1 Ï karë nön ëlübkör Yecu obino bothe cë openyo gïnï nï, "Nga ënë löö kï dit kï ï ker më polo?"

2 Yecu ocwodo athïn na tïdï cë ömïö ocung ï kin-gï, 3 ëka okobo nï, "An akobo niwu köp adyer nï ka ba ïlökërë ïdökö unu calö ëthïnö, un ba ibino dönyö ï ker më polo. 4 Pï manön, dhanö na mwolere kënë calö athïn ni ënë dit ï ker më polo.

5 "Dhanö mörö na jölö athïn na calö man ï nyïnga, nwongo öjöla. 6 Ëntö ka dhanö mörö ömïö ngat acël kï kin ëthïnö na thïnö ni n’oye gïnï ï koma më podho ï bal, onwongo bedo na bër ka etweo pong rego na thwönë ï ngute cë ebolo ködë ï nam na thuth.

7 "Lobo bino nënö can pï gin na mïö jïï podho ï bal. Pïën gin na mïö dhanö podho ï bal myero obin, ëntö dhanö na kelo gin na mïö dhanö podho ï bal bino nënö can! 8 Ka cingi onyo tyeni ënë mii ipodho ï bal, ngun ibol ökö. Bër nini më dönyö ï kwö na cingi kucël ope onyo nï ngwal, bër na löö bedo kï cingi arïö onyo tyeni kïbëc cë eboli ködë ï mac na ba thöö. 9 Ka wangi ënë mii ipodho ï bal, köl ëka iyuu ökö. Bër nini më dönyö ï kwö kï wangi acël nï löönö më boloni kï wangi arïö ï mac Kapïny.

10 "Myero ïnën nï ba ïcaö unu ngat mörö acël kï ï kin jö na thïnö ni. Pïën an akobo niwu nï emalaikagï na tye ï polo tye gïnï ï nyim Apapna ï karë kïbëc. 11 (Pïën Wod ka Dhanö obino më larö jö n’orwenyo.)*

12 "Un ïthamö nïngö ka dhanö mörö tye kï rom mia acël, ëka acël kï kin-gï orwenyo ökö? Ën ba bino wëkö pyer abungwën wie abungwën ï wi kidi cë cïdhö rangö man orwenyo? 13 An akobo niwu köp adyer nï ka onwongo, cwinye bedo na yom ï kom römö n’orwenyo na löö pyer abungwën wie abungwën na ba orwenyo gïnï. 14 Ï yoo acël nön, Apapwu na tye ï polo thon ba mïtö nï jö na thïnö ni kür mörö orweny.

15 "Ka omeru öbalö bothi, cïdh bothe ëk inyuth nïnë bal mërë, ï kin in kï ën. Ka ën owinyo köpni, cë nwongo idwongo omeru cen. 16 Ëntö ka ën ba owinyo köpni, kwany dhanö acël onyo jö arïö nökënë owoth kodi, ëk ‘köp kïbëc n’ecaden arïö onyo adek ötwakö omok köp kïbëc.’✝ 17 Ka ën ökwërö winyo köpgï, kob both jö n’oye Kiricito; ëka ka ökwërö winyo köp ka jö n’oye Kiricito, ter ën na calö ngat na ba ngeo Obanga onyo acök ocoro.

18 "An akobo niwu köp adyer nï gin mörö na un itweo ï wi lobo ebino thon tweo ï polo, ëka gin mörö na un ibino gönyö ï wi lobo ebino thon gönyö ï polo.

19 "An akobo niwu dökï nï ka jö arïö kï ï kinwu oyere gïnï ï kom gin mörö këkën na gïn openyo pïrë, Apapna na tye ï polo bino tïmö nïgï. 20 Pïën kanya jö arïö onyo adek öcökërë gïnï ïë ï nyïnga, an thon nwongo atye ködgï kany nön."

21 Cë Petero obino both Yecu ëka openyo nï, "Rwoth, wang adi na an myero atïm kïca both ömëra ka öbalö botha? Wang abïrö?"

22 Yecu ögamö nï, "An ba akobo nini nï wang abïrö, ëntö wang pyer abïrö tyën abïrö.

23 "Pï manön, ker më polo cal kï rwoth n’onwongo mïtö yübö köp më benyi k’etic mërë. 24 Ï karë na ën dong öcakö kwanö wel, ekelo ëcwö mörö bothe n’onwongo tye kï banya më cïlïng na thwönë rwök. 25 Na calö onwongo dong ba römö cülö banya nön, cë adwong mërë öcïkö nï myero ëcadh atic nön ï opii, kï dhakö mërë, ëthïnö mërë ëka gin na kïbëc n’onwongo ën tye ködë më cülö banya.

26 "Cücüth atic nön orumo cöngë ï nyim adwong mërë nakun kwaö nï, ‘Adwong, dïï cwinyi ï koma, cë an abino cülöni jami kïbëc.’ 27 Cë adwong kïca ömakö ï kom atic mërë, ëka ötïmö kïca cë ögönyö öwëkö öcïdhö.

28 "Ëntö ï karë n’atic nön ödönyö yökö, ën onwongo atic awodhe n’onwongo tye kï banya mërë na römö denario mia acël. Ën ömakö awodhe na tye kï banya mërë cë ödëö nakun kobo nï, ‘Cül banyana!’

29 "Ëntö atic awodhe ni oryebere pïny nakun kwaö nï, ‘Dïï cwinyi ï koma, an abino cülö banyani.’

30 "Ëntö ën ökwërö ökö cë ömïö etweo won banya mërë ï buc naka ka wang öcülö banya. 31 Ï karë n’etic nökënë ca önënö ngö n’ötïmërë, cë cwinygï öwang rwök ëka öcïdhö okobo gïnï both adwong-gï gin na kïbëc n’ötïmërë.

32 "Cë adwong ocwodo atic n’onwongo ën ötïmö kïca nïnë ëka okobo nï, ‘In ibedo atic na rac, an awëkö banyani kïbëc pïën in ïkwaö nï atïm nini kïca. 33 In onwongo myero kïca omaki ï kom atic awodhi, kite na an thon kïca ömaka ï komi.’ 34 Akëmö ömakö adwong rwök ömïö eketho atic nön ï buc ëk onwong pwod naka ka wang öcülö banya mërë kïbëc.

35 "Man ënë kite n’Apapna na tye ï polo bino tïmö ködë ï komwu, ka ngat acëlacël ï kinwu ba ötïmö kïca kï ï cwinye both utmego mërë."