Marcos 4

Carolok ï kom acwö kodhi

1 Yecu dökï öcakö pwony ï dhö Nam më Galilaya. Lwak na pol rwök öcökërë bothe, cë ën öïdhö ï yeya ëka obedo ïë nakun jïï kïbëc odong ï dhö nam. 2 Yecu opwonyogï kï köp na pol kï carolok nï:

3 "Winy unu! Apur mörö öcïdhö më cwöönö kodhi mërë. 4 Ï karë na ën tye ka cwöönö kodhi, kodhi mökö ökïr ï dye yoo, ëka wïny ödëdëpö ökö. 5 Kodhi nökënë ökïr kanya obedo kitekite na ngöm nönök ïë. Kodhi ni otuu pïöpïö pïën ngöm onwongo rëp. 6 Ëntö ï karë na ceng öryëny öwangögï rwök, oner gïnï ökö pïën oriigï ba ödönyö na thuth. 7 Kodhi nökënë opodho ï kin okudhi. Okudhi ödöngö ëka ödïögï cë ba önyakö nyige. 8 Kodhi nökënë opodho ï ngöm na bër ödöngö ëka nyige önyak, mökö pyer adek, mökö pyer abicël ëka mökö mia acël." 9 Cë Yecu okobo nï, "Ngat na tye kï ithe më winyo, myero owiny."

Pwony ï kom carolok

10 Ï karë na Yecu onwongo tye kënë k’ëlübkörë apar arïö ëka jö nökënë, gïn openyo ën tyën carolok. 11 Ëka ën okobo nïgï nï, "Müng më ker k’Obanga ëmïöwu. Ëntö both jö nökënë an atwak ködgï kï carolok, 12 ëk,

"‘Ka gïn önënö, önën gïnï

ëntö ba bino gïnï nïang.

Ka gïn owinyo, owiny gïnï

ëntö gïn ba bino nïang ïë.

Pïën ka gïn ötïmö, gïn bino lökërë both Obanga,

ëka ën bino tïmö nïgï kïca.’"

Yecu ögönyö carolok k’acwö kodhi

13 Cë Yecu openyogï nï, "Un ba ïnïang ï tyën carolok ni? Un ibino nïang ï carolok nökënë kïbëc nïngö? 14 Apur cwö kodhi na ënë köp k’Obanga. 15 Kodhi n’opodho ï yoo ocung pï jö na winyo köp k’Obanga, cë cücüth Catan bino kwanyö köp na gïn owinyo ökö. 16 Kodhi n’opodho kanya obedo kitekite, ocung pï jö na winyo köp k’Obanga ëka cücüth gamö gïnï kï yom cwiny. 17 Ëntö kit na ba ut gïnï k’orii n’ödönyö na thuth, ba bedo gïnï ape. Podho gïnï ökö cücüth ka tye gïnï kï pëkö onyo ka eketho ayela ï komgï pï yee köp k’Obanga. 18 Kodhi nökënë n’opodho ï kin okudhi ocung pï jö na winyo köp k’Obanga, 19 ëntö par më kwö më lobo ni, marö lönyö, ëka miti më jami kïbëc bino cë dïö köp k’Obanga ökö ëka ba nyak gïnï. 20 Ëntö kodhi n’opodho ï ngöm na bër cung pï jö na winyo ëka gamö köp k’Obanga. Gïn nyakö nyig-gï pyer adek, mökö pyer abicël onyo mia acël."

Carolok ï kom tara

21 Yecu okobo both lwak nï, "Ngat mörö ute na cwïnyö tara cë ketho ï thë adïta onyo ï thë ëtana ëka ba ketho ï ka cibo tara? 22 Pïën ba tye gin mörö n’ökanërë na ba ebino ngeeno, ëka müng mörö ope na ba ebino kelo kanyalër. 23 Ka ngat mörö tye kï ithe më winyo, myero ën owiny."

24 Yecu thon okobo nïgï nï, "Gwökërë unu kï kom gin nï winyo unu. Gin na un ipimo ködë, ënë thon ebino pimo niwu ködë, ëka dökï ebino mëdö niwu. 25 Jö na tye kï gin mörö ebino mëdö nïgï, ëka jö n’ope kï gin mörö ebino kwanyö naka thon gin mörö na tïdï na gïn tye ködë ökö."

Carolok ï kom tuu ka kodhi

26 Yecu ömëdërë më kobo nï, "Ker k’Obanga cal k’apur n’öcwö kodhi ï ngöm. 27 Kiceng ëka kiwor, na ën önïnö onyo neno, nyig kodhi tuu ëka döngö, ëntö ën ba nïang kit na nwongo ötïmërë ködë. 28 Ngöm mïö nyig kodhi tuu ëka nyakö nyige kënë, më acël pote cakö donyo, cë wie yübërë, ëka ajiki mërë nyige cëk. 29 Ï karë na nyige öcëk, apur cakö bino ëka kaö kï pala, pïën karë më kac nwongo örömö."

Carolok ï kom nyig kodhi karadali

30 Yecu dökï openyo nï, "Ngö na onu ebino poro kï Ker k’Obanga onyo carolok mënë na onu myero etii ködë? 31 Cal kï nyig kodhi karadali na ënë tïdï rwök kï kin kodhi n’ëpïdhö ï ngöm. 32 Ëntö ka ëpïdhö, döngö na thwönë rwök na löö kodhi nökënë kïbëc n’ëpïdhö ï pwodho. Jangë döngö na boco, ëka wïny na ngwëcö kï malö twërö gërö udigï cë yweo ï tipo mërë."

33 Yecu ötïtö köp mërë both lwak nakun tio kï carolok, okobo nïgï kite na gïn twërö nïang ködë. 34 Ën ba okobo gin mörö bothgï na ba otio kï carolok, ëntö ka ën ut kënë k’ëlübkörë, ën gönyö nïgï jami kïbëc.

Yecu öjükö yamö

35 Ï nïnö nön na pïny dong cido, Yecu okobo both ëlübkörë nï, "Eru engolu nam yo löka nam tung ca." 36 Cë gïn otero Yecu ï yeya ëka öcakö gïnï wëkö lwak ï ngeegï. Yeya nökënë thon onwongo tye kanya acël ködë. 37 Ëka yamö na ger obino ï nam. Pii na tingere malö öcakö dönyö ï yeya, ëka yeya öcakö pong kï pii.

38 Ï caa nön, Yecu onwongo tye ka nïnö ï ngee yeya n’otheno wie k’athen wic. Ëlübkörë ocoo ën ëk öya malö, na redo gïnï nï, "Apwony, in ba ïparö nï wan ëcwök lüny ökö ï pii?"

39 Yecu öya malö ëka ocoko yamö cë okobo nï pii na tingere malö nï, "Lïng ökö! Cung moth!" Cücüth yamö ocung ökö, ëka jami kïbëc ölïng moth. 40 Cë Yecu openyo ëlübkörë nï, "Pïngö un ilwor? Un ba itye kï yee?" 41 Ëlübkör Yecu onwongo ödökö gïnï na lwor ökö. Cë öcakö penyere gïnï kën-gï nï, "Ëcwö ni ënë nga, na naka thon yamö ëka pii na tingere malö winyo?"