1 Kinge, Yecu öyërö ëlübkörë jö pyer abïrö wie arïö. Cë oorogï k’arïö arïö më cïdhö anyim ï taun ëka ï kabedo nökënë na ën onwongo ebino thuno ïë. 2 Yecu okobo bothgï nï, "Kac dwong, ëntö ëkac nönök. Lëg unu both Rwoth n’obedo won pwodho ëk oor etic ï kac. 3 Cïdh unu dong, ëntö po unu nï aorowu na calö ëthïn rom ï kin orudi. 4 Kür ïcïdh unu kï lïm onyo opiru, kadï wör, ëka kür ïbal unu caa na pol ï motho jïï.

5 "Ka ïdönyö unu ï öt, më acël kob unu nï, ‘Obanga ömïïwu kuc.’ 6 Cë k’athïn më kuc ute ï öt nön, cë kucwu bino bedo ï kome. Ëntö ka ope cë kucwu dwogo bothwu. 7 Bed unu ï öt nonu, kür ibed ka köbërë unu öt kï öt. Nakun ïcamö ëka ïmadhö unu gin n’ëmïöwu, pïën atic myero ëmïï cül mërë.

8 "Ka ïdönyö unu ï taun mörö cë ëgamöwu, cam unu ngö n’eketho ï nyimwu 9 Cang unu etwoe na ute kunön ëka ikob unu nïgï nï, ‘Ker k’Obanga dong cwök.’ 10 Ëntö ka ïdönyö unu ï taun mörö, cë ba ëgamöwu, cïdh unu ï wangayoo më taun nön, ëka ikob unu nï, 11 ‘Naka thon apua më taunwu n’omoko ï tyënwa, ëtëngö ï komwu. Kadï bed nï kömanön myero ingee unu nï Ker k’Obanga dong cwök.’ 12 Akobo niwu nï ï nïnö nön më ngölö-köp, taun ni bino bedo kï can na löö pëkö ka jö Codom!"*

13 "Ibino nënö can in, Korajin! Ibino nënö can in, Bethecaida! Ka tango n’onwongo ëtïmögï bothwu onwongo ëtïmö ï Turo ëka Cidon, kono onwongo ongut gïnï cön, nakun ruko gïnï böngü cöla ëka juko gïnï wigï kï buru. 14 Canwu ï nïnö më ngölö-köp bino bedo na thwönë na löö can ka Turo kï Cidon! 15 Ëka un jö më Kaperanaum ïmïtö wakërë unu kenwu nï ibino cïdhö unu ï polo? Pathï kömanön, ebino dwököwu cen ï lyël."

16 Yecu okobo both ëlübkörë nï, "Ngat na bino winyowu, nwongo owinya, ngat na ba bino winyowu, nwongo ökwëra. Ëka ngat n’ökwëra nwongo ökwërö ngat n’ora."

17 Ëlübkör Yecu pyer abïrö odwogo gïnï cen kï yom cwiny, ëka okobo gïnï nï, "Rwoth, naka cene thon owinyowa ka wan etio kï nyingi!"

18 Yecu ögamö nïgï nï, "Anënö Catan ka rëdhërë pïny na yaa kï ï polo na cal kï lüköth. 19 Winy unu, amïöwu twërö më nyönö twol kï ïth ëka më löönö tëkö ka langwu kïbëc. Gin mörö ope na bino tïmöwu na rac. 20 Ëntö kür ibed unu kï yom cwiny këkën nï tipo na reco owinyowu, thwara ibed unu na cwinywu yom pïën Obanga öcöö nyïngwu ï polo."

21 Ï karë nön, Tipo Naleng ömïö Yecu yom cwiny nakun kobo nï, "An apaki Apap, Rwoth më polo ëka lobo, pïën ïkanö jami ni ökö kï both jö na ryëk ëka kï both jö na ngeo pïny, ëka inyutho both ëthïnö na pod thïnö. Eyo, Apap, man ënë kite n’onwongo in ïmïtö nï ötïmërë ködë na yomo cwinyi.

22 "Jami kïbëc Obanga otyeko mïö ökö botha. Ngat mörö ope na ngeo Wod nï ënë nga kono k’Apapna këkën. Ëka ngat mörö ope na ngeo Apapna nï ënë nga kono ka Wod këkën, ëntö dhanö na Wod öyërö më nyutho both Apap mërë."

23 Cë Yecu ölökërë both ëlübkörë cë okobo nïgï müng nï, "Tye kï gum ngat n’önënö gin na un ïnënö! 24 Akobo niwu nï edwarpïny na pol ëka rwodhi yam öparö gïnï më nënö gin na un ïnënö, ëntö ba önënö gïnï. Ëka öparö gïnï më winyo gin na un iwinyo, ëntö ba owinyo gïnï thon."

25 Ï nïnö mörö acël, apwony cïk ka Muca mörö öya malö më tëmö Yecu na kobo nï, "Apwony, atïm ngö ëk anwong kwö na bedo naka?"

26 Yecu ögamö nïnë nï, "Ngö n’ëcöö ï buk më cïk ka Muca? Ïnïang ïë nïngö?"

27 Apwony cïk nön ögamö nïnë nï, "Mar Rwoth Obangani kï cwinyi kïbëc, kï tiponi kïbëc, kï tëköni kïbëc, kï thamani kïbëc,✝ ëka mar awodhi na calö ïmarö komi keni." ✝

28 Yecu ögamö nïnë nï, "Kakarë. Tïm kömanön cë ibino kwö."

29 Ëntö apwony cïk n’onwongo mïtö nyutho nï ën kite atïr ï nyim Obanga, dök openyo Yecu nï, "Awodha ënë nga?"

30 Yecu ögamö nïnë kï carolok köman, "Ëcwö mörö yam ute n’öya kï ï Jerucalem, n’onwongo tye ï woth mërë lungo yo kupïny Jeriko. Ocop ï kom ëyak, ëmakö, ëgönyö böng mërë ökö, epwodo cë ëwëkö na dong cwök thöö. 31 Alamdhök obino na lübö yoo nön thon. Ëntö ï caa n’önënö ngat n’ëwanö, ën owok kï theng yoo kucël cë opoth apotha. 32 Kömanön thon Alebi* mörö ölübö yoo nonu. Ën önënö ëcwö nön n’epwodo, cë opoth ökö. 33 Ëntö dhanö më Camaria mörö obino, önënö ngat n’ëwanö, ëka obedo kï kïca ï kome. 34 Ën öcïdhö ï ngete, orumo cöngë pïny, ölwökö wang ret mërë kï köngö ölök, odunyo kï möö cë otweo k’opeke böngü. Ën dong otingo ëcwö nön opyelo ï ngee kana mërë cë öcïdhö ködë naka ï öt apanga pï wele kany ögwökö ïë. 35 Kodiko mërë ën ökwanyö denario arïö ömïö both won öt nön na kobo nïnë nï, ‘Gwök ëcwö ni na bër, ëka ka itio kï cïlïng na kadhö wel na an amïö bothi ökö, abino dwökö nini ka adwogo.’ "

36 Cë Yecu dök openyo ën nï, "Nga kï kin jö adek ni ënë obedo awodh ëcwö n’ëyak opwodo?"

37 Apwony cïk ögamö nï, "Ngat n’obedo kï kïca ï kome." Cë Yecu okobo nïnë nï, "Adyer! In thon cïdh ëka ïtïm nï kömanön."

38 Yecu ëka ëlübkörë onwongo ut ï wothgï yo Jerucalem, ëka ödönyö gïnï ï pacö mörö. Dhakö mörö na nyïngë Martha ögamögï ï ödë. 39 Ën onwongo ut k’amïn mërë n’ecwodo nï Maria n’obedo pïny ï nget tyën Rwoth winyo pwony mërë. 40 Ëntö Martha obedo yelere ï tic kïbëc më yübö cem më acama. Ën obino both Yecu cë okobo nïnë nï, "Rwoth, in ba ïparö nï amëra öwëka këna ï dhö tic? Kob nïnë obin ökönya." 41 Rwoth ögamö nïnë nï, "Martha, Martha, in ïparö pï tic na pol, 42 ëntö gin acël këkën ënë mïtërë. Maria öyërö gin na bër, na ba ebino kwanyö ökö kï bothe."