1 Ëka Yecu okobo bothgï nï, "An akobo niwu köp adyer nï tye jö mökö n’ocung kany na ba bino bïlö gïnï thöö naka ka wang n’önënö gïnï ker k’Obanga ka bino kï tëkö."

2 Kinge nïnö abicël, Yecu ökwanyö Petero, Yakobo, ëka Jon cë öïdhö ködgï ï wi kidi na bor, kanya onwongo gïn tye ïë kën-gï. Na gïn tye ka nënö, kom Yecu ölökërë na path ï nyimgï, 3 ëka böng mërë ödökö na tar na ryëny rwök na ngat mörö kï wi lobo ba römö lwökö nï kömanön. 4 Cë Eliya ëka Muca onen bothgï ëka öcakö gïnï twak kï Yecu.

5 Petero okobo both Yecu nï, "Apwony, bër nï onu më bedo kany! Ëk ëgër othogo adek, acël na megi, acël më ka Muca, ëka acël më k’Eliya." 6 Petero onwongo ba ngeo ngö na myero ekobi pïën lworo onwongo ömakögï rwök.

7 Cë edou obino oumogï ökö, ëka dwön ötwak kï ï edou nï, "Man ënë Woda më amara. Winy unu ën." 8 Athura, ï karë na gïn önënö ngetgï, gïn ba dökï önënö ngat mörö na path kï Yecu këkën.

9 Na gïn tye ka idho pïny kï wi kidi, Yecu öcïkögï nï kür okob gïnï nï ngat mörö ngö na gïn önënö, naka wang ka Wod ka Dhanö ocer kï ï thöö. 10 Gïn ba okobo ngö n’ötïmërë both ngat mörö, ëntö obedo penyere gïnï ï kin-gï kën-gï nï, "Ngö na ‘cer kï ï thöö’ gönyö?"

11 Cë gïn openyo Yecu nï, "Pïngö epwony cïk ka Muca kobo gïnï nï Eliya myero kono öcak bino?"

12 Yecu ögamö nïgï nï, "Adyer Eliya ënë cakö bino ëka dwökö jami kïbëc kakarë. Cë pïngö Cöc na Leng kobo nï Wod ka Dhanö bino lïmö can rwök ëka ebino kwërö ökö? 13 Ëntö akobo niwu nï, Eliya dong obino ökö ëka jïï ötïmö gin na kïbëc na gïn mïtö ï kome, kite na Cöc na Leng kobo nï bino tïmërë ködë."

14 Ï karë na Yecu k’ëlübkörë adek odwogo gïnï yo kanya ëlübkörë nökënë onwongo ute gïnï ïë, gïn önënö lwak na pol n’ögürögï dyere ëka epwony cïk ka Muca onwongo tye ka pyem ködgï. 15 Na lwak kïbëc önënö Yecu, ouro gïnï rwök ëka örïngö gïnï më motho ën.

16 Yecu openyo ëlübkörë nï, "Ngö na un itye ka pyem ködgï ïë?"

17 Dhanö mörö acël kï kin lwak ögamö nï, "Apwony, akelo woda bothi, pïën ën ute kï tipo na rac na ba yeo nï ën ötwakï. 18 Ëka ka tipo na rac ömakö, rëdhö ën pïny na kome myël amyëla. Cë bwo yenyo kï ï dhögë, kaö lakë na tëk ëka kome jïng ökö. Akwaö ëlübkori më ryëmö tipo na rac, ëntö ryëmö ölöögï ökö."

19 Yecu okobo nïgï nï, "Un wang rok na yeewu ope ï kom Obanga! Abino bedo kodwu naka awene? Abino dïö cwinya ï komwu naka awene kara? Kel unu awobi nön botha."

20 Cë gïn okelo awobi ni bothe. Ëntö ï karë na tipo na rac önënö Yecu, oyuo awobi ni pïny cüth naka örakërë na lör alöra nakun bwo yenyo kï ï dhögë.

21 Yecu openyo apap k’awobi nï, "Otero karë na röm kwene na gin ni obedo ka tïmërë bothe?"

Ën ögamö nï, "Anaka na ën pod tïdï. 22 Tipo na rac rëdhö ën karë kï karë ï mac onyo ï pii, më tëmö neko ën ökö. Ëntö ka ïtwërö tïmö gin mörö, kïca omaki ï komwa ëk ïkönywa."

23 Yecu okobo n’apap k’awobi nï, "Ka in ïtwërö! Jami kïbëc twërö tïmërë both ngat mörö këkën na yee."

24 Cücüth apap k’awobi okok kï redo nï, "An ayee, ëntö könya ëk abed kï yee na thwönë!"

25 Ï karë na Yecu önënö nï lwak tye ka ngwëc bino yo bothe, ën ocoko tipo na rac nï, "In tipo na ba mïö awobi ni twak ëka winyo pïny, aciki më donyo yökö kï ï kom awobi ni ëka kür dökï ïdöny ï kome!"

26 Cë tipo na rac öcakö koko, ëka oyuo awobi ni pïny naka örakërë ëka odonyo yökö kï ï kome. Awobi ni onwongo dong cal kï lyël na jö na pol okobo nï, "Ën öthöö ökö." 27 Ëntö Yecu ömakö cïngë ëka otingo ën malö cë ocung.

28 Kinge na Yecu onwongo tye kënë ï öt k’ëlübkörë, gïn openyo ën nï, "Pïngö wan ba ëryëmö cen?"

29 Yecu ögamö nïgï nï, "Koth tipo na rac na calö man, ëtwërö ryëmö kï lëga këkën.*"

30 Yecu ëka ëlübkörë öya gïnï kï ï kabedo nön ëka owok gïnï ï lobo më Galilaya. Ën onwongo ba mïtö nï ngat mörö onge kanya gïn onwongo tye ïë, 31 pïën onwongo mïtö pwonyo ëlübkörë. Yecu okobo bothgï nï, "Wod ka Dhanö ebino ketho örörö ï kome ëka ebino mïö ï cïng jö na bino neko ën. Ëntö kinge nïnö adek, ën bino cer kï ï thöö." 32 Ëntö ëlübkör Yecu ba önïang gïnï ï ngö n’onwongo ën tye ka kobo, ëka gïn onwongo lwor më penyo ën.

33 Kinge na dong othuno gïnï ï Kaperanaum, na gïn dong tye ï öt, Yecu openyo ëlübkörë nï, "Ngö n’onwongo un itye ka pyem ïë ï yoo?" 34 Ëntö gïn ölïng alïnga, pïën gïn onwongo tye ka pyem ï wanga yoo nï nga ënë löö kï dit kï kin-gï. 35 Yecu obedo pïny, cë ocwodo ëlübkörë apar arïö bothe, ëka okobo nï, "Ka ngat mörö mïtö bedo dhanö më acël, ën myero obed dhanö më ajiki ëka obed atic ka jö kïbëc."

36 Cë Yecu ökwanyö athïn ëka oketho ï dyeregï. Otingo athïn ï kore, ëka okobo nïgï nï, 37 "Dhanö mörö na bino gamö athïn na tïdï na cal kï man kï nyïnga, nwongo ögama. Ëka dhanö mörö na gama, nwongo ba ögama an këkën ëntö nwongo ögamö Apapna n’oora."

38 Jon okobo both Yecu nï, "Apwony, wan ënënö dhanö mörö ryëmö cene kï nyingi, ëntö wan ëjükö ën pïën onwongo ën ba tye kukur onu."

39 Yecu okobo nïgï nï, "Kür ijuku ën, pïën dhanö mörö ope na tio tango kï nyïnga ëka dökï cakö twakö köp na rac ï koma. 40 Ngat mörö këkën na ba dag onu, nwongo obedo akukur onu. 41 Ka ngat mörö ömïöwu pii më amodha pïën un ibedo jö ka Kiricito, an akobo niwu köp adyer, dhanö nön ebino cülö.

42 "Ka dhanö mörö ömïö ngat acël kï kin ëthïnö ni n’oye ï koma opodho ï bal, bedo na bër ka etweo pong rego na thwönë ï ngute cë ebolo ködë ï nam. 43 Cë ka cingi ënë mii ïtïmö bal, ngun ökö. Bedo na bër rwök më dönyö ï kwö kï cingi acël këkën na löö më dönyö ï mac na ba thöö ï kapïny kï cingi arïö. 44 Kunön, kudi na camögï ba thöö, ëka mac na wangögï ba nekere.* 45 Ka tyeni ënë teri ï bal, ngun ökö. Bedo na bër rwök më dönyö ï kwö kï tyeni acël na löö më boloni ï mac kapïny kï tyeni arïö. 46 Kanya kudigï ba thöö kï ïë ëka mac thon ba nekere.* 47 Ëka ka wangi ënë mii ïtïmö bal, köl ökö. Bedo na bër rwök më dönyö ï Ker k’Obanga kï wangi acël këkën na löö më bedo kï wangi arïö cë eboli ködë ï mac kapïny. 48 Kanya

" ‘kudigï ba thöö kï ïë

ëka mac thon ba thöö.’✝

49 Pïën kadö na bino lönyö ngat acëlacël ënë mac. 50 Kadö bër, ëntö ka orwenyo mït mërë ökö, ïtwërö mïö dökö na mït nïngö dökï? Un myero ibed unu kï rwöm më kadö ï kinwu ëka ibed unu kï kuc kï jö nökënë."