Marcos 7

Kite më thëkwarö k’edong

1 Ï nïnö mörö acël, Eparicayo mökö ëka epwony Cïk ka Muca n’öya gïnï kï ï Jerucalem, obino ëka öcökërë gïnï both Yecu. 2 Cë önënö gïnï ëlübkörë mökö na ba lübö cïk më kwer më lwökö cïng jö na bara ecemo. 3 Eparicayo ëka Eyuda kïbëc ba cemo na bara ölwökö gïnï cïng-gï kite na cïk më thëkwarö k’edite mïtö ködë. 4 Ëka ka gïn odwogo kï ï cuk, ba cemo gïnï na bara ölwökö cïng-gï. Gïn thon lübö cïk më thëkwarö nökënë na pol na calö lwökö ekopo, aguli, ëka k’aguli më mola.

5 Eparicayo ëka epwony cïk openyo gïnï Yecu nï, "Pïngö ëlübkori ba lübö gïnï cïk më kwer më thëkwarö k’edite ëntö cemo gïnï kï cïng-gï na ba ëlwökö?"

6 Yecu ögamö nï, "Un etwodo! Adwarpïny Icaya onwongo odwaro köp n’atïr ï komwu kite n’ëcöö ködë nï,

"‘Rok ni wöra gïnï kï del dhögï,

ëntö cwinygï bor köda.

7 Wöra gïnï nono,

pwony na gïn pwonyo obedo cïk ka dhanö.’

8 Un ïkwërö lübö cïk k’Obanga ëka ïlübö unu kite ka dhanö."

9 Cë Yecu okobo bothgï nï, "Itye unu kï yodhi na bër më kwërö cïk k’Obanga, ëk ïlüb unu kite më thëkwarö na mewu. 10 Muca yam okobo nï, ‘Wör apapni ëka ayani,’ ëka nï, ‘Ka ngat mörö öyanyö apap mërë onyo aya mërë, myero enek ökö.’ 11 Ëntö un ikobo nï ka dhanö mörö okobo n’apap mërë onyo aya mërë nï, ‘Gin n’onwongo myero akonyi ködë ënë lïm më Korban’ (na tyën köp mërë ënë nï gin n’ëmïö ökö both Obanga), 12 cë ën kür dökï ömïï lïm mörö më könyö apap mërë onyo aya mërë. 13 Ï kit yoo ni, un ïkwërö köp k’Obanga ëka ïlübö unu kite më thëkwaröwu. Ëka ïtïmö unu jami na pol na cal kï manön."

Gin na balö dhanö

14 Cë Yecu ocwodo lwak bothe dökï ëka okobo nïgï nï, "Un kïbëc winy unu köpna ëka ïnïang unu ïë. 15 Gin mörö ope na yaa kï yökö na dönyö ï dhanö na twërö balö ën, ëntö gin na yaa kï ï dhanö na donyo yökö ënë balö ën. 16 Ngat na tye kï ithe më winyo myero ën owiny."*7:16 Baibul nökënë ba oketho tyeng ni.

17 Ï karë na Yecu öwëkö lwak ëka ödönyö ï öt, ëlübkörë openyo ën tyën köp ï kom carolok ni. 18 Cë Yecu openyogï nï, "Un thon bara ïnïang unu? Ba ingeo unu nï gin na kïbëc na dönyö ï dhanö nakun öya kï yökö ba twërö balö ën? 19 Pïën ba dönyö naka ï cwinye, ëntö cïdhö ï jamïë cë donyo yökö." (Na Yecu okobo köp ni, ën onwongo tye ka kobo nï cem kïbëc opore më acama.)

20 Yecu ömëdërë më kobo nï, "Gin na yaa kï ï dhanö ënë balö ën. 21 Pïën gin n’öya kï ï dhanö, n’öya kï ï cwinye ënë thama na reco, tïm më ölyang, kwalö kwo, nek, 22 elomi, woro më jami kïbëc, tïm mökö na reco, bwölö jïï, miti më kom, nyeko, yanyö jïï, awaka, ëka mingo. 23 Tïm na reco ni kïbëc yaa kï ï cwiny dhanö, ëka gïn ënë balö dhanö."

Yee ka dhakö më Curopoiniki

24 Yecu öya ökö kï kunön ëka öcïdhö ï lobo Turo. Ën ödönyö ï öt mörö ëka ba ömïtö nï ngat mörö onge, ëntö ën onwongo ba twërö kanërë. 25 Cë dhakö mörö na nyarë onwongo tye kï tipo na rac ï kome, owinyo köp ï kom Yecu, cë obino ëka orumo cöngë ï nyime. 26 Dhakö ni onwongo obedo jö Girik n’ënywölö ï Curopoiniki. Ën ökwaö Yecu më ryëmö tipo na rac ökö kï kom nyarë. 27 Yecu okobo nïnë nï, "Ëk kono ëthïnö öcam ngö na gïn mïtö kïbëc, pïën ba opore më mïö cem k’ëthïnö both gwongi."

28 Dhakö ögamö nï, "Rwoth ikobo adyer, ëntö gwongi thon na tye ï thë mëja camö gïnï ngïny cem k’ëthïnö n’opodho pïny."

29 Cë Yecu okobo nïnë nï, "Pï köp na in ikobo, ïrömö cïdhö yo pacö, pïën tipo na rac dong öya ökö kï kom nyari." 30 Ën öcïdhö yo pacö ëka onwongo nyarë obuto ï wi ëtana, ëka tipo na rac onwongo dong öya ökö kï ï kome.

Yecu öcangö athöö ith na lëbë otwere

31 Cë Yecu öya ökö kï ï lobo Turo ëka owok ï Cidon yo Nam më Galilaya na tye ï lobo Dekapoli. 32 Ëka lwak okelo ëcwö mörö bothe n’onwongo ithe öthöö ëka ba römö twak. Cë ökwaö gïnï Yecu ëk oketh cïngë ï kome.

33 Kinge na Yecu otero ën thenge kï kin lwak, oketho nyi cïngë ï ithe, ëka öngülö laö dhögë ï cïngë cë ogudo lëbë. 34 Yecu önënö malö ï wi polo, öcür ëka okobo nï, "Epata," na tyën köp mërë nï, "Yabiri!" 35 Cücüth ëcwö ni öcakö winyo pïny. Thë lëbë thon ögöny ökö ëka öcakö twak na bër.

36 Yecu öcïkö lwak nï, "Kür ïcïdh ikob unu both ngat mörö ngö n’ötïmërë." Ëntö kadï bed öcïkögï nï kömanön, gïn ömëdërë amëda më tïtö ngö n’ötïmërë. 37 Lwak obedo kï ur rwök na kobo gïnï nï, "Gin na kïbëc na ën ötïmö bër. Ën thon mïö ëthöö ith winyo pïny ëka jö na thë lëbgï otwere më twak."