1 Yecu ocwodo ëlübkörë apar wie arïö bothe ëka ömïögï twërö më ryëmö tipo na reco ëka më cangö twoe na papath kïbëc.

2 Man ënë nyïng ëkwëna apar wie arïö: më acël, Cimon (n’ecwodo nï Petero) ëka ömïn mërë Anderiya; Yakobo wod ka Jebedayo, ëka ömïn mërë Jon; 3 Pilipo ëka Batulumayo; Tomaci ëka Matayo n’obedo acök ocoro; Yakobo wod k’Alipayo, ëka Tadeo; 4 Cimon na mïtö löckën ëka Yuda Ikariot, n’oketho örörö ï kom Yecu.

5 Yecu ooro ëkwëna apar wie arïö kï cïk ni: "Kür ïcïdh unu both Erok onyo ïdöny unu ï taun ka jö Camaria mörö. 6 Ëntö cïdh unu both jö Icarael, na cal gïnï kï rom n’orwenyo. 7 Ka ïcïdhö unu, tït unu köp ni: ‘Ker më polo dong cwök.’ 8 Cang unu etwoe, cer unu jö n’öthöö, löny unu jö na tye kï two dhöbü, ëka ïryëm unu cene. Ëmïöwu nono, ëka un thon mïï unu nono. 9 Kür iwoth unu kï gol onyo ryal onyo mola mörö ï jëbawu; 10 kür iwoth unu k’ocwe ï wothwu, onyo böngü më alöka, onyo wör, onyo lüth më woth; pïën atic myero ëmïï cem mërë.

11 "Taun onyo pacö mörö këkën na un ibino dönyö ïë, rang unu dhanö na kite mërë bër ëka ibed unu ï ödë naka ka ibino unu yaa. 12 Ka ïdönyö unu ï öt, moth unu jö më öt nön kï moth më kuc. 13 Ka jö më öt nön öjölöwu, wëk unu kucwu odong ïë; ëntö ka ba öjölöwu gïnï, cë ïmïï kucwu odwog bothwu. 14 Ka ngat mörö ba bino jölöwu onyo winyo köpwu, tëng unu apua më tyënwu* ka ïya unu kï ï öt nön onyo taun nön. 15 An akobo niwu köp adyer, ï nïnö më ngölö-köp, Obanga bino tïmö kïca na thwönë rwök both jö më Codom ëka Gomora na löö jö më taun nön. 16 An aorowu kamë rom ï kin orudi. Pï manön bed unu na ryëk calö thwol ëka na mwol calö amam.

17 "Ëntö gwökërë unu ködgï; pïën gïn bino mïöwu ï cïng ëlöc ëka ebino pwodowu kï del ï cinagogagï gïnï. 18 Ebino terowu ï nyim ëlöc ëka ï nyim rwodhi pïra na calö ecaden bothgï ëka both Erok. 19 Ëntö ka gïn ömaköwu, kür ibed unu kï par ï kom ngö na un ibino kobo onyo kite na un ibino kobo ködë. Ï caa nön ebino mïöwu ngö na myero ikob unu, 20 pïën pathï un ënë ibino twak, ëntö Tipo k’Apapwu ënë bino twak kï bothwu.

21 "Omego bino mïö ömïn mërë më aneka, ëka apap bino mïö athïn mërë më aneka; ëthïnö bino jëm ï kom enyodogï ëka bino gïnï mïö enekogï. 22 Jö kïbëc bino dagöwu pïra, ëntö ngat na bino cung na tëk naka ï ajiki bino larë. 23 Ka eyelowu kï ï kabedo mörö acël, lüü unu ï kabedo nökënë. An akobo niwu köp adyer, ba ibino unu tyeko woth ï peci më Icarael kïbëc na bara Wod ka Dhanö obino.

24 "Athïn kwan ba dit löö apwony mërë, onyo atic ba dit löö adwong mërë. 25 Pore both athïn kwan më bedo calö apwony mërë, ëka atic më bedo calö adwong mërë. Ka adit na löö öt ecwodo nï Belijebul, ebino cwodo jö më ödë kï nyïng na rac röm kwene!

26 "Kür ibed unu kï lworo pïrgï. Gin mörö ope n’eumo na ba ebino yabö, onyo gin mörö ope n’opono na ba bino ngere. 27 Köp na an akobo niwu ï cöl pïny, twak unu ökö na pïny lër; ëka köp n’ëmwöngö amwöngö ï ithwu, red unu ködë ï wi bie. 28 Kür ilwor unu jö na neko kom ëntö ba neko tipo. Ëntö lwor unu Obanga na twërö neko tipo ëka kom kanya acël ï mac kapïny. 29 Wïny na thïthïnö arïö ba ëcadhögï pï cïlïng na nyïng? Ëntö mörö ope na twërö podho pïny n’Apapwu ba ngeo. 30 Naka thon yer wiwu kïbëc ëkwanö ökö. 31 Dong kür ibed unu kï lworo; pïrwu tëk löö wïny na pol ca ökö.

32 "Ngat mörö na bino tuco nyïnga ï nyim jïï, an thon abino tuco nyïngë ï nyim Apapna na tye ï polo. 33 Ëntö ngat na bino kwëröna ï nyim jïï, an thon abino kwërö ën ökö ï nyim Apapna na tye ï polo.

34 "Kür ïtham unu nï an abino më kelo kuc ï lobo. An ba abino më kelo kuc, ëntö pala abadë. 35 An abino më kelo apokapoka ï kin

" ‘wod ëka apap mërë,

nyakö ëka aya mërë,

cii wod ëka adha mërë.

36 Langö ka dhanö bino bedo dhanö më ödë kikokome.’✝

37 "Ngat mörö na marö apap mërë onyo aya mërë na löa ökö ba opore më bedo mëga; ngat mörö na marö wode onyo nyarë na löa ökö ba opore më bedo mëga; 38 ëka ngat mörö na ba tingo yath arïa mërë cë lübö kï köra ba opore më bedo mëga. 39 Ngat mörö na mïtö gwökö kwö mërë bino rwenyo ökö, ëka ngat na rwenyo kwö mërë pïra bino larö kwö mërë.

40 "Ngat na bino jölöwu, nwongo öjöla, ëka ngat n’öjöla nwongo öjölö ngat n’oora. 41 Ngat mörö na bino jölö adwarpïny pïën ën obedo adwarpïny bino nwongo cül n’ëcülö k’adwarpïny, ëka ngat mörö na bino jölö dhanö na kite atïr pïën ën obedo dhanö na kite atïr bino nwongo cül n’ëcülö kï dhanö na kite atïr. 42 Ëka ka ngat mörö ömïö pii na ngïc më amodha both ngat mörö acël kï ï kin jö na thïnö ni pïën ën obedo alübköra, an akobo niwu köp adyer, ën bino nwongo cül mërë."