1 Ï nïnö mörö acël ëcök ocoro ëka ëbal, obino gïnï both Yecu më winyo ka ën pwonyo. 2 Eparicayo ëka epwony cïk öngüngüta na kobo gïnï nï, "dhanö ni obedo okone k’ëbal ëka cemo ködgï kanya acël."

3 Cë Yecu dong okobo nïgï carolok nï, 4 "Ka ngat mörö kï kinwu n’onwongo ut kï rom mërë mia acël ëka acël kï kin-gï orwenyo ökö, ngö na ën bino tïmö? Ën bino wëkö pyer abungwën wie abungwën ï bar ëka cïdhö rangö römö n’orwenyo naka nwongo. 5 Ëka ka onwongo römö nön, ën ryongo ï wi baë kï thwön yom cwiny 6 cë cïdhö ködë yo pacö. Ën dong cwodo nyikonei mërë ëka ewodhe nï nget parë ëka kobo nïgï nï, ‘Bed unu kï yom cwiny köda, pïën anwongo römöna n’onwongo orwenyo ni ökö.’ 7 Akobo niwu, ï kit yoo acël nön, yom cwiny bino bedo na thwönë rwök ï polo pï abal acël na bino ngut na löö jö pyer abungwën wie abungwën na thamö gïnï nï kitegï atïr na ba mïtö gïnï ngut."

8 Yecu okobo nïgï carolok nökënë nï, "Cë ka dhakö ut kï cïlïng* apar na nyïng ëka orwenyo acël ökö, Ngö na ën bino tïmö? Ën bino cwïnyö tara cë ywëö ï öt ëka rangö naka nwongo. 9 Ëka ka onwongo, ën bino cwodo nyikonei mërë ëka ewodhe nï nget parë. Cë kobo nïgï nï, ‘Bie unu ëk ebedu kï yom cwiny pïën anwongo cïlïngna n’orwenyo ni ökö.’ 10 Ï yoo acël nonu, akobo niwu nï yom cwiny bino bedo ï nyim emalaika k’Obanga pï abal na bino ngut."

11 Yecu dök ömëdërë kï carolok na kobo nï, "Yam dhanö mörö ut, n’onwongo ute k’awope mërë arïö. 12 Awobi na tïdï öcïdhö both apap mërë ëka okobo nïnë nï, ‘Apap, mïa lïm na kukura ökö.’ Cë apapgï opoko jami mërë ï kin-gï.

13 "Kinge nïnö na nönök, awobi na tïdï ni öcökö jami mërë kïbëc ëka öcakö woth mërë më cïdhö ï lobo na bor. Ën öbalö lïm mërë kunön ï bedo më carö carö. 14 Na dong öbalö lïm mërë othum ökö, kec ërön opodho ï lobo nonu, awobi nön onwongo ope kï cem më acama. 15 Cë ën dong öcïdhö both ngat mörö më lobo nön, ëka etero ën ï dyelum më kwaönö pün.* 16 Awobi ni kec obino oneko rwök naka öparö më camö cem na pün camö. Ëntö ngat mörö ba ömïö ën cem më acama.

17 "Ëntö ï karë na dong otyeko nïang pïrë kënë öcakö kobo nï, ‘Etic k’apapna tye adi na camö kwon löögï ökö, ëka an athöö kï kec kany! 18 Abino wëkö lobo ni cë adök cen both apapna ëka akobo nïnë nï, apap, an abalö ï nyim Obanga ëka thon bothi. 19 An ba dök apora ëk icwoda nï awodi, mïa abed na calö etic na in ipangogï.’ 20 Cë dong öcakö woth më cïdhö both apap mërë.

"Ëntö na ën pod ut kanya bor, apap mërë önënö ën ëka obedo kï kïca ï kom wode, cë öngwëcö yo bothe. Apap mërë öthünö körë ëka omotho kï yom cwiny.

21 "Wode okobo nïnë nï, ‘Apap, an abalö ï nyim Obanga ëka thon bothi. Ba dök apora ëk ecwoda nï abedo wodi.’*

22 "Ëntö apap mërë okobo both etic mërë nï, ‘Kel unu jöra böngü na bër kï ï öt pïöpïö ëk ïmïï unu oruki. Rëp unu agïth ï nya cïngë ëka mïï unu oruk wör ï tyënë.* 23 Kel unu thon wod thwön n’öcwëë ëk inek unu cë ëcam kanya acël ëka ebedu kï yom cwiny. 24 Pïën athïn-na ni onwongo yam öthöö cë kobedini dong ute na kwö. Ën onwongo orwenyo cë dong enwongo.’ Öcakö gïnï bedo kï yom cwiny.

25 "Ï caa nön wode na dit onwongo tye ï pwodho. Ï karë na ën odwogo, na dong cwök kï öt, owinyo jïï ka wer ëka myël gïnï. 26 Cë ën ocwodo ngat acël kï kin etic ëka openyo ën ngö n’onwongo tye ka tïmërë. 27 Atic nön ögamö nï, ‘Omeru na tïdï nï dong odwogo, ëka apapni oneko wod thwön n’öcwëë pïën omeru odwogo na kome yot.’

28 "Akëmö ömakö ömïn mërë na dit cë ökwërö dönyö ökö ï öt. Apap mërë odonyo yökö ëka öbakö dhögë bothe. 29 Ëntö ën ögamö na apap mërë nï, ‘Nën, an atio bothi pï mwaka na pol ëka bara akwërö lübö cïkni. Ëntö ba ïmïa kadï k’athïn dyël mörö ëk acam kï nyikoneina. 30 Ëntö wodi ni n’öbalö lïmni kïbëc ï kom mon n’obedo alyanga obino pacö, in ibedo kï yom cwiny cë ineko nïnë wod thwön n’öcwëë ökö!’

31 "Apap mërë okobo nïnë nï, ‘Woda, in iut köda pï karë kïbëc, ëka jami kïbëc na an aute ködë obedo megi. 32 Ëntö onu myero ecem, ëka ebedu kï yom cwiny pïën omeru onwongo orwenyo cë kobedini onwongere, onwongo öthöö ökö ëka kobedini dong ut na kwö dökï.’ "