1 Yecu ötwak ködgï dökï kï carolok gïnï nakun kobo nï: 2 "Ker më polo eporo kï rwoth n’öyübö karama më nyom pï wode. 3 Ën ooro etic mërë më cïdhö cwodo jö n’onwongo ecwodogï ï karama më bino, ëntö gïn ökwërö bino ökö.

4 "Cë ën dökï ooro etic nökënë nakun kobo nï, ‘Kob both jö n’onwongo ecwodogï nï an dong ayübö cemna ökö: Thwonina ëka dhok n’öcwë enekogï dong ökö, jami kïbëc dong tye kakarë. Bin unu ï karama më nyom.’

5 "Ëntö jö n’ecwodogï ï nyom ökwërö gïnï winyo köp nön, cë öcïdhö gïnï ökö—ngat acël öcïdhö ï pwodho mërë ëka ngat nökënë öcïdhö ï cath mërë. 6 Jö nökënë ömakö etic mërë cë opwodogï rwök ëka onekogï ökö. 7 Akëmö ömakö rwoth cë ooro acikari mërë më neko enek nonu ëka wangö pacögï ökö.

8 "Cë ën okobo both etic mërë nï, ‘Karama më nyom ëyübö dong ökö, ëntö jö n’onwongo an acwodogï ba opore gïnï më bino. 9 Cïdh unu ï yodhi ëk icwod ngat mörö këkën na un ibino nwongo ëk obin ï karama më nyom.’ 10 Cë etic öcïdhö ëka ocwodo gïnï jö kïbëc na gïn onwongo ï yodhi, jö na bëcö ëka jö na reco cë öt më nyom opong kï wele.

11 "Ëntö ï karë na rwoth obino më nënö wele, ën önënö dhanö mörö na ba oruko böngü na bër më nyom kunön. 12 Cë openyo ën nï, ‘Okona, idonyo kany nïngö na ba iruko böngü na bër më nyom?’ Ëntö ën ölïng alïnga.

13 "Cë rwoth okobo both etic mërë nï, ‘Twe unu cïngë ëka tyënë ëk ibol unu ën yökö, ï pïny na cöl, kanya koko ëka kaö lak bino bedo ïë.’

14 "Pïën jö n’ecwodogï pol ëntö jö n’ëyërögï nönök."

15 Cë Eparicayo öcïdhö öyübö gïnï köp kite na myero ëmak gïnï kï Yecu kï köp mörö na yaa kï ï dhögë. 16 Gïn ooro ëlübkörgï ëka jö na cwakö Erode më penyo Yecu nï, "Apwony, wan engeo nï in ikobo köp adyer ëka ipwonyo köp k’Obanga na lübërë kï köp adyer. In ba ïparö dhanö mörö, pïën ba ïnënö dhanö kï yökö. 17 Kob nïwa thamani: Pore më cülö ocoro both Cija onyo pe?"

18 Ëntö Yecu ongeo thamagï ökö cë openyogï nï, "Un etwodo, pïngö un itye ka tëmöna? 19 Nyuth unu nïna cïlïng mörö na nyïng n’ëcülö pï ocoro." Cë gïn okelo nïnë denario acël, 20 ëka ën openyogï nï, "Cal ëka cöc n’ëcöö ïë obedo më ka nga?"

21 Gïn ögamö nï, "Më ka Cija."

Cë ën okobo nïgï nï, "Mïï unu jami ka Cija both Cija ëka jami k’Obanga both Obanga."

22 Ï karë na gïn owinyo köp ni, obedo gïnï kï ur rwök. Cë öwëkö gïnï ën ëka öcïdhö gïnï ökö.

23 Ï nïnö nön kikokome, Ecadukayo na kobo gïnï nï cer ka jö n’öthöö ope obino gïnï both Yecu ëka openyo gïnï ën nï, 24 "Apwony, Muca yam okobo nïwa nï ka ëcwö mörö öthöö na ba önywölö ëthïnö, ömïn mërë myero ölak dhakö mërë ëk önywöl ëthïnö nakaka ömïn mërë n’öthöö.✝ 25 Yam onwongo tye utmego abïrö ï kinwa kany. Dhanö më acël obino önyömö dhakö ëka öthöö ökö na ba önywölö ëthïnö, cë ën öwëkö dhakö mërë both ömïn mërë. 26 Ömïn mërë më arïö nön thon obino öthöö ëka më adek naka otyeko jö abïrö nonu kïbëc. 27 Ï ajiki mërë, dhakö thon obino öthöö. 28 Cë dong ï karë më cer, dhakö nön bino bedo më ka nga kï kin jö abïrö nonu, nakun dhakö nön onwongo obedo mëgï kïbëc?"

29 Yecu ögamö nï, "Un irwenyo ökö pïën ba ingeo unu Cöc na Leng onyo tëkö k’Obanga. 30 Ï karë më cer, jïï ba bino nyom onyo ënyömögï; ëntö gïn bino bedo calö emalaika na tye ï polo. 31 Ëntö köp ï kom cer ka jö n’öthöö—un ïkwanö ngö n’Obanga okobo niwu nï, 32 ‘An abedo Obanga k’Abraam, Obanga ka Icaka ëka Obanga ka Jakob’✝ Ën ba obedo Obanga ka jö n’öthöö ëntö Obanga ka jö na kwö."

33 Ï karë na lwak owinyo köp ni, obedo gïnï kï ur rwök ï kom pwony mërë.

34 Ï karë n’Eparicayo owinyo nï Yecu otweo dhö Ecadukayo ökö, gïn öcakö cökërë kanya acël. 35 Ngat acël kï ï kin-gï na ngeo cïk rwök ötëmö ën kï peny ni: 36 "Apwony, cïk mënë ënë dit na löö kï ï cïk?"

37 Yecu ögamö nï: " ‘Mar Rwoth Obangani kï cwinyi kïbëc, ëka kï tiponi kïbëc, ëka kï thamani kïbëc.’✝ 38 Man ënë cïk më acël ëka cïk na dit na löö kïbëc. 39 Ëka cïk më arïö cal ködë: ‘Mar awodhi na calö ïmarö komi keni.’✝ 40 Cïk kïbëc ëka pwony k’Edwarpïny ocung gïnï ï kom cïk arïö ni."

41 Ï karë n’Eparicayo öcökërë gïnï kanya acël, Yecu openyogï nï, 42 "Ngö na un ïthamö ï kom Meciya? Ën obedo wod ka nga?"

Gïn ögamö nï, "Wod ka Daudi."

43 Ën okobo nïgï nï, "Pïngö Tipo Naleng ömïö Daudi ocwodo ën nï ‘Rwoth’? Pïën okobo nï,

44 " ‘Rwoth okobo both Rwodha nï,

"Bed ï nget cïnga më kucem

naka ka an aketho langni

ï thë tyeni." ’✝

45 Ka Daudi cwodo ën nï ‘Rwoth,’ ën twërö bedo wode nïngö?" 46 Ngat mörö ope n’onwongo twërö gamö köp mërë, ëka cakërë ï nïnö nön ngat mörö ope dökï n’öthamö më penyo ën peny mörö gïnï.