Lucas 5

Tango më makö rëc

1 Ï nïnö mörö acël na Yecu ocung ï dhö nam më Genecaret,*5:1 Nam më Genecaret obedo nyïng nökënë më Nam më Galilaya. jïï opong na rïdërë gïnï më winyo köp k’Obanga. 2 Yecu önënö yeya arïö ï lak kulo n’ëmak rëc öwëkö kunön ëka onwongo lwökö böögï. 3 Ën ödönyö ï yeya acël, man onwongo obedo më ka Cimon, ëka okobo nïnë më cwarö yeya ökö na nönök kï lak kulo. Cë Yecu obedo ï yeya ëka opwonyo lwak.

4 Na dong otyeko pwony mërë, ën okobo nï Cimon nï, "Ter yeyani ï dyere nam kanya thuth ëk ibol unu bööwu ï pii cë ïmak unu rëc." 5 Cimon ögamö nï, "Rwoth, wan etio na tëk wor kia ëka ba ëmakö gin mörö. Ëntö kite na in ikobo ködë, abino bolo böö rëcna."

6 Na gïn dong ötïmö kömanön, gïn ömakö rëc na pol naka böögï öcakö yëc. 7 Cë dong gïn ocwodo ewodhgï na ute ï yeya nökënë nï ëk obin ökönygï. Ï karë n’obino gïnï, opongo gïnï yeya arïö kï rëc ökö ëka yeya öcakö lüny.

8 Ï karë na Cimon Petero önënö gin nön, orumo cöngë pïny ï tyën Yecu ëka okobo nï, "Rwoth cïdh ökö kï botha, pïën an abedo abal!" 9 Petero ëka ewodhe ouro gïnï lwak rëc na gïn ëmakö. 10 Ewodhe, Yakobo ëka Jon, awope ka Jebedayo, ouro gïnï thon. Ëka Yecu okobo nï Cimon nï, "Kür ibed kï lworo, cakërë ï caa ni cïdhö ködë anyim, ibino bedo amak jïï nakaka makö rëc." 11 Gïn öywaö yeyagï ï lak kulo, cë gïn öjalö jami kïbëc ëka ölübö gïnï kör Yecu.