1 Yecu onwongo tye ï öt k’Obanga ëka önënö ëlönyö ka bolo gïnï tyërgï ï adïta më tyër. 2 Ën thon önënö dha thöö mörö n’obedo acan, obolo aböla arïö ï adïta më tyër.

3 Yecu okobo nï, "An akobo niwu köp adyer nï, dha thöö ni n’obedo acan ni, obolo tyër na thwönë rwök na löö jö kïbëc. 4 Pïën jö kïbëc ögïthö lïmgï kï kom mana thwönë ënë gïn obolo, ëntö dha thöö ni kadï bed onwongo obedo acan, obolo lïm kïbëc n’onwongo ën myero ökwö ködë."

5 Ëlübkör Yecu mökö onwongo twak gïnï ï kom öt k’Obanga. Kit n’ëgërö ködë na bër kï kite na bëcö ëka tyër n’ëtyërö both Obanga. Cë Yecu okobo nï, 6 "Kï kom ngö na un itye ka nënö ni, karë bino bino, na kidi mörö acël ba bino dodere ï wi awodhe, kidi acëlacël ebino thwarö ökö pïny."

7 Ëlübkör Yecu openyo ën nï, "Apwony man bino tïmërë awene? Ëka ngö na bino nyutho nïwa nï jami ni dong cwök tïmërë?"

8 Yecu ögamö nï, "Gwökërë unu, ngat mörö kür öbwölwu. Pïën jö na pol bino bino gïnï kï nyïnga, na kobo gïnï nï, ‘An ënë Kiricito,’ ëka dök nï, ‘Karë dong onyingo cwök.’ Ëntö kür ilubugï. 9 Ka ibino winyo unu emuth më lwëny ëka arubaruba, kür ibed unu kï lworo. Jami ni myero kono ötïmërë ëntö bara nyutho nï ajiki dong cwök."

10 Cë Yecu okobo bothgï nï, "Lobe bino lwëny kï lobe nökënë, ëka ker bino lwëny kï ker nökënë. 11 Oyeyeng na rac bino yengo lobo, kec ërön ëka twoe na papath bino podho ï lobo. Ëka thon ngö na mïö lworo makö dhanö, ëka anyuth thon bino nen ï polo.

12 "Ëntö na bara jami ni kïbëc ötïmërë, ebino maköwu, ëka ebino ketho can ï komwu. Gïn bino terowu ï pido ï Cinagoga, ebino twenowu ï buc ëka ebino kelowu ï nyim rwodhi ëka ëlöc pï nyïnga. 13 Man bino mïöwu karë më kobo caden më yeewu ï koma. 14 Pï manön, mok unu thamawu nï ba ibino parö unu ngö na un ibino kobo ï pido. 15 Pïën An abino mïöwu ï twak kï ryëkö na ngat mörö n’odothowu ba twërö pyem ködë onyo kwërö ökö. 16 Enyodowu, utmegowu, wedewu ëka nyikonei bino mïöwu ï cïng langwu. Gïn bino neko jö nökënë kï kinwu. 17 Jö kïbëc bino dagöwu pïën ibedo unu ëlübköra. 18 Ëntö gin mörö na rac ba bino tïmërë ï komwu, kadï naka yer wiwu acël mörö ba bino rwenyo. 19 Ka icung unu na tëk, ibino nwongo unu kwö na bedo naka naka.

20 "Ka ïnënö unu mwony örïkö Jerucalem, cë ingee unu nï karë më këthö dong onyingo na cwök. 21 Jö na tye ï Yudea myero öngwëc gïnï ï wi kite, jö na tye taun ï Jerucalem myero öya gïnï ökö, ëka jö na tye yökö kür myero ödöny gïnï ï taun. 22 Pïën man ënë karë n’Obanga bino pwodo kï jö më Jerucalem më cobo köp kïbëc na yam ëcöö ï Cöc na Leng. 23 Mon na yeco ëka mon na dödhö ëthïnö bino nënö can ï karë nonu! Pïën can na thwönë bino podho ï lobo nön ëka akëmö k’Obanga na thwönë bino podho ï kom jö ni. 24 Jö mökö ebino nekogï kï pala abadë, ëka jö nökënë ebino terogï na calö emabuc ï lobe kïbëc. Jö na ba obedo Eyuda, bino löönö Jerucalem naka ka karë më löcgï othum.

25 "Anyuth bino nen ï kom ceng, ï kom dwe ëka ï kom cër. Jö na pol më wi lobo bino kumo nakun cwinygï podho apodha pï mor ka nam ëka kï papaka mërë. 26 Ka jami ni bino tïmërë, jïï bino rakërë pï lworo, ëka ka gïn bino parö can na bino podho ï kom lobo, pïën tëkö kïbëc na ut ï wi polo bino yengere. 27 Ï karë nön gïn bino nënö Wod ka dhanö, na bino kï ï pöl nakun tye kï tëkö ëka dheo na thwönë. 28 Ka ïnënö unu jami ni öcakö tïmërë, yaa unu malö, ïdïï cwinywu, pïën karë më laröwu dong onyingo na cwök."

29 Cë Yecu okobo carolok both ëlübkörë nï, "Nën unu yath ölam ëka kï yen nökënë. 30 Ka dong pote öcakö löth, ïnënö unu cë ingeo unu kenwu nï cwïr dong cwök. 31 Kömanön thon, ka ïnënö unu jami ni tye ka tïmërë, ngee unu nï Ker k’Obanga onyingo na cwök.

32 "An akobo niwu köp adyer, rok më karë ni ba bino poth naka ka jami ni kïbëc ötïmërë. 33 Polo ëka lobo bino thum ökö, ëntö köpna ba bino thum.

34 "Gwökërë unu, ëk kür iketh unu cwinywu ï woro më cem ëka kï mërö më köngö, ëka më parö pï kwö më lobo ni, ëk nïnö nön kür obin oumwu athura kamë akuma. 35 Pïën nïnö nön bino thuno athura ï kom jö kïbëc na bedo ï wi lobo thükül. 36 Bed unu na wangwu thwolo ï karë kïbëc, nakun ï lëgö unu Obanga ëk inwong unu tëkö më bwöth kï kom jami ni kïbëc na bino tïmërë, ëka më cung ï nyim Wod ka dhanö."

37 Nïnö kïbëc Yecu onwongo pwonyo jïï ï dyekal öt k’Obanga kiceng. Ëka kiwor ën cïdhö buto ï wi Kidi më Jeituni. 38 Nïnö kï nïnö kodiko cön, jö kïbëc onwongo bino bothe ï dyekal öt k’Obanga më winyo köp mërë.