1 Ï nïnö mörö acël Yecu okobo both ëlübkörë nï, "Jami na mïö jïï podho ï bal ba bino jükërë, ëntö dhanö na kelo gin na mïö jïï podho ï bal bino nënö can! 2 Thwara thwara n’etweo pong rego ï ngute ebolo ködë ï nam, nakaka ën më mïö ngat mörö acël kï kin jö ni na thïnö më podho ï bal. 3 Pï manön gwökërë kenwu ï ngö na un ïtïmö!

"Ka omeru öbalö, jük ën, ëka ka ongut, tïm nïnë kïca. 4 Ka öbalö bothi wang abïrö ï nïnö acël, cë odwogo bothi wang abïrö nakun kobo nï, ‘Dong angut,’ myero ïtïm nïnë kïca."

5 Ëkwëna okobo gïnï both Rwoth nï, "Nyuth nïwa kite më mëdö yeewa."

6 Rwoth ögamö nï, "Kono iut unu kï yee na tïdï na röm kï nyig kodhi karadali, ïtwërö unu kobo nï yath ni nï, ‘Pudhiri keni, ëk ipidhiri ï nam,’ ëka twërö winyowu.

7 "Nga kï ï kinwu na twërö kobo na tic mërë na pod odwogo adwoga kï ï pwodho onyo kï kukwath nï, ‘Rai ibin kany, ibed pïny, icem’? 8 Ën ba bino kobo nïnë nï, ‘Yüb nïna cem më kothyeno, ruk böngüni më tic ëka ikel nïna cem naka ka an acemo ëka amodho. Cë in dong ibino cem kinge.’ 9 Ën bino pwöyö atic pïën ötïmö ngö na ën öcïkö nï ötïm? 10 Manön kite na un thon myero ïtïm unu ködë. Ka ïtïmö unu gin na kïbëc na myero ïtïm unu, cë ikob unu nï, ‘Wan etic na könywa ope, pïën etio gin na myero etii këkën.’ "

11 Ï woth mërë yo Jerucalem, Yecu owok ï dyere lobo më Camaria kï Galilaya. 12 Na ën onwongo tye ka dönyö ï pacö mörö, oromo k’ëdhöbü apar n’ocung gïnï kï kanya bor. 13 Ëdhöbü nonu oredo nï, "Öma Adwong, Yecu, tïm nïwa kïca!"

14 Na Yecu önënögï, okobo bothgï nï, "Cïdh unu ëk inyuth komwu both ëlamdhök." Na gïn pod ut ï yoo, komgï ödökö na leng.

15 Ngat acël kï kin-gï, ka önënö nï ëcang ökö, odwogo cen both Yecu nakun pakö Obanga kï dwön na longo. 16 Ën oryebere pïny ï tyën Yecu ëka öpwöyö pï ngö na ën ötïmö. Adhöbü ni onwongo obedo dhanö më Camaria.

17 Yecu openyo nï, "Ba onwongo acangö jö apar? Jö abungwën kono ut gïnï kwene? 18 Ba tye ngat mörö n’odwogo cen më pakö Obanga, ëntö kono arok ni këkën?" 19 Cë Yecu okobo nïnë nï, "Yaa malö, ïcïdh giri, yeeni ocangi."

20 Ï nïnö mörö acël, Eparicayo dök openyo Yecu nï, "Ker k’Obanga bino thuno awene?" Yecu ögamö nïgï nï, "Ker k’Obanga ba bino n’ënënö kï wang jö. 21 Jïï ba bino kobo nï, ‘Nën, ut kany!’ Onyo nï, ‘Ën ëca!’ Pïën Ker k’Obanga dong ut ï kinwu."

22 Cë Yecu okobo both ëlübkörë nï, "Karë tye ka bino na un ibino parö më nënö nïnö mörö acël ka Wod ka dhanö dwogo ëntö ba ibino nënö unu. 23 Jïï bino kobo niwu nï, ‘Nën, ën ëca!’ Onyo nï, ‘Nën ut kany!’ Kür ïcïdh unu ïë kür thon ilubugï. 24 Pïën na calö lüköth wïl carö polo tungcël thuno ködë naka kutung nökënë, Wod ka dhanö thon bino bedo nï kömanön ï nïnö më dwogo mërë. 25 Ëntö myero kono ölïm can na pol nakun jö më karë ni bino kwërö ën ökö.

26 "Na calö yam ötïmërë ï karë ka Noa, bino tïmërë kömanön ï karë ka Wod ka dhanö thon.✝ 27 Ï karë ka Noa, jïï onwongo cemo ëka emedho, ëcadhö cath, awope ëka anyira nyömërë gïnï naka othuno ködë ï nïnö na Noa ödönyö ködë ï yeya. Cë abwal pii opong ëka otyekogï kïbëc.

28 "Onwongo röm aröma kï karë ka Lot, jïï onwongo cemo ëka emedho, ëwïlö jami ëka ëcadhö, epuro ëka egedo. 29 Ëntö ï nïnö na Lot öya ködë ökö kï Codom, mac ëka gwëng calupa ocwe pïny nakun yaa kï ï polo, cë otyekogï ökö kïbëc.✝

30 "Bino bedo nï kömanön thon ï nïnö na Wod ka dhanö ebino nyutho ködë. 31 Ï nïnö nonu, dhanö na ut malö ï wi ödë nakun jami mërë ut ï öt, myero kür dök oidhi pïny nï ëk ebin ëkwanygï. Kömanön thon, dhanö na ut ï pwodho kür odwogi cen. 32 Po unu ï kom ngö n’ötïmërë ï kom dhakö ka Lot! 33 Ngat na mïtö larö kwö mërë bino rwenyo kwö mërë arwenya. Ëntö ngat na rwenyo kwö mërë, ën bino gwökö. 34 Akobo niwu nï ï kiwor nön, jö arïö bino buto ï kabuto acël. Ebino kwanyö ngat acël ökö ëka ngat acël dong. 35 Mon arïö bino bedo kanya acël ï rego. Ngat acël ebino kwanyö ökö ëka ngat acël dong." 36 [Jö arïö bino bedo ï pwodho, ebino kwanyö ngat acël ökö ëka ngat acël dong.]

37 Gïn openyo Yecu nï, "Rwoth, man bino tïmërë kwene?"

Ën ögamö nïgï nï, "Kanya kom n’öthöö tye ïë, acuth thon cökërë kany nön."*