1 Yecu öya kï ï öt k’Obanga. Na ën tye ka woth, ëlübkörë obino bothe cë gïn onyutho nïnë gedo më öt k’Obanga. 2 Ën openyogï nï, "Ïnënö unu jami ni kïbëc? An akobo niwu köp adyer nï ba ebino wëkö kidi mörö acël dong n’ododere ï wi awodhe na ba ebino thwaro ökö pïny."

3 Ï karë na Yecu obedo pïny ï wi Kidi më Jeituni, ëlübkörë obino bothe ï müng cë okobo gïnï nï, "Kob nïwa, man bino tïmërë awene, ëka ngö na bino nyutho dwogoni ëka ajiki pïny?"

4 Yecu ögamö nï: "Gwökërë unu ëk ngat mörö kür öbwölwu. 5 Pïën jö na pol bino bino gïnï kï nyïnga na bino gïnï kobo nï, ‘An ënë Meciya,’ ëka bino bwölö jö na pol. 6 Un ibino winyo köp ï kom lwëny ëka anïï më lwëny, ëntö kür ibed unu kï lworo. Pïën manön myero ötïmërë, ëntö ajiki nwongo podi. 7 Rok bino lwëny ï kom rok nökënë, ëka ker bino lwëny ï kom ker nökënë. Kec ëka oyeyeng bino bedo ï kabedo na papath. 8 Man kïbëc nwongo pod obedo calö acaki rem më nywöl.

9 "Ï karë nön ebino maköwu, eketho ayela ï komwu ëka ebino nekowu. Rok kïbëc bino dagöwu pïra. 10 Cë ï karë nön, jö na pol bino lökërë gïnï ökö kï kom yee, bino ketho gïnï örörö ëka adagë ï kin-gï kën-gï. 11 Edwarpïny na twot bino bino na pol ëka bino bwölö gïnï jö na pol. 12 Tïm na reco bino mëdërë, ëka mar ka jö na pol bino kwe ökö, 13 ëntö ngat na bino cung na tëk naka ï ajiki bino larë. 14 Ëka köp më Emuth na Bër më ker k’Obanga ebino tïtö ï wi lobo kïbëc më bedo na calö caden both rok kïbëc, cë ajiki pïny dong bino.

15 "Un ibino nënö ‘gin mörö më kwer na kelo lworo’✝ na yam adwarpïny Daniel okobo. Gin nön bino cung ï kabedo na leng. (Ëk ngat na kwanö önïang ïë.) 16 Cë jö na tye ï Yudea myero örïng gïnï ökö ï wi kite. 17 Dhanö na tye ï wi ödë kür oidhi pïny më kwanyö gin mörö kï ï öt. 18 Dhanö na tye ï pwodho kür ödök cen më ömö böngü mërë. 19 Mon na yeco ëka mon na dödhö ëthïnö bino nënö can ï karë nonu! 20 Lëg unu both Obanga ëk ngwëcwu kür ötïmërë ï karë më cwïr onyo ï ceng Cabït. 21 Pïën karë nonu bino bedo karë më can na dwong na anaka yam bara onen ï acaki më cweno lobo naka tin ëka ba dökï bino nen. 22 Ka nïnö nonu onwongo ba ëjükö na cek, ngat mörö onwongo ope na bwöth. Ëntö pï jö n’ëyërögï nïnö nonu ebino jükö na cek. 23 Ï karë nön ka dhanö mörö okobo niwu nï, ‘Nën, Meciya ene,’ onyo nï, ‘Ën ëca,’ kür iyee unu. 24 Pïën jö na kobo nï gïn ebedo Kiricito ëka edwarpïny na twot bino bino ëka bino tio gïnï anyuth ëka tango na dito ëk ka twërë ëbwöl gïnï naka jö n’ëyërögï. 25 Winy unu, an atyeko dong kobo ökö niwu na karë bara örömö.

26 "Dong ka ngat mörö okobo niwu nï, ‘Ën ëca tye ï thim,’ kür ïcïdh unu, onyo nï, ‘Ën tye kany, ï öt ï thë tyëlö,’ kür iyee unu. 27 Pïën kite na lüth köth yaa kï kukïdë wïl dök yo kuthö, bino ka Wod ka Dhanö thon bino bedo nï kömanön. 28 Kanya lyene tye ïë, acuth bino cökërë gïnï kunön.

29 "Cücüth kinge can na dwong më nïnö nonu

" ‘ceng bino cido,

ëka dwe ba bino mïö tara mërë;

cër bino podho kï ï polo yo pïny

ëka twër kïbëc më polo bino yengere gïnï.’✝

30 "Ï karë nön anyuth ka Wod ka Dhanö bino nen ï polo, ëka rok kïbëc më wi lobo bino gïnï kumo. Gïn bino nënö Wod ka Dhanö na tye ka bino k’edou më pöl kï tëkö ëka dheo na dit. 31 Ën bino oro emalaika mërë kï cwodo më buruji na longo, ëka gïn bino cökö jögë n’ëyërögï kï ï wi lobo thükül, kï ï ajiki polo kucël naka yo ajiki polo tung ca.

32 "Nwong unu pwony ni kï ï kom yath ölam: Ka jangë öcakö löth ëka pote odonyo, un ingeo nï oro dong cwök. 33 Kömanön thon ka ïnënö unu jami ni kïbëc, nge unu nï karë dong cwök, tye ï dholokek. 34 An akobo niwu köp adyer, rok më karë ni ba bino poth naka ka jami ni kïbëc ötïmërë. 35 Polo ëka lobo bino thum ökö, ëntö köpna ba bino thum.

36 "Ngat mörö ope na ngeo nïnö nön onyo caa, kadï thon emalaika na tye ï polo, onyo Wod,* ëntö Apap këkën ënë ngeo. 37 Bino ka Wod ka Dhanö bino bedo calö karë ka Noa. 38 Ï karë nonu n’onwongo abwal pii bara opong ï wi lobo, jïï onwongo cemo ëka medho gïnï, awope nyomo ëka anyira ënyömögï, naka othuno ï nïnö na Noa ödönyö ï yeya. 39 Gïn ba ongeo gin mörö na bino tïmërë naka abwal pii obino ömöl ködgï ökö kïbëc. Bino bedo nï kömanön ka Wod ka Dhanö bino dwogo. 40 Ï karë nön jö arïö bino bedo ï pwodho; ebino kwanyö ngat acël ökö cë ngat acël bino dong. 41 Mon arïö bino bedo ï rego kï pong rego; ebino kwanyö ngat acël ökö cë ngat acël bino dong.

42 "Pï manön bed unu na wangwu thwolo, pïën ba ingeo unu nïnö mënë na Rwothwu bino dwogo ködë. 43 Ëntö myero ïnïang unu köp ni: Ka won öt onwongo ongeo caa na kwo bino bino ïë, ën onwongo bedo na wangë thwolo ëka ba mïö ëtürö ödë. 44 Pï manön, un thon myero ïyübërë, pïën Wod ka Dhanö bino bino ï caa na un ba ingeo.

45 "Cë nga dong n’obedo atic na genere ëka na ryëk, n’adwong mërë oketho ën më löönö etic na tye ï ödë më mïögï cemgï ï caa n’opore? 46 Bino bedo na bër both atic nön ka adwong mërë odwogo cë onwongo ën tye ka tïmö nï kömanön. 47 An akobo niwu köp adyer, ën bino ketho ën më löönö jami mërë kïbëc. 48 Ëntö ka atic na rac nön okobo kï ï cwinye kënë nï, ‘Adwongna bino bedo yökö pï karë na lac,’ 49 ëka ën cakö pwodo etic ewodhe, cemo ëka medho kï jö na mër. 50 Adwong k’atic nön bino dwogo ï nïnö ëka ï caa na ën ba ngeo. 51 Cë ën bino pwodo ën rwök ëka ketho ën ï kabedo kanya acël k’etwodo, kanya koko ëka kaö lak bino bedo tye ïë.