Marcos 3

Ëcwö na badë okwe

1 Ï nïnö mörö acël më ceng Cabït k’Eyuda, Yecu dökï ödönyö ï cinagoga ëka ëcwö na badë okwe onwongo ut kunön. 2 Jö mökö onwongo ut gïnï kunön më nënö ka Yecu twërö cangö ëcwö ni ï ceng Cabït ëk enwong gïnï yoo më dotho ën. 3 Yecu okobo both ëcwö na badë okwe nï, "Yaa malö ëk icung ï nyim jïï."

4 Cë Yecu okobo bothgï nï, "Cïk yeo ï ceng Cabït nï ëtïm gin mörö na bër onyo na rac, ëlar kwö onyo enek ökö?" Ëntö gïn ölïng alïnga. 5 Ën önënögï k’akëmö ëka cwinye ocwer pï nwang cwinygï. Yecu okobo n’ëcwö nï, "Ryë badi." Ën öryëö badë cë öcang ökö. 6 Cë Eparicayo odonyo gïnï yökö cücüth më yübö köp kï jö na cwakö Erode kite na myero enek kï Yecu.

Lwak ölübö Yecu

7 Yecu k’ëlübkörë öya cë öcïdhö gïnï yo dhö nam, ëka lwak na pol n’öya kï ï lobo më Galilaya, Yudea, 8 Jerucalem, Idemea, kukïdë më kulo Jordan, ëka kï ï lobo n’örïkö Turo kï Cidon ölübö gïnï körë. Ï karë na lwak na pol owinyo gïnï gin na kïbëc na ën obedo ka tïmö, gïn obino bothe. 9 Yecu okobo n’ëlübkörë nï öyüb gïnï yeya nïnë, ëk kür lwak ödïë. 10 Ën onwongo öcangö jö na pol ï nïnö nön, cë jö kïbëc na two onwongo dïrë gïnï më gudo ën. 11 Ka tipo na reco önënö Yecu, podho gïnï pïny ï nyime ëka kok gïnï nï, "In ibedo Wod k’Obanga." 12 Ëntö Yecu öcïkö tipo na reco nï kür okob gïnï nï ngat mörö nga na ën ebedo.

Yecu öyërö ëkwëna apar arïö

13 Kinge manön Yecu öcïdhö ï wi kidi ëka ocwodo jö n’onwongo ën mïtö woth ködgï ëka obino gïnï bothe. 14 Ën öyërö jö apar arïö ëka ocwodogï nï ëkwëna ëk owoth ködë kanya acël, ëka eorgï më cïdhö tïtö köp k’Obanga, 15 ëka më bedo kï twër më ryëmö cene. 16 Man ënë jö apar arïö na ën öyërö: Cimon (na ën öcakö nyïngë nï Petero), 17 Yakobo ëka ömïn mërë Jon, awope ka Jebedayo, (ëntö Yecu ömïögï nyïng nï, Boanergi, na tyën köp mërë nï, "Jö na mor kamë köth.") 18 Anderiya, Pilipo, Batulumayo, Matayo, Tomaci, Yakobo wod k’Alipayo, Tadeo, Cimon (dhanö na mïtö löckën) 19 ëka Yuda Ikariot n’oketho örörö ï kom Yecu.

Yecu ëka Belijebul

20 Cë Yecu ödönyö ï öt ëka lwak na pol obino örïkö ën dökï. Ën ëka ëlübkörë onwongo ba twërö gïnï nwongo caa më cem. 21 Ï karë na wede mërë owinyo ngö n’ötïmërë, cë obino gïnï më makö Yecu pïën gïn öthamö nï, "Ën opo ökö."

22 Epwony cïk ka Muca mökö öya kï ï Jerucalem na kobo gïnï nï, "Ën ut kï Belijebul, adwong ka cene. Kanya ën nwongo tëkö kï ïë më ryëmö cene."

23 Cë Yecu ocwodogï ëka ötwak ködgï kï carolok nï, "Catan twërö ryëmö Catan nïngö? 24 Ka ker opokere ïë arïö, ker nön ba twërö cung. 25 Ëka ka jö më öt opokere ïë arïö, jö më öt nön ba twërö cung. 26 Ëka ka Catan opokere cë ölwënyö ï kome kënë, ën ba twërö cung, ajiki mërë nwongo dong othuno. 27 Ngat mörö ope na twërö dönyö ï öt ka ngat na tëk më yakö jami mërë, thwara ka ën öcakö tweno dhanö na tëk ni ökö ëka dong cakö yakö jami kï ï ödë. 28 An akobo niwu köp adyer nï, bal kïbëc na dhanö tïmö ëka ayeny n’ëyanyö k’Obanga ërömö tïmö kïca, 29 ëntö ngat mörö na yanyö Tipo Naleng ba ebino tïmö nïnë kïca pïën nwongo ötïmö bal na bedo na twal." 30 Yecu okobo nïgï pïën gïn onwongo tye ka kobo nï, "Ën ut kï tipo na rac."

Aya ka Yecu ëka utmego mërë

31 Cë aya ka Yecu ëka utmego mërë obino gïnï. Gïn ocung yökö ëka eoro ngat mörö both Yecu ï öt, ëk obin yökö ötwak ködgï. 32 Lwak onwongo obedo nakun ögürö gïnï Yecu ï dyere, cë ekobo nïnë nï, "Ayani ëka utmegoni ocung yökö tye gïnï ka rangöni."

33 Yecu ögamö nïgï nï, "Nga ënë obedo ayana ëka utmegona?" 34 Cë önënö jö n’obedo pïny n’ögürö ën dyere ëka okobo nï, "Man ënë ayana ëka utmegona. 35 Ngat mörö na tïmö ngö n’Obanga mïtö, ënë ömëra, amëra, ëka ayana."