1 Yecu obolo carolok n’ëlübkörë më nyutho nïgï nï myero gïn ölëgï kür edher. 2 Ën okobo nï, "Yam angöl-köp tye ï taun mörö, n’onwongo ën ba lworo Obanga kadï thon wörö dhanö. 3 Ï taun nön onwongo dha thöö mörö tye ïë. Ën obedo bino both angöl-köp nön jwijwi nakun kobo nïnë nï, ‘Ngöl nïna köp atïr ï kom ngat na an apido ködë.’ 4 Wang na pol angöl-köp nön kwërö ökö. Ëntö kinge ötwak kënë nï, ‘Kadï bed ba alworo Obanga onyo aparö pï dhanö, 5 cïthë dha thöö ni ölöla dong rwök. Abino dong ngölö-köp atïr nïnë ï kom ngat na ën pido ködë, ëk bino mërë botha jwijwi kür omoga.’ "

6 Ëka Rwoth Yecu okobo nï, "Winy unu ngö n’angöl-köp na kite mërë ba tye atïr okobo. 7 Obanga ba bino ngölö-köp atïr both jögë na ën öyërö, na kok bothe kiceng kï kiwor? Ën bino thumere na ba ötïmö gin mörö ï komgï? 8 Akobo niwu nï ën bino ngölö-köp atïr pïöpïö më könyögï. Kömanön thon ka Wod ka dhanö bino bino, ën bino nwongo yee tye both jö n’oye ën?"

9 Yecu dök obolo carolok both jö mökö na genere kën-gï nï gïn kitegï atïr nakun caö gïnï jö nökënë. 10 "Jö arïö yam öcïdhö ï lëga ï öt k’Obanga. Ngat acël obedo Aparicayo ëka ngat nökënë ca obedo acök ocoro. 11 Aparicayo ocung nakun lëgö gire kënë nï, ‘Obanga apwoi pïën an ba acal kï jö nökënë n’obedo ëyak, jö na ba genere, ëdöny ï elomi ëka thon ba acal k’acök ocoro ni. 12 An ario kec nïnö arïö ï cabït acël. Amïö thon acël më apar më jamina kïbëc na an anwongo.’

13 "Ëntö acök ocoro ocung kï cecen. Ën ba onwongo twërö tingo wangë malö ï polo ëntö odhongo körë kï cwer cwiny nakun lëgö both Obanga nï, ‘Obanga tïm nïna kïca, an abal.’

14 "Akobo niwu nï, ëcwö nön ödök tunge n’ëkwanö nï ën kite atïr ï nyim Obanga löö ëcwö nökënë ca ökö. Pï manön, ngat acëlacël na kethere kënë nï etye malö, Obanga bino dwökö ën pïny. Ëntö dhanö na mwolere kënë Obanga bino tingo ën malö."

15 Jïï onwongo tye ka kelo ëthïnö na thïthïnö both Yecu ëk oketh cïngë ï komgï. Ï karë n’ëlübkörë önënö ngö n’onwongo tye ka tïmërë, ocoko gïnï jïï nï kür ekel ëthïnö.

16 Ëntö Yecu ocwodo ëthïnö bothe cë okobo nï, "Wëk unu ëthïnö na thïthïnö obin botha, kür ijukugï, pïën jö na mwolere kamë ëthïnö, Obanga bino gamögï ï ker mërë. 17 An akobo niwu köp adyer nï ngat mörö na ba bino gamö Ker k’Obanga kamë athïn na tïtïdï, ba bino dönyö ïë."

18 Alöc k’Eyuda mörö openyo Yecu nï, "Apwony na Bër, ngö na myero an atïm ëk anwong kwö na bedo naka?"

19 Yecu ögamö nïnë nï, "Pïngö in icwoda nï abër? Ngat mörö ope na bër, na path k’Obanga këkën. 20 Ingeo Cïk k’Obanga nï, ‘Kür ïdöny ï elomi, kür ineki, kür ïkwal, kür ikob caden n’obedo twodo, wör apapni ëka ayani.’✝ "

21 Ën ögamö nï, "Agwökö cïk ni kïbëc anaka na pod an onwongo abedo awobi."

22 Ï karë na Yecu owinyo köp ni, okobo nïnë nï, "In pod irem kï gin mörö acël. Apë ëk ïcadh jamini kïbëc na in iut ködë ëka ïmïï both ëcan ëka ibino bedo kï lönyö ï polo. Cë dong ibin ïlüb köra."

23 Nyeri ka owinyo köp ni, öcakö bedo kï kumo pïën ën onwongo obedo thwön alönyö rwök. 24 Yecu obedo ka nënö ën cë okobo nï, "Tëk nïngö n’ëlönyö më dönyö ï Ker k’Obanga! 25 Adyer yot pï kïnaga më dönyö kï ï wang libira, nï löönö pï alönyö më dönyö ï Ker k’Obanga."

26 Jö n’owinyo köp ni, okobo nï, "Cë nga na dong twërö larë?"

27 Yecu ögamö nï, "Gin na ba twërë kï both dhanö, kï both Obanga twërë."

28 Cë Petero okobo both Yecu nï, "Wan ëwëkö gin na kïbëc na wan etye ködë më lübö kori."

29 Yecu okobo nï, "An akobo niwu köp adyer nï ngat mörö n’öwëkö parë, onyo cege, onyo utmego mërë, onyo enyodo mërë, onyo ëthïnë, pï Ker k’Obanga, 30 ën bino nwongo jami na kadhö manön wang na pol ï karë ni. Ëka dökï ï karë më anyim ën thon bino nwongo kwö na bedo naka."

31 Yecu otero ëlübkörë apar arïö thenge ëka okobo nïgï nï, "Onu ebino cïdhö naka yo Jerucalem ëka jami kïbëc n’edwarpïny öcöö ï kom Wod ka dhanö, bino cobere. 32 Ebino mïö ën both jö na ba obedo gïnï Eyuda. Gïn bino ngalö ën, ebino yanyö, ebino ngülö laö ï kome, ebino pwodo kï del ëka eneko ökö. 33 Ï nïnö më adek ën bino cer ökö."

34 Ëlübkör Yecu ba önïang ï köp ni thon acël. Tyën köp ni onwongo ökanërë ökö kï bothgï. Gïn ba ongeo ngö n’onwongo Yecu twakö.

35 Yecu ëka jö n’onwongo ut ködë kanya acël onwongo dong cwök kï Jeriko, athöö wang mörö onwongo obedo ï nget yoo na kwaö kwac. 36 Ëcwö ni owinyo ka jïï tye ka woth ëka openyo ngö n’onwongo tye ka tïmërë.

37 Jïï okobo nïnë nï, "Yecu më Najaret ënë tye ka wok."

38 Cë athöö wang oredo, "Yecu, Wod ka Daudi, kïca ömakï ï koma!"

39 Jö n’onwongo ötëlö anyim, öjükö ëcwö ni ëk ölïng ökö. Ëntö ömëdërë kï redo na tëk rwök, "Wod ka Daudi, kïca ömakï ï koma!"

40 Yecu öcakö cung ëka okobo nï jö mörö më kelo athöö wang nön bothe. Ï karë na dong athöö wang onwongo tye ka nyingo na cwök, Yecu openyo ën nï, 41 "Ngö na in ïmïtö nï atïm nini?"

Ën ögamö nï, "Rwoth amïtö nï wanga önën pïny!"

42 Yecu ögamö nï, "Nën pïny, yeeni olari."

43 Cücüth ëcwö ni önënö pïny ëka öcakö lübö kör Yecu nakun pakö Obanga. Na jö kïbëc önënö ngö n’ötïmërë, öcakö gïnï thon pakö Obanga.