1 Yecu öcïdhö ï wi Kidi më Jeituni. 2 Kodiko cön, ën dökï odwogo ï dyekal öt k’Obanga, jö kïbëc obino bothe, cë ën obedo pïny më pwonyogï. 3 Cë epwony Cïk ëka Eparicayo okelo gïnï dhakö mörö n’ëmakö ï elomi. Gïn ömïö ën ocung ï nyimgï 4 ëka okobo gïnï both Yecu nï, "Apwony, dhakö ni ëmakö ï tïm më elomi. 5 Kï ï Cïk, Muca öcïköwa nï myero ecel koth mon ni kï kite. In ikobo nïngö ïë?" 6 Gïn openyo peny ni më tëmö Yecu, ëk enwong kï köp mörö më dotho ën.

Ëntö Yecu ogungo pïny cë öcakö cöö ngöm kï nya cïngë. 7 Ï karë na gïn mëdërë më penyo Yecu, ën öya malö cë okobo nïgï nï, "Ka ngat mörö tye ï kinwu n’ope kï bal, myero ën öcak celo dhakö ni kï kidi." 8 Ën dökï ogungo cë öcöö ngöm.

9 Ï karë na gïn owinyo köp nön, öcakö gïnï cïdhö k’acëlacël cakërë kï both jö na dito naka Yecu odong kënë kï dhakö na pod ocung kany nön. 10 Cë Yecu öya malö ëka openyo ën nï, "Dhakö, tye gïnï kwene? Ngat mörö ba öngölö köp ï komi?"

11 Ën ögamö nï, "Adwong, ngat mörö ope."

Cë Yecu okobo nïnë nï, "An thon ba angölö köp ï komi. Cïdhï ëka kür dökï ïtïm bal."]*

12 Ï karë na Yecu dökï ötwak kï jïï, ën okobo nï, "An abedo tar më lobo, ngat na lübö köra ba bino woth ï cöl pïny, ëntö bino bedo kï tar më kwö."

13 Eparicayo ögamö nï, "Kobedini in ïmïö köp më caden ï komi keni; caden-ni ba tye atïr."

14 Yecu ögamö nï, "Kadï bed an akob caden ï koma këna, caden-na ënë köp na tye atïr pïën an angeo kanya an aya kï ïë ëka kanya an acïdhö yo ïë. Ëntö un ba ingeo kanya an aya kï ïë ëka kanya an acïdhö yo ïë. 15 Un ïngölö köp ï kite ka dhanö, ëntö an ba angölö köp ï kom ngat mörö. 16 Ëntö ka an angölö köp, ngölö-köpna tye atïr, pïën an ba atye këna ï ngölö-köp ëntö Apap n’oora tye köda kanya acël. 17 Ï Cïk na mewu ëcöö nï köp më caden ka jö arïö bedo caden n’atïr. 18 An amoko köp më caden ï koma këna, ëka Apap n’oora ënë acaden-na nökënë."

19 Cë gïn openyo Yecu nï, "Apapni tye kwene?"

Ën ögamö nï, "Un ba ingea unu onyo Apapna. Ka onwongo ingea unu, onwongo ingeo unu Apapna thon." 20 Ën okobo köp ni gïnï ï karë na ën tye ka pwony ï dyekal öt k’Obanga na cwök kï kanya ëkanö mïc ïë. Ëntö ngat mörö ba ömakö ën, pïën caa mërë onwongo bara örömö.

21 Cë Yecu dökï okobo nïgï nï, "An acïdhö ökö, ëka un ibino rangöna, ëntö ibino unu thöö ï balwu. Kanya an acïdhö yo ïë, un ba ïtwërö bino ïë."

22 Man ömïö ëtëla k’Eyuda openyere kën-gï nï, "Ën bino nekere kënë? Man ënë tyën köp n’ömïö ën okobo nï, ‘Kanya an acïdhö yo ïë un ba ïtwërö bino ïë’?"

23 Yecu ömëdërë nakun kobo nï, "Un ïya unu kï ï lobo pïny; ëntö an aya kï malö. Un ibedo më lobo ni; ëntö an ba abedo më lobo ni. 24 Man ënë ömïö an akobo nï un ibino thöö ï balwu gïnï; ka un ba iyee nï ‘An ënë An,’ adyer un ibino thöö ï balwu gïnï."

25 Ëtëla k’Eyuda openyo ën nï, "In ïnga?"

Yecu ögamö nï, "An ënë ngat na an abedo kobo niwu kï ï acaki. 26 An atye kï köp na pol na myero akob ï komwu na ngölö köp niwu. Ëntö ngat n’oora genere, ëka gin na an awinyo kï bothe, an akobo both jö më lobo."

27 Gïn ba önïang nï Yecu onwongo tye ka kobo nïgï köp ï kom Apap mërë. 28 Cë Yecu okobo nï, "Ï karë na un ibino tingo Wod ka Dhanö malö, cë un ibino ngeo nï ‘An ënë An’ ëka nï an ba atïmö gin mörö kï twëröna këna, ëntö atwakö ngö n’Apap opwonya ködë. 29 Ngat n’oora tye kanya acël köda; ën ba öwëka këna, pïën ï karë kïbëc an atïmö gin na yomo cwinye." 30 Jö na pol n’owinyo Yecu ka twak oye gïnï ï kome.

31 Cë Yecu okobo both Eyuda n’oye ï kome nï, "Ka ïlübö unu pwonyna, nwongo ibedo unu ëlübköra adyer. 32 Un ibino ngeo köp adyer, ëka köp adyer bino gönyöwu."

33 Gïn ögamö nï, "Wan ebedo ëkwaë k’Abraam ëka wan bara ebedo opii ka ngat mörö. In ïcakö kobo nï köp adyer bino gönyöwa nïngö?"

34 Yecu ögamö nï, "Akobo niwu köp adyer, ngat acëlacël na tïmö bal obedo opii ka bal. 35 Opii ba bedo ï pacö mörö na twal, ëntö athïn më pacö bedo ïë na twal. 36 Kömanön, ka Wod ögönyöwu, adyer nwongo dong ëgönyöwu. 37 An angeo nï un ibedo ëkwaë k’Abraam. Ëntö pod ïyübërë unu më nekona, pïën köpna ba dönyö ï cwinywu. 38 An akobo niwu gin na an anënö kï both Apapna, ëntö un ïtïmö gin na un iwinyo kï both apapwu."

39 Gïn ögamö nï, "Abraam obedo apapwa."

Yecu okobo nïgï nï, "Ka un onwongo ibedo ëthïnö k’Abraam, kono ïtïmö unu gin n’Abraam ötïmö. 40 Ëntö kobedini ïmïtö unu nekona, an dhanö na kobo niwu köp adyer na an awinyo kï both Obanga. Abraam yam ba ötïmö kömanön. 41 Un itye ka tïmö gin n’apapwu kikome tïmö."

Gïn ögamö nï, "Wan ba ebedo ëthïn lek; wan etye k’Apapwa acël këkën na ënë Obanga kikome."

42 Yecu okobo nïgï nï, "Ka onwongo Obanga obedo Apapwu, kono ïmara unu, pïën an aya kï both Obanga ëka kobedini an atye kany. An ba abino kï wia këna; ëntö ënë oora. 43 Pïngö ba ïnïang unu ï köp na an akobo? Pïën un ba ïtwërö winyo köp na an akobo. 44 Un ïya kï both apapwu Catan, ëka ïmïtö unu cobo miti k’apapwu. Ën onwongo obedo anek cön ï acaki, ba kobo köp adyer, pïën köp adyer ope bothe. Ka ën kobo köp më twodo nwongo obedo kite mërë, pïën ën obedo atwodo ëka apap ka twodo. 45 An akobo niwu köp adyer ëntö un ba iyea! 46 Nga kï ï kinwu na twërö nyutho bal mörö ï koma? Ka an atwakö köp adyer, pïngö ba iyee unu ï köp na an akobo? 47 Ngat mörö n’obedo dhanö k’Obanga winyo köp k’Obanga. Gin na mïö un ba iwinyo pïën un ba ïya kï both Obanga."

48 Eyuda n’onwongo pyem kï Yecu openyo gïnï nï, "Wan ba ekobo köp atïr nï in ibedo dhanö më Camaria ëka cen omaki?"

49 Yecu ögamö nï, "An cen ba ömaka, ëntö awörö Apapna ëka un ba ïwöra. 50 An ba arangö dheo pïra këna; ëntö ngat na rangö na kakara tye, ëka ënë obedo angöl-köp. 51 Adyer an akobo niwu nï, ka ngat mörö gwökö köpna, ën ba bino thöö na twal."

52 Eyuda n’onwongo pyem kï Yecu okobo nï, "Kobedini wan dong ënïang nï in cen omaki! Abraam yam öthöö ëka edwarpïny thon, ëntö in ikobo nï, ‘Ka ngat mörö gwökö köpna ba bino thöö na twal.’ 53 In idit ïlöö apapwa Abraam? Ën yam öthöö, ëka edwarpïny thon. In ïthamö nï in ibedo nga?"

54 Yecu ögamö nï, "Ka aketho dheo ï koma këna, dheona nön ba könyö. Apapna na un icwodo nï Obangawu ënë ketho dheo ï koma. 55 Un ba ingeo unu ën, an angeo ën. Ka onwongo an akobo nï ba angeo ën, kono abedo atwodo calö un. Ëntö an angeo ën ëka agwökö köp mërë. 56 Apapwu Abraam obino obedo kï yom cwiny nï ebino nënö nïnöna; ën önënö cë cwinye obedo na yom."

57 Ëtëla k’Eyuda okobo nïnë nï, "In mwakani bara othuno pyer abic ëka in ïnënö Abraam!"

58 Yecu ögamö nï, "Adyer akobo niwu nï na pod bara ënywölö Abraam, ‘An ënë An.’" 59 Cë gïn ökwanyö kite më celo Yecu, ëntö ën opono ëka öya ökö kï ï dyekal öt k’Obanga.