1 Ï nïnö na lübö Cabït k’Eyuda, na pïny dong lero, mon otero gin na ngwece kur. Gïn öyübö cë öcïdhö gïnï ködë yo ka lyël. 2 Na gïn othuno kunön, onwongo ethwaro kidi më dhö lyël ökö thenge. 3 Cë ödönyö gïnï ï od lyël, ëntö ba onwongo gïnï kom Rwoth Yecu. 4 Na gïn pod uro ngö n’ötïmërë, cwö arïö n’oruko böng na ryëny onen athura cë ocung ï ngetgï. 5 Mon ni lworo ömakögï na tëk cë oryebere gïnï pïny. Cë cwö nön openyogï nï, "Pïngö ïrangö unu dhanö na kwö ï kin jö n’öthöö? 6 Ën ope kany. Dong ocer ökö! Po unu ï köp na ën okobo niwu ï karë na ën pod tye kodwu ï Galilaya 7 nï, ‘Myero ëmïï Wod ka dhanö ï cïng ëbal, ëk egur ï kor yath arïa ëka nï dök ocer ökö kinge nïnö më adek.’ "

8 Cë wi mon öcakö po nï Yecu yam okobo köp nön. 9 Na dong odwogo gïnï kï ka lyël, okobo gïnï köp ni kïbëc both ëlübkör Yecu apar acël ëka both ëlübkör Yecu nökënë kïbëc. 10 Mon nön ënë Maria më Magadala, Joana, Maria aya ka Yakobo, ëka kï jö nökënë n’okobo köp ni both ëkwëna. 11 Ëntö ëkwëna ba oyeo gïnï köp ka mon nön pïën owinyo gïnï calö köp na körë ope. 12 Ëntö, Petero öya malö ëka örïngö yo lyël. Na dong othuno kunön, ën ogungo okemo od lyël cë önënö böng lyël odong kën-gï. Ën ödök cen yo pacö, na uro ngö n’ötïmërë.

13 Ï ceng nonu, jö arïö kï ï kin ëlübkör Yecu onwongo cïdhö yo pacö n’ecwodo nï Emau. Pacö nön onwongo cwök röm kï woth më kilomita apar wie acël kï ï Jerucalem. 14 Gïn onwongo twak ï kin-gï ï kom ngö n’ötïmërë. 15 Na gïn tye ka twak ëka larö ngö n’ötïmërë kïbëc, Yecu kikome obino bothgï cë owotho ködgï. 16 Ëntö Obanga ömïögï ba ongeo Yecu.

17 Yecu openyogï nï, "Köp ngö na un ïtwakö ï wothwu ni?" Jö ni ocung gïnï ökö, na wang-gï nyutho cwer cwiny. 18 Ngat acël kï ï kin-gï n’ecwodo nï Keleopa, ögamö nïnë nï, "In keni ënë ibedo welo ï Jerucalem na ba ngeo ngö n’ötïmërë kunön ï karë ni?"

19 Yecu dök openyogï nï, "Ngö n’ötïmërë?" Gïn ögamö nïnë nï, "Gin ötïmërë ï kom Yecu më Najaret." Ën yam obedo adwarpïny n’ëthamö nï otio tango na döngö, ëka obedo apwony na tëk ï nyim Obanga kï lwak kïbëc. 20 Ëlamdhök na dito ëka ëlöcwa obino odotho ën, ëngölö thöö ï wie, ëka eguro ï kor yath arïa. 21 Ëntö wan ebedo geno nï ködë Kiricito ënë bino larö jö Icarael. Mëd ï kom manön, tin dong nïnö më adek na köp nön ötïmërë ködë.

22 "Gin nökënë ënë nï mon mökö kï ï kinwa ömïö wan ebedo kï ur. Gïn ömöl keko cön yo lyël, 23 ëntö ba onwongo gïnï kom Yecu ïë. Odwogo gïnï cen cë okobo nïwa nï ënënö gïnï emalaika n’onen bothgï na kobo nï ën Yecu kwö. 24 Cë ewodhwa mökö öcïdhö gïnï yo ka lyël, ëka onwongo nï obedo kit na mon okobo ködë, ëntö ba önënö gïnï kom Yecu."

25 Cë Yecu okobo nïgï nï, "Kite na un ïmïng ködë, ëka kite na ba ïnïang unu ködë ï yeeno köp na yam edwarpïny okobo! 26 Ba onwongo ëyübö nï myero Meciya ölïm can ëk dong onwong dheo mërë?" 27 Cë okobo nïgï köp kïbëc n’ëcöö ï Cöc na Leng ï buk ka Muca ëka më k’edwarpïny kïbëc.

28 Na gïn dong cwök kï pacö n’onwongo gïn cïdhö yo ïë, Yecu ötïmërë calö pod cïdhö anyim. 29 Ëntö gïn odweko ën, "Bed bothwa ï kiwor ni, pïën pïny dong cwök yutho."

Cë Yecu öcïdhö ï öt më bedo ködgï. 30 Na dong obedo pïny më cem ködgï, Yecu ökwanyö ogati, öpwöyö Obanga, ötürö ïë cë öcakö mïögï. 31 Cücüth wang-gï öyabërë ëka ongeo gïnï ën. Ï caa nön Yecu orwenyo ökö kï ï wang-gï. 32 Cë gïn öcakö twak kën-gï nï, "Cwiny onu anaka wono ba obedo pupuka, ï karë na ën twak kod onu ï wangayoo ëka okobo nï onu gin ëcöö ï Cöc na Leng!"

33 Gïn öya ï caa nön cücüth cë ödök gïnï yo Jerucalem. Onwongo gïnï ëlübkörë apar acël thon kï jö na ut ködgï kanya acël. 34 Gïn okobo both jö arïö nön nï, "Tye adyer! Rwoth dong ocer ëka onen both Cimon." 35 Cë jö arïö ni okobo ngö n’ötïmërë ï wangayoo Emau, ëka kit na gïn engeo kï Yecu ï caa na ën ötürö k’ogati.

36 Ëlübkör Yecu onwongo pod tye ka twakö köp ni, Yecu kikome ocung ï kin-gï cë okobo nïgï nï, "Kuc obed kodwu!" 37 Gïn obedo na lwor rwök pïën öthamö nï ködë ënënö gïnï jwök. 38 Cë Yecu okobo nïgï nï, "Pïngö ilwor unu, ëka pïngö ipenyere unu kï ï cwinywu k’adyer dong acer? 39 Nën unu cïnga ëka tyëna. Ëk ïnën unu nï an ënönön! Mula unu ëk ïnën unu ka pathï an adyer, pïën jwök ba ute kï kome ëka kï cogo kamë an."

40 Ën okobo köp ni, cë onyutho nïgï cïngë kï tyënë. 41 Gïn ocung kunön na bara oyee gïnï nï köp nön adyer. Cë Yecu openyogï nï, "Itye unu kï gin mörö kany më acama?" 42 Gïn ömïö ën rëc n’etedo, 43 cë ën ögamö ëka öcamö ï nyimgï. 44 Cë ën okobo nïgï nï, "Man ënë köp na yam akobo niwu n’onwongo pod atye kodwu. Gin na kïbëc na yam ëcöö ï koma ï Cïk ka Muca, ï buke k’edwarpïny ëka ï Jabuli myero ocobere."

45 Cë Yecu öyabö thamagï ëk önïang gïnï ï Cöc na Leng. 46 Ën okobo nïgï nï, "Man ënë gin n’ëcöö nï Meciya bino nwongo can, ëka bino cer kï ï kin jö n’öthöö ï nïnö më adek. 47 Cë kï nyïngë, jïï bino pwonyo ï lobe kïbëc nï, ‘Ngut unu pï balwu ëk Obanga ötïm niwu kïca.’ Man bino cakërë kï ï Jerucalem. 48 Un ecaden më gin n’ötïmërë kïbëc. 49 An abino oro niwu Tipo Naleng na yam Apapna öcïkö. Ëntö bed unu kono ï pacö Jerucalem naka wang n’Obanga ömïöwu tëkö na yaa kï ï polo."

50 Cë Yecu oterogï yökö kï ï Jerucalem kanya cwök kï pacö Betania. Ën otingo cïngë malö cë ölamö gum ï komgï. 51 Na pod lamö gum ï komgï, Yecu öya ökö kï bothgï cë etingo ën malö ï polo. 52 Ëlübkörë öcakö wörö gïnï ën cë ödök gïnï yo Jerucalem kï yom cwiny na dit rwök. 53 Gïn onwongo bedo ï öt k’Obanga nïnö kï nïnö, na pakö gïnï Obanga.