1 "Ker më polo cal kï won pwodho ölök n’öya kodiko cön më pango etic më cïdhö tic ï pwodho ölök mërë. 2 Ën oyere ködgï më cülögï denario më tic pï nïnö acël ëka oorogï më cïdhö tic ï pwodho ölök mërë.

3 "Ën dökï öcïdhö ï kin caa adek cë önënö jö mökö n’ocung ï kabedo më cuk na ba tïmö gïnï gin mörö. 4 Ën okobo nïgï nï, ‘Un thon cïdh itii ï pwodho ölökna, cë an abino cülöwu cül n’opore.’ 5 Cë gïn thon öcïdhö.

"Ën dökï öcïdhö ï kin caa abicël më kiceng ëka caa abungwën yökö cë ötïmö kömanön thon. 6 Ï kin caa apar wie acël më kothyeno ën dökï öcïdhö yökö cë onwongo jö nökënë pod ocung gïnï kany nön. Ën openyogï nï, ‘Pïngö icung unu acunga kany anaka kodiko naka kothyeno na ba ïtïmö unu gin mörö?’

7 "Gïn ögamö nï, ‘Pïën ngat mörö ope n’opangowa,’

"Cë ën okobo nïgï nï, ‘Un thon cïdh itii unu ï pwodho ölökna.’

8 "Ï karë na dong othuno kothyeno, won pwodho ölök okobo both atic mërë na löö etic nï, ‘Cwod etic ëka ïmïïgï cülgï, cakërë kï both ngat n’epango kï cen naka both ngat n’ëcakö pango.’

9 "Etic n’epangogï ï kin caa apar wie acël më kothyeno obino ëka ögamö gïnï denario pï tic më nïnö acël. 10 Jö n’ëcakö pangogï ï pwodho më acël öthamö nï ebino cülögï na büp na löö më ka jö n’epangogï kï cen, ëntö gïn thon ëmïögï denario më tic pï nïnö acël. 11 Ï karë na gïn dong ögamö cülgï, öcakö gïnï ngüngüta ï kom won pwodho ölök nakun kobo gïnï nï, 12 ‘Jö n’epangogï ï pwodho kï cen otio gïnï pï caa acël këkën, ëka in ïcülögï na röm aröma ködwa nakun wan eyelere kï tic rwök ï ceng na lyeth.’

13 "Ëntö ën ögamö nï ngat acël kï ï kin-gï nï, ‘Okona, an ba ateri na rac. In ba iyeo nï ibino gamö denario më tic pï nïnö acël? 14 Gam cülni ëk ïcïdhï. An amïtö cülö dhanö n’epango kï cen cül na röm kï megi. 15 An ba atye kï twërö më tic kï jamina kite na an amïtö? Onyo wangi ocido pï gin na bër na an atïmö më mïö köny?’ "

16 Cë Yecu ojiko köp mërë nakun kobo nï, "Jö n’odong cen bino tëlö anyim ëka jö n’ötëlö anyim bino dong cen."

17 Ï karë na Yecu onwongo tye ka cïdhö yo Jerucalem, ën ökwanyö ëlübkörë apar wie arïö thenge kën-gï ëka okobo nïgï nï, 18 "Onu ëcïdhö yo Jerucalem, ëka Wod ka Dhanö ebino mïö ökö both ëlamdhök na dito ëka both epwony cïk. Gïn bino ngölö nïnë köp më thöö 19 ëka ebino mïö ën both erok ëk ëngal, epwod kï del ëka egur ï kor yath arïa. Ëntö ï nïnö më adek ebino cero ën ökö!"

20 Cë dhakö ka Jebedayo obino both Yecu k’awope mërë arïö, orumo cöngë pïny ï nyime cë ökwaö ën pï gin mörö.

21 Yecu openyo ën nï, "Ngö ënön na in ïmïtö?"

Ën ögamö nï, "Cikiri nï ibino mïö awopena arïö ni ëk ngat acël obed ï nget cingi kucem ëka acël ï nget cingi kucam ï kerni."

22 Yecu ögamö nïgï nï, "Ba ingeo unu gin na un itye ka penyo. Un ïtwërö madhö ekopo më can na an abino madhö?"

Gïn ögamö nï, "Wan ëtwërö."

23 Cë Yecu okobo nïgï nï, "Adyer un ibino modho k’ekopo më can na an abino modho ködë, ëntö më bedo ï nget cïnga kucem onyo kucam pathï an ënë ayërö. Kabedo nön bino bedo më jö n’Apapna öyübö pïrgï."

24 Ï karë na jö apar nökënë ca owinyo gïnï köp ni, gïn öngöö ï kom omego arïö rwök. 25 Cë Yecu ocwodogï kanya acël ëka okobo nïgï nï, "Un ingeo nï ëlöc k’erok löögï kï tëk ëka editegï ut kï twërö ï komgï. 26 Man myero kür obed nï kömanön ï kinwu. Ka ngat na mïtö bedo na dit kï ï kinwu, myero obed aticwu, 27 ëka ngat na mïtö bedo dhanö më acël myero obed opiiwu— 28 kite na Wod ka Dhanö ba obino nï ëk etii nïnë, ëntö më tic pï jïï, ëka më mïö kwö mërë më kökö jö na pol."

29 Ï karë na Yecu k’ëlübkörë onwongo tye ka yaa gïnï kï ï Jeriko, lwak na pol ölübö körë. 30 Ëthöö wang arïö onwongo obedo gïnï ï nget yoo, ëka ï karë na gïn owinyo nï Yecu onwongo tye ka wok kany nön, gïn oredo nï, "Rwoth, Wod ka Daudi, kïca omaki ï komwa!"

31 Lwak ocokogï nakun kobo gïnï nï ëk ölïng gïnï ökö, ëntö gïn ömëdërë kï redo rwök nï, "Rwoth, Wod ka Daudi, kïca omaki ï komwa!"

32 Yecu ocung ëka ocwodogï, cë openyogï nï, "Ngö na un ïmïtö nï an atïm niwu?"

33 Gïn ögamö nï, "Rwoth, wan ëmïtö nï wangwa öyabërë."

34 Kïca ömakö Yecu ï komgï ëka ën ogudo wang-gï. Cë cücüth wang-gï öyabërë ëka öcakö gïnï lübö körë.