1 Kinge na dong ënywölö Yecu ï Bethelem na tye ï Yudea, ï karë n’Erode obedo rwoth, ëryëkö öya kï kukïdë obino gïnï yo Jerucalem 2 ëka openyo gïnï nï, "Athïn n’ënywölö më bedo rwoth k’Eyuda tye kwene? Wan ënënö cër mërë kï kukïdë cë wan ebino më wörö athïn."

3 Ï karë na rwoth Erode owinyo köp ni, cwinye opodho rwök, ëka jö më Jerucalem kïbëc cwinygï opodho kanya acël ködë. 4 Erode ocwodo ëlamdhök na dito kïbëc ëka epwony cïk cë openyogï ka kwene n’onwongo ebino nywölö Meciya ïë. 5 Gïn ögamö nï, "Ï Bethelem më Yudea, pïën man ënë ngö n’adwarpïny onwongo öcöö:

6 " ‘Ëntö in, Bethelem na tye ï lobo më Yuda,

in ba ïtïdï rwök kï ï kin kaka më Yuda;

pïën alöc bino yaa kï bothi

na ën bino kwaö jöga më Icarael.’✝2:6 Mika 5:2"

7 Cë Erode ocwodo ëryëkö ï müng ëka önïang kï bothgï karë na cër onen ïë. 8 Cë ën oorogï yo Bethelem nakun kobo nïgï nï, "Cïdh ipeny unu köp ï kom athïn ni na bër. Ka inwongo unu, cë ikel unu köp nön botha, ëk an thon acïdh awör ën."

9 Kinge na dong gïn owinyo köp ka rwoth, gïn öcakö cïdhö kï yorgï, ëka cër na gïn onwongo önënö kï kukïdë ötëlö nyimgï naka ocung ï wi kanya athïn onwongo tye ïë. 10 Ï karë na gïn önënö cër, cwinygï obedo na yom rwök. 11 Gïn ödönyö ï öt ëka önënö gïnï athïn ëka aya mërë Maria, cë orumo cöng-gï pïny ëka ëwörö athïn. Gïn ögönyö yëcgï ëka ömïö gïnï mïc më gol, odok na ngwece kur ëka müra. 12 Kinge Obanga öcïkögï ï wang lek nï kür ödök gïnï cen yo both Erode, gïn ödök ï lobogï nakun ewok kï ï yoo nökënë.

13 Kinge na dong ëryëkö ödök gïnï ökö, malaika ka Rwoth onen both Yocepu ï wang lek cë okobo nï, "Yaa malö iter athïn gïn k’aya mërë ëk ïlüü unu yo Ejip. Bed unu kunön naka ka an akobo nini më dwogo, pïën Erode bino rangö athïn ëk enek ökö." 14 Cë Yocepu öya, ökwanyö athïn gïn k’aya mërë ï kiwor ëka öcïdhö yo Ejip, 15 kanya ën obedo ïë naka Erode öthöö. Man ötïmërë ëk köp ka Rwoth na ën okobo ï dhö adwarpïny ocobere kakarë nï, "An acwodo woda kï ï Ejip."✝2:15 Kocea 11:1

16 Ï karë n’Erode önïang nï ëryëkö öbwölë, öngöö rwök ëka ömïö twërö më neko ëthïnö awope kïbëc kï ï Bethelem ëka ï kabedo kïbëc na cwök ködë cakërë kï ï mwaka arïö dök ködë pïny, na lübërë kï karë na ën önïang ködë kï both ëryëkö. 17 Cë ngö na yam adwarpïny Jeremia okobo ocobere:

18 "Dwön mörö tye ka winyere kï ï Rama

na kok ëka kumo rwök,

Racel tye ka koko pï ëthïnë,

ëka ba mïtö nï ekwe cwinye,

pïën ëthïnë öthöö gïnï ökö."✝2:18 Jeremia 31:15

19 Kinge na dong Erode öthöö, malaika ka Rwoth onen both Yocepu ï wang lek kï ï Ejip 20 ëka okobo nï, "Yaa malö, iter athïn gïn k’aya mërë ëka ïdök unu ï lobo më Icarael, pïën jö n’onwongo mïtö kwanyö kwö k’athïn dong öthöö gïnï ökö."

21 Cë Yocepu öya, ökwanyö athïn gïn k’aya mërë ëka öcïdhö gïnï ï lobo më Icarael. 22 Ëntö ï karë na Yocepu owinyo nï Arkelau ënë dong löö Yudea nakaka apap mërë Erode, Yocepu obedo kï lworo më cïdhö yo kunön. Cë kinge n’Obanga okobo nïnë ï wang lek, ën öya öcïdhö ï lobo më Galilaya. 23 Ën öcïdhö obedo ï taun n’ecwodo nï Najaret. Cë köp n’edwarpïny ötwakö ocobere: "Ën ebino cwodo nï dhanö më Najaret."