1 Ï nïnö mörö acël na Yecu ocung ï dhö nam më Genecaret,* jïï opong na rïdërë gïnï më winyo köp k’Obanga. 2 Yecu önënö yeya arïö ï lak kulo n’ëmak rëc öwëkö kunön ëka onwongo lwökö böögï. 3 Ën ödönyö ï yeya acël, man onwongo obedo më ka Cimon, ëka okobo nïnë më cwarö yeya ökö na nönök kï lak kulo. Cë Yecu obedo ï yeya ëka opwonyo lwak.

4 Na dong otyeko pwony mërë, ën okobo nï Cimon nï, "Ter yeyani ï dyere nam kanya thuth ëk ibol unu bööwu ï pii cë ïmak unu rëc." 5 Cimon ögamö nï, "Rwoth, wan etio na tëk wor kia ëka ba ëmakö gin mörö. Ëntö kite na in ikobo ködë, abino bolo böö rëcna."

6 Na gïn dong ötïmö kömanön, gïn ömakö rëc na pol naka böögï öcakö yëc. 7 Cë dong gïn ocwodo ewodhgï na ute ï yeya nökënë nï ëk obin ökönygï. Ï karë n’obino gïnï, opongo gïnï yeya arïö kï rëc ökö ëka yeya öcakö lüny.

8 Ï karë na Cimon Petero önënö gin nön, orumo cöngë pïny ï tyën Yecu ëka okobo nï, "Rwoth cïdh ökö kï botha, pïën an abedo abal!" 9 Petero ëka ewodhe ouro gïnï lwak rëc na gïn ëmakö. 10 Ewodhe, Yakobo ëka Jon, awope ka Jebedayo, ouro gïnï thon. Ëka Yecu okobo nï Cimon nï, "Kür ibed kï lworo, cakërë ï caa ni cïdhö ködë anyim, ibino bedo amak jïï nakaka makö rëc." 11 Gïn öywaö yeyagï ï lak kulo, cë gïn öjalö jami kïbëc ëka ölübö gïnï kör Yecu.

12 Ï karë na Yecu onwongo tye ï pacö mörö acël, ëcwö mörö obino na ut kï two dhöbü.* Na ën önënö Yecu, orumo cöngë pïny cë okulo wangë ëka ökwaö Yecu nï, "Rwoth, ka ïmïtö, canga ëk abed na leng."

13 Yecu öryëö cïngë ëka ogudo ëcwö nön, cë okobo nï, "An amïtö, komi dong obed na leng!" Cücüth two dhöbü öcang ökö. 14 Cë Yecu okobo nïnë nï, "Kür ikob nï ngat mörö, ëntö cïdh inyuthiri both alamdhök. Cë ïmïï tyër na Muca öcïkö ëk jïï ongee nï in dong ecangi ökö." 15 Ëntö emuth na makö kome ökëë örömö lobo, ëka n’ömïö jïï na pol rwök obino më winyo köp mërë ëk ëcang-gï kï ï kom twoegï. 16 Yecu ï karë mökö yaa cïdhö ökö yo kanya lik ëka lëgö.

17 Ï nïnö mörö acël Yecu onwongo pwonyo jïï. Eparicayo ëka epwony cïk mökö onwongo obino gïnï kï ï peci na papath më Galilaya, Yudea ëka Jerucalem, onwongo ute gïnï kunön. Tëkö ka Rwoth onwongo ut ködë më cangö etwoe. 18 Cwö mökö obino n’otingo gïnï dhanö na two akwea kom ömakö. Gïn ötëmö më tero ën ï öt ëk epyel ï nyim Yecu. 19 Ba onwongo gïnï yoo më tero akome okwe ï nyim Yecu pïën lwak onwongo opong rwök. Cë gïn öïdhö malö ëka otuco gïnï wi öt. Gïn olwao akome okwe na ut ï ökëka pïny ï kin lwak naka ecibo ï nyim Yecu.

20 Na Yecu önënö yeegï, ën okobo n’akome okwe nï, "Okona, dong atïmö nini kïca ï balni." 21 Eparicayo ëka epwony cïk ka Muca öcakö penyere gïnï kën-gï nï, "Ën thamö nï ënë nga na twakö köp më yanyö Obanga? Obanga këkën ënë twërö wëkö bal." 22 Yecu ongeo ngö n’onwongo gïn thamö ëka openyogï nï, "Pïngö ï thamö unu köp ni kï ï cwinywu? 23 Mënë ënë yot: Më kobo nï, ‘Balni ëtïmö kïca ökö ïë,’ onyo më kobo nï, ‘Yaa malö ïcïdhï’? 24 Ëntö ëk ingee unu nï Wod ka Dhanö✝ ut kï twër ï wi lobo më wëkö bal." Cë Yecu okobo both dhanö na kome okwe nï, "An akobo nini, yaa malö, kwany ökëkani ëka ïcïdh yo pacö." 25 Cücüth öya malö ï nyimgï, ökwanyö ökëka n’onwongo ën obuto ïë cë ödök yo pacö na pakö Obanga. 26 Lwak kïbëc ouro ëka öpakö gïnï Obanga. Gïn opong kï lworo na kobo gïnï nï, "Ënënö gin më aura tin."

27 Kinge manön, Yecu odonyo yökö cë önënö acök ocoro n’ecwodo nï Lebi obedo ï od cökö ocoro mërë. Yecu okobo nïnë nï, "Lüb köra." 28 Lebi öya malö, öwëkö jami kïbëc, ëka ölübö Yecu.

29 Ëka Lebi öyübö cem na thwönë ï parë nï Yecu na calö welo mërë më awöra. Ï kin wele onwongo ute ëcök ocoro na pol kï jö nökënë. 30 Man ömïö Eparicayo nökënë ëka epwony cïk ka Muca öngüngüta gïnï ï kom ëlübkör Yecu nakun penyogï nï, "Pïngö icemo ëka imedho unu k’ëcök ocoro n’obedo ëbal?"

31 Yecu ögamö nïgï nï, "Pathï Jö na komgï yot ënë mïtö daktar, ëntö etwoe. 32 An ba abino më cwodo jö na kitegï atïr, ëntö ëbal ëk ongut gïnï."

33 Jö nön okobo both Yecu nï, "Ëlübkör Jon ëka më Eparicayo onwongo ut gïnï kï thëkwarö më rio kec karë kï karë ëka lëgö gïnï thon. Pïngö ëlübkori cemo ëka medho gïnï nïnö kïbëc?" 34 Yecu ögamö nïgï nï, "Wele k’anyom twërö rio kec n’anyom tye ködgï kanya acël? 35 Ëntö karë bino thuno n’ebino kwanyö anyom ökö kï bothgï cë gïn dong bino rio kec ï nïnö nön." 36 Dök obolo nïgï carolok nï, "Ba ut ngat mörö na yëcö opeke böngü na nyen më dapö böngü na cön na ën ruko. Ka ötïmö kömanön cë bino yëcö böngü na ën ruko na nyen ökö. Dök opeke nï kom böngü na nyen ba pore kï man otii. 37 Dök ba ut ngat mörö na pïkö köngö ölök na nyen ï ocwe na cön, ka öpïkö, cë köngö ölök bino yëcö ocwe ökö, ocwe thon bal ökö. 38 Thwara köngö ölök na nyen ëpïk ï ocwe na nyen. 39 Ba tye ngat mörö na ka ömadhö köngö ölök na cön cë dök mïtö man anyen thon, pïën bino kobo nï, ‘Thwara thwara man na cön.’ "