï, "Un thon ïmïtö cïdhö ökö?"

68 Cimon Petero ögamö nï, "Rwoth, wan ebino cïdhö yo both nga? In itye kï köp më kwö na ba thum. 69 Wan eye ëka engeo nï in ibedo Ngat Naleng k’Obanga."

70 Cë Yecu okobo nïgï nï, "An onwongo ba ayëröwu jö apar wie arïö? Ëntö dhanö acël ï kinwu obedo atic ka Catan!" 71 (Ën onwongo tye ka twak ï kom ngat na bino ketho örörö ï kome, Yuda wod ka Cimon Ikariot, n’onwongo obedo dhanö acël ï kin ëlübkör Yecu apar wie arïö.)