1 Onwongo obedo mwaka më apar abic më löc ka Cija Tiberio ï ker më Roma. Ï karë nön, Pontio Pilato onwongo obedo alöc më Yudea. Erode onwongo obedo alöc më Galilaya, ëka ömïn mërë Pilipo onwongo obedo alöc më Ituria ëka alöc më Tarakoniti. Ëka Lucania onwongo obedo alöc më lobo Abilene. 2 Anac ëka Kayapa onwongo obedo gïnï ëlamdhök na dito. Ï karë nonu, Jon Abatica wod ka Jakaria, owinyo köp k’Obanga n’onwongo ën ut ï thim. 3 Ën owotho ï lobe kïbëc n’örïkö kulo Jordan, nakun tïtö both jïï nï myero ongut gïnï kï kom balgï ëka ebaticagï, ëk Obanga ötïm nïgï kïca. 4 Kite n’ëcöö ködë ï buk k’adwarpïny Icaya nï,

"Dwön dhanö mörö tye ka redo ï thim nï,

‘Yüb unu yoo pï Rwoth,

mïï unu yoo ocung atïr nïnë.

5 Ora kïbëc myero epir ökö,

kite kïbëc myero erwob ödök pïny na röm.

Yodhi n’ogom mene myero ëmïï ocung atïr.

Yodhi na gwaü bino dökö na pwöth.

6 Cë jö kïbëc bino nënö lar k’Obanga.’ "✝

7 Jon Abatica okobo nï lwak n’obino bothe ëk ebaticagï nï, "Un jö na reco calö ëthïn ororo! Nga n’okobo niwu nï ïrïng unu ökö kï ï akëmö k’Obanga na bino ni? 8 Kitewu myero onyuth nï inguto unu dong ökö kï kom balwu. Kür dök ïcak unu kobo ï kinwu kenwu nï, ‘Wan ëthïnö më dhogola k’Abraam.’ Ëk akob niwu nï kï ï kom kite ni, Obanga römö yübö ëthïnö pï Abraam. 9 Ngölö-köp k’Obanga obino ökö, na calö ngat n’ömakö atong më tongo yath. Yath na ba nyakö nyige na bër ebino tongo ökö pïny, cë ebolo ï mac."

10 Lwak openyo Jon nï, "Ëtïm ngö dong?"

11 Jon Abatica ögamö nïgï nï, "Ngat na ute kï böng arïö myero opok both ngat n’ope ködë, ëka ngat na ute kï cem myero ötïm mene kömanön."

12 Ëcök ocoro* mene obino ëk ebaticagï. Gïn openyo ën nï, "Apwony, wan myero ëtïm ngö?"

13 Ën okobo nïgï nï, "Kür ïcök unu ocoro na kadhö wel n’ëcïköwu ködë." 14 Acikari mökö öcakö penyo ën nï, "Cë wan kono ëtïm ngö?"

Ën okobo nïgï nï, "Kür ïma unu cïlïng kï both dhanö mörö tëtëk, ëka kür idoth unu dhanö mörö twodo twodo. Ëntö yeng unu kï cülwu."

15 Lwak onwongo kürö kï gen, na gïn kïbëc onwongo thamö kï ï cwinygï nï ködë ba Jon ënë obedo Meciya. 16 Cë Jon Abatica ögamö nï, "An abaticawu kï pii, ëntö ngat mörö na dit na löa tye ka bino, na an ba apora më bedo atic mërë, ëka më gönyö thöl wörë. Ën bino baticawu kï Tipo Naleng ëka mac. 17 Ën bino poko jö na kitegï atïr kï kom jö na reco, na calö dhanö na pyëdhö bël k’odheru, ën cökö bël cë ketho ï od dërö. Ëntö ën bino wangö cüngë kï mac na ba bino nekere."

18 Jon Abatica okobo köp na bër n’eoro ën ködë kï köp nökënë na pol. Ën öcükö cwiny lwak më wëkö bal, ëka opwonyogï k’Emuth na Bër k’Obanga. 19 Ëntö Jon dökï öjükö rwoth Erode pï bedo kï Kerodia dhakö ka Pilipo n’obedo ömïn Erode, ëka pï ngö na reco kïbëc na ën obedo tïmö. 20 Cë rwoth Erode dök ömëdö bal nökënë dökï na rac më tweo Jon ï buc.

21 Na Jon dong obatica jö kïbëc, Yecu thon ebatica. Ï caa na Yecu lëgö, polo öyabërë 22 ëka Tipo Naleng obino kï malö ï cal k’amam cë opye ï kome. Cë dwön Obanga owinyere kï ï polo na kobo nï, "In ënë Woda na an amarö, na cwinya yom ï kome."

23 Yecu onwongo dong ute kï mwaka pyer adek ï karë na ën cakö tic mërë. Jïï onwongo thamö nï ën obedo wod ka Yocepu.

Yocepu ni onwongo obedo wod ka Eli.

24 Eli onwongo obedo wod ka Mathat.

Mathat onwongo obedo wod ka Lebi.

Lebi onwongo obedo wod ka Melki.

Melki onwongo obedo wod ka Janai.

Janai onwongo obedo wod ka Yocepu.

25 Yocepu wod ka Matathia,

Matathia wod k’Amoc,

Amoc onwongo obedo wod ka Nakum.

Nakum onwongo obedo wod ka Eceli.

Eceli onwongo obedo wod ka Nagai.

26 Nagai onwongo obedo wod ka Math,

Math onwongo obedo wod ka Matathia

Matathia onwongo obedo wod ka Cemein

Cemein onwongo obedo wod ka Yocek,

Yocek onwongo obedo wod ka Yoda.

27 Yoda onwongo obedo wod ka Joanan.

Joanan onwongo obedo wod ka Reca.

Reca onwongo obedo wod ka Jerubabel.

Jerubabel onwongo obedo wod ka Cealtiel.

Cealtiel onwongo obedo wod ka Neri.

28 Neri onwongo obedo wod ka Melki.

Melki onwongo obedo wod k’Adi.

Adi onwongo obedo wod ka Kocam.

Kocam onwongo obedo wod ka Elemadam.

Elemadam onwongo obedo wod ka Er.

29 Er onwongo obedo wod ka Yocua.

Yocua onwongo obedo wod ka Elieja.

Elieja onwongo obedo wod ka Yorim.

Yorim onwongo obedo wod ka Mathat.

Mathat onwongo obedo wod ka Lebi.

30 Lebi onwongo obedo wod ka Cimeon.

Cimeon onwongo obedo wod ka Yuda.

Yuda onwongo obedo wod ka Yocepu.

Yocepu onwongo obedo wod ka Yonam.

Yonam onwongo obedo wod ka Eliakim.

31 Eliakim onwongo obedo wod ka Melea.

Melea onwongo obedo wod ka Mena.

Mena onwongo obedo wod ka Matatha.

Matatha onwongo obedo wod ka Natan.

Natan onwongo obedo wod ka Daudi.

32 Daudi onwongo obedo wod ka Jece.

Jece onwongo obedo wod k’Obed.

Obed onwongo obedo wod ka Boaj.

Boaj onwongo obedo wod ka Calomon.

Calomon onwongo obedo wod ka Nacon.

33 Nacon onwongo obedo wod k’Aminadab.

Aminadab onwongo obedo wod k’Adimin.

Adimin onwongo obedo wod k’Arni.

Arni onwongo obedo wod ka Kejeron

Kejeron onwongo obedo wod ka Perej.

Perej onwongo obedo wod ka Yuda.

34 Yuda onwongo obedo wod ka Jakob.

Jakob onwongo obedo wod ka Icaka.

Icaka onwongo obedo wod k’Abraam.

Abraam onwongo obedo wod ka Tera.

Tera onwongo obedo wod ka Nakor.

35 Nakor onwongo obedo wod ka Cerug.

Cerug onwongo obedo wod ka Reu.

Reu onwongo obedo wod ka Peleg.

Peleg onwongo obedo wod ka Eber.

Eber onwongo obedo wod ka Cela.

36 Cela onwongo obedo wod ka Kainan.

Kainan onwongo obedo wod k’Apacad.

Apacad onwongo obedo wod ka Cem.

Cem onwongo obedo wod ka Noa.

Noa onwongo obedo wod ka Lamek.

37 Lamek onwongo obedo wod ka Methucela.

Methucela onwongo obedo wod ka Enok.

Enok onwongo obedo wod ka Jared.

Jared onwongo obedo wod ka Maalalel.

Maalalel onwongo obedo wod ka Kainan.

38 Kainan onwongo obedo wod ka Enoc.

Enoc onwongo obedo wod ka Ceth.

Ceth onwongo obedo wod k’Adam.

Adam onwongo obedo wod k’Obanga.