1 Yecu öya ökö kï kunön, ödök yo lobo thurgï ëka ëlübkörë ölübö ën. 2 Ï ceng Cabït k’Eyuda, ën öcakö pwony ï cinagoga. Jö na pol n’owinyo pwony mërë ouro gïnï ëka openyo gïnï nï, "Ëcwö ni onwongo ryëkö ni kïbëc kï kwene? Kit ryëkö mënë n’ëmïö ën? Ën tio tango nïngö? 3 Man pathï apaa bao, wod ka Maria ëka ömïn Yakobo, Yoce, Yuda, ëka Cimon. Amego mërë ba kwö ï kin onu kany?" Cë gïn ökwërö yee ï kome.

4 Cë Yecu okobo nïgï nï, "Adwarpïny ëwörö ï kabedo kïbëc na path kï ï taun më pacö mërë ëka ï kin wede mërë kï jö më dyekalgï." 5 Yecu onwongo ba twërö tio tango mörö kunön, na path kï ketho cïngë ï wi etwoe mörö na nönök ëka öcangögï. 6 Ën obedo kï ur rwök pïën gïn ope kï yee.

Cë Yecu owotho ï pacö kï pacö, nakun pwonyo jïï. 7 Ën ocwodo ëlübkörë apar arïö kanya acël ëka öcakö orogï k’arïö arïö nakun mïögï twër ï kom tipo na reco. 8 Yecu okobo nïgï nï kür owoth gïnï kï gin mörö ï wothgï na path kï lüth ögölë. Kür ömak gïnï cem, ocwe ëka cïlïng ï jëba. 9 Ën oyeo nïgï më ruko wör, ëntö kür ömak gïnï böngü më alöka. 10 Ën okobo nïgï nï, "Ka ïdönyö unu ï öt mörö, bed unu kany nön naka ka ibino yaa unu kï kany nön. 11 Ëntö ka ba ëgamöwu ï kabedo mörö onyo ewinyowu, ka ïya unu, tëng unu apua më tyënwu* ëk obed caden bothgï." 12 Cë ëlübkör Yecu öcakö cïdhö gïnï, nakun tïtö gïnï nï jïï myero ongut gïnï kï kom balgï. 13 Gïn öryëmö cene na pol ëka ewiro etwoe na pol kï möö cë ëcangögï.

14 Rwoth Erode* owinyo köp ï kom Yecu pïën jö kïbëc onwongo twakö köp ï kome. Jö mökö onwongo kobo nï, "Man myero obed Jon Abatica n’ocer kï ï lyël. Manön ënë ömïö ën tye ka tio koth tango ni."

15 Jö nökënë okobo nï, "Ën obedo adwarpïny Eliya."

Jö nökënë kobo nï, "Ën obedo adwarpïny na cal k’edwarpïny mörö na cön."

16 Ëntö ï karë n’Erode owinyo köp ï kom Yecu, okobo nï, "Man myero obed Jon! Ëcwö na an anguno ngute ënë dökï ocer ökö." 17 Erode onwongo ooro acikari më makö Jon ëka ketho ën ï buc pï Kerodia, dhakö k’ömïn mërë Pilipo, pïën Erode onwongo ökwanyö Kerodia më bedo dhakö mërë. 18 Jon obedo ka kobo n’Erode nï, "Cïk ka Muca ba yeo nï ïkwany dhakö k’omeru ïlök ödök megi." 19 Kerodia obedo kï cwer cwiny ï kom Jon ëka ömïtö më neko ën. Ëntö ba ötwërö, 20 pïën Erode onwongo lworo Jon ëka ngeo nï ën onwongo obedo dhanö na kite atïr ëka ëcwö na leng, cë ën ögwökö Jon na bër. Ën onwongo marö winyo twak ka Jon kadï bed wie orubere, caa kïbëc ën mïtö nï ewiny köp ka Jon.

21 Kerodia onwongo karë na bër ï nïnö n’Erode öyübö karama më po pï nïnö n’ënywölë ködë. Ën ocwodo edite mërë, ëtëla wi lwëny ëka edite më Galilaya. 22 Ï karë na nyaka Kerodia obino ëka ömyël, ën oyomo cwiny Erode ëka wele mërë. Erode okobo both nyakö nï, "Penya gin mörö këkën na in ïmïtö. An abino mïöni." 23 Ëka ën okwongere bothe nï, "An abino mïöni gin mörö këkën na in ibino penyo kï botha, naka thon nucu më kerna!"

24 Anyaka ni öcïdhö both aya mërë cë okobo nïnë nï, "Ngö na myero apeny?"

Aya mërë okobo nïnë nï, "Peny wi Jon Abatica!"

25 Anyaka ni öbünyö woth pïöpïö ödök cen both Erode ëka okobo nïnë nï, "Amïtö ïmïa wi Jon Abatica ï canïa kany ï caa ni!"

26 Cë rwoth Erode obedo kï kumo rwök ëntö pï kwong na ën okwongo ï nyim wele mërë, ömïö ën ba twërö kwërö na nyaka ni. 27 Cücüth rwoth ooro acikari na kürö pïny ï buc më cïdhö nguno ngut Jon ëka okel nïnë wie. Acikari öcïdhö ï buc cë onguno wi Jon 28 oketho ï canïa, ëka okelo ömïö both nyakö ni. Nyakö ni dong otero both aya mërë. 29 Ï karë n’ëlübkör Jon owinyo gïnï ngö n’ötïmërë, obino gïnï cë ökwanyö gïnï kome ëka ëcïdhö eiko ï bur lyël.

30 Ï karë n’ëkwëna odwogo gïnï both Yecu, gïn okobo nïnë gin na kïbëc na gïn ötïmö ëka opwonyo. 31 Cë Yecu okobo nïgï nï, "Eru ecidhu yo kanya jïï ope ïë ëk eywe na nönök." Ën okobo nï köman pïën jïï onwongo tye na pol na bino ëka cïdhö gïnï. Yecu ëka ëkwëna mërë ba obedo gïnï kï caa mörö më cem thon.

32 Cë gïn dong ödönyö ï yeya ëka öcïdhö yo kanya jïï ope ïë. 33 Ëntö jö na pol n’önënögï ka cïdhö, ongeogï ëka öngwëcö gïnï kï tyën-gï kï kin peci cë öcakö thuno gïnï anyim nïgï. 34 Ï karë na Yecu donyo yökö kï ï yeya, ën önënö lwak jïï na pol ëka kïca ömakö ën ï komgï, pïën gïn onwongo cal kï rom n’akwathgï ope. Cë öcakö pwonyogï kï köp na pol.

35 Na pïny dong cwök yutho, ëlübkör Yecu obino bothe ëka okobo gïnï nï, "Kany obedo kanyalik, ëka pïny thon tye ka cido. 36 Kob nï lwak ëk öcïdh gïnï kanya jö mökö kwö gïnï ïë ëka ï kin peci na cwök ëk öwïl gïnï cem mörö më acama."

37 Ëntö Yecu ögamö nï, "Miwugï gin mörö më acama."

Gïn openyo Yecu nï, "In ïmïtö nï wan ëcïdh ëk etii kï denario mïa arïö më wïlö ogati më pïdhögï?"

38 Cë Yecu openyogï nï, "Ogati adi na un iut ködë? Cïdh ïnën unu."

Gïn odwogo ëka okobo gïnï nï, "Wan eut k’ogati abic ëka rëc arïö."

39 Cë Yecu okobo n’ëlübkörë ëk ömïï jïï obed gïnï pïny ï gurup ï lum na mar. 40 Jïï obedo pïny ï gurup më mia acëlacël ëka pyer abicabic. 41 Yecu ökwanyö ogati abic ëka rëc arïö, önënö malö ï polo, ëka ölëgö gum. Cë opoko ï ogati ëka ömïö both ëlübkörë ëk opok gïnï both jïï. Ën thon opoko rëc arïö ï kin-gï kïbëc. 42 Gïn kïbëc ocemo ëka oyeng gïnï. 43 Ëka kinge, ëlübkör Yecu öcökö gïnï ngïny ogati ëka rëc n’odong pong aditi apar arïö. 44 Wel cwö n’öcamö gïnï ogati onwongo tye elip abic.

45 Cücüth kinge man, Yecu okobo n’ëlübkörë ëk ödöny gïnï ï yeya ëk öcïdh gïnï anyim yo löka Bethecaida, nakun ën kobo both jïï ëk ödök gïnï pacö. 46 Kinge na dong omotho jïï, ën öcïdhö ï lëga ï wi kidi.

47 Kothyeno na pïny dong ocido, ëlübkör Yecu onwongo ut gïnï ï yeya ï dyere nam. Yecu onwongo odong kënë ï ngöm. 48 Ën önënö nï ëlübkörë onwongo tye gïnï ï thwön can, na yelere gïnï më mïö yeya cïdhö anyim pïën yamö onwongo tye ka yelogï. Na caa abungwën më kodiko dong römö, Yecu obino bothgï nakun tye ka woth ï wi pii. Ën öthëna më poth kalögï, 49 ëntö ï karë na gïn önënö Yecu nakun tye ka woth ï wi pii kï tyënë, gïn okok rwök kï lworo n’öthamö gïnï nï ködë ën obedo jwök. 50 Gïn kïbëc onwongo komgï öthöö ökö ï caa na gïn önënö Yecu.

Ëntö Yecu ötwak ködgï cücüth nakun kobo nïgï nï, "Kür ibed unu kï lworo, bed unu na cwinywu tëk! An ënön!" 51 Cë Yecu öïdhö ï yeya bothgï, ëka yamö ocung. Gïn kïbëc ouro gïnï rwök, 52 pïën gïn onwongo bara önïang ï kom tango më ogati. Cwinygï onwongo nwang rwök më nïang.

53 Kinge na dong öngölö gïnï nam, Yecu ëka ëlübkörë ocung gïnï ï löka nam ï Genecaret ëka öywaö gïnï yeya ï lak nam. 54 Ï karë na gïn odonyo yökö kï ï yeya, cücüth jïï öcakö ngeno ën, 55 cë örïngö gïnï ï kabedo kïbëc, na tingo gïnï jö na two k’ökëka yo kanya gïn onwongo owinyo nï Yecu ut ïë. 56 Kanya kïbëc na ën cïdhö yo ïë, ï kin peci, peci na döngö, onyo ï nget lobo, gïn okelo etwoe yo cuk. Gïn ökwaö ën ëk ömïï etwoe ogud lak böngü mërë, ëka jö kïbëc n’ogudo ebino ëcangögï ökö.