Mateus 14

Thöö ka Jon Abatica

1 Ï karë nön Erode n’obedo alöc më Galilaya owinyo köp na pol ï kom Yecu, 2 ëka ën okobo both etic mërë nï, "Man ënë Jon Abatica, n’ocer ökö kï ï kin jö n’öthöö! Manön ënë ömïö ën tye ka tio koth tango na calö man."

3 Erode onwongo ömakö Jon ëka otweo ën ï buc pï Kerodia dhakö k’ömïn mërë Pilipo, 4 pïën Jon Abatica onwongo obedo ka kobo both Erode nï, "Cïk ba oyeo nï ïlök dhakö k’omeru obed megi." 5 Erode onwongo mïtö neko Jon ökö, ëntö onwongo lworo jïï, pïën gïn onwongo yeo nï Jon obedo adwarpïny.

6 Ëntö ï karë më po pï nywölö Erode, nyaka Kerodia ömyël ï nyim wele cë oyomo cwiny Erode rwök, 7 n’ömïö ën öcïkërë nakun kwongere both nyakö nön më mïö gin na kïbëc na ën bino penyo pïrë. 8 Aya mërë okobo nïnë köp na ën myero okobi, cë nyakö nön öcïdhö okobo nï, "Mïa wi Jon Abatica ï canïa kany." 9 Cë rwoth Erode okumo rwök, ëntö pï kwong na ën okwongo ëka pï wele mërë, ömïö ën öcïkö nï myero ëmïï. 10 Cë Erode ooro acikari mërë më cïdhö nguno ngut Jon ökö kï ï buc, 11 ëka oketho gïnï wie ï canïa cë ëmïö both nyakö nön n’otero both aya mërë. 12 Kinge ëlübkör Jon obino gïnï otingo kome ëka oiko gïnï. Cë gïn öcïdhö okobo both Yecu.

Yecu öpïdhö jö elip abic

13 Ï caa na Yecu owinyo gin n’ötïmërë ï kom Jon, ën öya ökö kï kunön kï yeya cë öcïdhö yo kanyalik më bedo kënë. Ï karë na jïï owinyo gïnï köp nön, cë ölübö gïnï körë nakun wotho kï tyën-gï kï ï peci na papath. 14 Ï karë na Yecu idho kï ï yeya, ën önënö lwak na pol, ëka kïca ömakö ën ï komgï, cë öcangö jö n’onwongo two gïnï.

15 Ka othuno kothyeno, ëlübkörë obino bothe cë okobo gïnï nï, "Pïny ocido dong ökö ëka kany obedo kanyalik. Mïï jïï öcïdh gïnï ï kin peci ëk öcïdh öwïl gïnï cem më acamagï."

16 Yecu ögamö nï, "Gïn myero kür öcïdhï ökö, miwugï gin mörö më acama."

17 Gïn ögamö nï, "Wan etye kany k’ogati abic ëka kï rëc arïö këkën."

18 Yecu okobo nï, "Kel unugï botha kany." 19 Cë ën okobo both lwak më bedo pïny ï kom lum. Yecu ökwanyö ogati abic ëka rëc arïö cë önënö malö ï polo, ën ölëgö gum ëka opoko ï ogati gïnï. Cë ömïögï both ëlübkörë, ëka ëlübkörë ömïögï both jïï. 20 Gïn kïbëc ocemo oyeng gïnï. Ëlübkörë öcökö gïnï ngïny cem n’odong pong aditi apar wie arïö. 21 Jö n’öcamö gïnï cem nön onwongo römö gïnï cwö elip abic, na ba ëkwanö mon ëka ëthïnö.

Yecu owotho ï wi pii

22 Cücüth Yecu ömïö ëlübkörë ödönyö ï yeya më cïdhö anyim nïnë yo löka nam tung ca, nakun ën pod odong më mïö lwak cïdhö ökö. 23 Kinge na dong Yecu ömïö lwak öcïdhö ökö, ën öcïdhö ï wi kidi kënë më lëga. Ï karë na dong pïny oyutho, ën onwongo tye kënë kunön, 24 ëntö yeya onwongo dong öcïdhö ökö na bor kï ï lak nam, pii na tingere malö onwongo yelo yeya, pïën yamö onwongo tye ka kudho bino ï komgï.

25 Ï kin caa abungwën ëka caa apar wie arïö më ruu ka pïny, Yecu obino both ëlübkörë na wotho ï wi pii. 26 Ï karë n’ëlübkörë önënö ën wotho ï wi pii, cë tipo komgï öthöö ökö. Gïn oredo rwök pï lworo, nakun kobo gïnï nï, "Man obedo jwök!"

27 Ëntö cücüth Yecu okobo nïgï nï, "Dïï unu cwinywu, an ënön. Kür ilwor unu."

28 Cë Petero ögamö dhögë nï, "Rwoth, ka in ënön, mïa abin bothi nakun awotho ï wi pii."

29 Yecu okobo nïnë nï, "Bin."

Cë Petero oidho ökö kï ï yeya, owotho ï wi pii më bino both Yecu. 30 Ëntö ka Petero önënö yamö tye ka kudho rwök, ën öcakö bedo na lwor ëka öcakö lüny ï pii. Cë okok nï, "Rwoth, lara!"

31 Cücüth Yecu olyao cïngë cë ömakö ën ëka okobo nï, "In itye kï yee na tïtïdï. Pïngö in ibedo k’akalakala?"

32 Ï karë na gïn dong ödönyö ï yeya, cë yamö ocung ökö. 33 Cë ëlübkör Yecu n’onwongo tye gïnï ï yeya öcakö gïnï wörö ën nakun kobo gïnï nï, "Adyer, in ibedo Wod k’Obanga."

34 Kinge na dong gïn öngölö nam, othuno gïnï ï lobo Genecaret. 35 Ï karë na jö na tye ï kabedo nön ongeo Yecu, cë ooro gïnï köp ï kabedo kïbëc n’ögürö lobo nön. Jïï okelo etwoe kïbëc both Yecu. 36 Gïn ökwaö ën ëk etwoe ogud gïnï lak böngü mërë këkën, ëka jö kïbëc n’ogudo ëcangögï ökö.