1 Ï nïnö mörö acël më Cabït* k’Eyuda, Yecu onwongo wok ï pwodho bël. Ëlübkörë öcakö rïdhö with bël ëka öngïnyö gïnï ï cïng-gï, cë omwodo gïnï. 2 Ëntö Eparicayo mökö openyo nï, "Pïngö un ïrïdhö with bël na cïk ökwërö nï kür etii ï ceng Cabït k’Eyuda?"

3 Yecu ögamö nïgï nï, "Un ba ïkwanö kï ï Cöc na Leng ngö na Daudi ötïmö ï karë na kec oneko ën k’ewodhe?✝ 4 Ën ödönyö ï öt k’Obanga, ëka ökwanyö ogati n’ëtyërö both Obanga cë öcamö, na yam cïk ökwërö nï dhanö kür öcam kono ka ëlamdhök këkën. Ëka ën thon ömïö both ewodhe." 5 Cë Yecu okobo nïgï nï, "Wod ka dhanö ënë Rwoth më Cabït."

6 Ï Cabït k’Eyuda nökënë Yecu ödönyö ï cinagoga ëka onwongo pwonyo. Ëcwö mörö onwongo ute kunön na badë okwe ökö. 7 Eparicayo ëka epwony cïk onwongo kürö gïnï më nënö ka Yecu cangö ëcwö nön ï ceng Cabït ëk enwong gïnï yoo më dotho ën. 8 Ëntö Yecu ongeo ngö n’onwongo gïn thamö ëka okobo n’ëcwö na badë okwe nï, "Yaa malö ëka icung ï nyim jö kïbëc." Ën öya malö ëka ocung.

9 Cë Yecu okobo bothgï nï, "Apenyowu nï, ï ceng Cabït cïk yee nï ëtïm gin mörö na bër onyo gin mörö na rac ïë, ëlar kwö onyo enek aneka?"

10 Ën ongongolo wangë ï kin-gï kïbëc, cë okobo both ëcwö nön nï, "Ryë badi." Ën öryëö badë, ëka badë öcang ökö. 11 Ëntö akëmö ömakögï na tëk, cë öyübö gïnï köp ï kin-gï kën-gï, ngö na myero ëtïm ï kom Yecu.

12 Ï karë nonu, Yecu öcïdhö ï wi kidi më lëga ïë ëka ölëgö both Obanga wor kia. 13 Na pïny dong oru, ocwodo ëlübkörë bothe ëka öyërö jö apar arïö kï kin-gï cë ömïögï nyïng nï ëkwëna. Nyïng-gï ene: 14 Cimon (na ën öcakö nyïngë nï Petero), ëka ömïn mërë Anderiya, Yakobo ëka Jon, Pilipo ëka Batulumayo, 15 Matayo ëka Tomaci, Yakobo wod k’Alipayo, Cimon n’ecwodo nï dhanö na mïtö löckën,* 16 Yuda wod ka Yakobo, ëka Yuda Ikariot, na yam oketho örörö ï kom Yecu.

17 Yecu obino pïny kï ï wi kidi kanya acël k’ëlübkörë. Na dong othuno ï ngöm kany opire cë ocung. Kï kunön ëlübkörë na pol ëka kï jö nökënë n’obino gïnï kï ï Yudea, kï ï pacö më Jerucalem, ëka kï ï dhö nam më Turo ëka Cidon ögürë gïnï kanya acël. 18 Gïn onwongo obino më winyo pwony mërë ëk ëcang-gï kï ï kom twoegï, naka thon kï jö na cen na reco oyelogï, obino gïnï ëka ëcangögï. 19 Jö nön kïbëc ötëmö më gudo ën, pïën tëkö më cangö onwongo yaa kï ï kome ëka cangögï kïbëc.

20 Yecu ölökërë önënö ëlübkörë cë okobo bothgï nï,

"Komwu gum un ëcan,

pïën Ker k’Obanga obedo mewu.

21 Komwu gum un jö na kec onekowu kobedini,

pïën ibino yeng unu.

Komwu gum un jö na kok kobedini,

pïën ibino nyërö unu. 22 Komwu gum ka jïï dagöwu, ka ëkwëdöwu ëka ëyanyöwu, ëbalö nyïngwu na rac, pï Wod ka dhanö.

23 "Lakërë unu ï nïnö nonu, nakun ipye unu kï yom cwiny, pïën cül n’ebino mïöwu më pwöc thwönë ï wi polo. Ëka ipo unu nï kweregï yam ötïmö edwarpïny kömanön.

24 "Ëntö ibino nënö unu can un ëlönyö,

pïën ityeko unu nwongo gin na kweo cwinywu ökö.

25 Can ï komwu un jö na yeng kobedini,

pïën kec bino nekowu.

Ibino nënö unu can, un nï nyërö kobedini,

pïën ibino kumo unu kï koko.

26 Ibino nënö unu can, ka jö kïbëc pwöyöwu,

pïën kweregï yam öpwöyö gïnï edwarpïny n’etwodo kömanön.

27 "Ëntö akobo niwu un jö nï winya, nï mar unu langwu, tïm unu gin na bër both jö na dagöwu. 28 Lam unu gum ï kom jö na lamöwu, lëg unu pï jö na tïmö gin na rac bothwu. 29 Ka ngat mörö odhongo lemi acël, lök nïnë kucël thon ëk odhong. Ka ngat mörö mïtö catïni, mïë thon kotini. 30 Mïï both jö kïbëc na kwai gïnï ëka ka ngat mörö omai jamini, kür dök ï peny ëk odwongi nini. 31 Kite na un ïmïtö nï jïï ötïm niwu ködë, un thon tïm unu nïgï kömanön.

32 "Ka ïmarö unu jö na maröwu, pwöc mënë nï nwongo unu kï ïë? Naka thon ëbal marö jö na marögï. 33 Ëka ka ïtïmö unu gin na bër both jö na tïmö gin na bër bothwu, pwöc mënë nï nwongo unu kï ïë? Naka thon ëbal tïmö kömanön. 34 Ëka ka ïmïö unu banya both jö na dwökö niwu, pwöc mënë nï nwongo unu kï ïë? Naka thon ëbal mïö banya both ëbal ewodhgï ëk ëcülgï na röm. 35 Ëntö mar unu langwu, tïm unu gin na bër nïgï ëka mïï unu nïgï den na ba igeno unu nï ebino cülö niwu dökï. Cë cül na mewu bino bedo na thwönë, ëka ibino bedo unu ëthïn ka Ngat na Malö Rwök pïën ën bër both jö na ba pwöyö ën, ëka both jö na reco. 36 Bed unu kï kïca na calö Apapwu obedo akïca.

37 "Kür ïngöl unu köp both jö nökënë, ëka un thon ba ebino ngölö niwu köp. Kür ïngöl unu köp ölöö jö nökënë, ëka un thon ba ebino ngölö köp lööwu. Tïm unu kïca both jö nökënë, ëka un thon ebino tïmö niwu kïca. 38 Mïï unu both jö nökënë ëka un thon ebino mïöwu. Ëka jami n’ebino mïöwu ebino pimo niwu na bër. Gin n’epimo ködë na bër, n’eyengo, ëka ëdïlö na öny aönya, ebino mïöni. Gin na un ipimo ködë, ënë thon ebino pimo niwu ködë."

39 Yecu dök okobo nïgï carolok nï, "Athöö wang twërö pëö athöö wang awodhe? Gïn arïö kïbëc ba bino podho ökö ï bur? 40 Athïn kwan ba bedo na dit löö apwony mërë, ëntö dhanö kïbëc ka dong epwonyo na bër dökö na calö apwony mërë.

41 "Pïngö ïnënö cüng kal kï ï wang omeru, ëka ba ïnënö dul yath na tye ï wangi? 42 In ïtwërö kobo n’omeru nï, ‘Ömëra, ëk akwany cüng kal ökö kï ï wangi,’ nakun in kikomi ba ïnënö dul yath na ut ï wangi? In atwodo, cak kono kwanyö dul yath na ut ï wangi ökö, ëka dong ïnën pïny na bër më kwanyö cüng kal na ute ï wang omeru.

43 "Yath na bër ba twërö nyakö nyige na rac ëka yath na rac ba twërö nyakö nyige na bër. 44 Yath acëlacël engeo kï nyige. Dhanö ba püdö ölam kï kom öküdhö acar onyo nyig ölök kï kom öcöcök. 45 Dhanö na bër twakö gin na bër kï kin jami na bëcö na ën ökanö ï cwinye. Dhanö na rac twakö gin na rac kï kin jami na reco na ën ökanö ï cwinye. Pïën köp na dhanö kobo yaa kï kom ngö n’opong ï cwinye.

46 "Pïngö icwoda unu nï, ‘Rwoth, Rwoth,’ ëka ba ïtïmö unu gin na an akobo nï ïtïm unu? 47 Dhanö acëlacël na bino botha, cë winyo köp na mëga, ëka ketho ï tic, abino nyuthiwu ngat na ën cal ködë.

48 "Ën cal kï dhanö n’ögërö öt n’ökünyö na thuth ëka ocibo thërë ï kom lëla. Ëka ka koth ocwe na thwönë cë pii opong, kïlëlë ömöl kï tëkö ï kom öt nonu. Ëntö ba oyengo pïën onwongo ëgërö na bër. 49 Ëntö ngat na winyo köpna ëka ba ketho ï tic, röm aröma kï dhanö n’ögërö öt ï kom ngöm abonge acaki thërë. Ka kulo opong cë ömöl kï tëkö ëka öcörö öt nön, öt rëdhërë pïny nï ruthukuny."