1 Ï karë na Yecu otyeko twakö köp ni gïnï kïbëc, ën okobo both ëlübkörë nï, 2 "Un ingeo nï odong nïnö arïö më thünö ï nïnö më Poth, ëka Wod ka Dhanö ebino mïö ökö më agura ï kor yath arïa."

3 Cë ëlamdhök na dito ëka edite ka lwak öcökërë gïnï kanya acël ï pacö k’Alamdhök na Dit, na nyïngë Kayapa. 4 Gïn öyübö më makö Yecu ï müng ëk enek ën ökö. 5 Ëntö gïn okobo nï, "Pathï ï nïnö më karama, ëk arubaruba kür obed ï kin jïï."

6 Ï karë na Yecu tye ï Betania ï öt ka Cimon na yam obedo adhöbü, 7 na Yecu onwongo tye ka cem, dhakö mörö obino bothe n’ömakö cupa më möö na ngwece kur na wel mërë tëk, cë önyö ï wie.

8 Ï karë n’ëlübkörë önënö, gïn öngöö ëka okobo nï, "Pïngö ëbalö möö ni abala nï köman? 9 Möö na kur ni onwongo myero ëcadh acadha ï wel na thwönë ëk cïlïng mërë ëmïï both ëcan."

10 Ëntö Yecu ongeo köp ni, cë okobo bothgï nï, "Iyelo unu dhakö ni pïngö? Ën ötïmö gin na bër rwök ï koma. 11 Pïën un itye kanya acël k’ëcan karë kïbëc, ëntö ba ibino unu bedo kanya acël köda karë kïbëc. 12 Ï karë na dhakö ni önyö möö ï koma, ën ötïmö më yübö koma më aika. 13 An akobo niwu köp adyer nï kanya kïbëc n’ebino tïtö köp më Emuth na Bër ïë ï wi lobo thükül, gin na dhakö ni ötïmö thon ebino kobo pïrë, ëk obed më po pï ën."

14 Ï karë nön Yuda Ikariot, na ën dhanö acël ï kin ëkwëna apar arïö, öcïdhö both ëlamdhök na dito, 15 cë openyogï nï, "Un ibino mïöna ngö ka an amïö ën ï cïngwu?" Cë gïn ökwanö cïlïng pyer adek na nyige ëka ömïö gïnï bothe. 16 Cakërë ï caa nön cïdhö ködë anyim Yuda öcakö rangö karë na bër na ën ërömö mïö kï Yecu ï cïng-gï.

17 Ï nïnö më acël më Karama më Ogati na Thöbï ope ïë, ëlübkör Yecu obino bothe cë openyo gïnï ën nï, "In ïmïtö nï wan ëyüb nini kabedo kwene ëk ïcam cem më Poth ïë?"

18 Yecu ögamö nï, "Cïdh unu ï taun both dhanö mörö ëka ikob unu nïnë nï, ‘Apwony okobo nï: Karëna dong cwök. An abino kwero nïnö më Poth ï odi kanya acël k’ëlübköra.’ " 19 Cë ëlübkör Yecu ötïmö kite na ën öcïkögï ködë, ëka öyübö gïnï cem më Poth kunön.

20 Ï karë na pïny dong oyutho, Yecu onwongo obedo pïny ï dhö cem kanya acël k’ëlübkörë apar wie arïö. 21 Ï karë na gïn tye ka cem, Yecu okobo bothgï nï, "An akobo niwu köp adyer, ngat acël kï kinwu bino ketho örörö ï koma."

22 Cë ëlübkörë öcakö kumo, nakun penyere gïnï kën-gï nï, "Rwoth, an?"

23 Yecu ögamö nï, "Dhanö na bino ketho örörö ï koma ënë ngat n’olutho ogati mërë ï öd bakuli köda. 24 Wod ka Dhanö bino thöö kite na calö ëcöö kï köp ï kome. Ëntö dhanö n’oketho örörö ï kom Wod ka Dhanö bino nënö can! Onwongo twërö bedo na bër ka dhanö nön onwongo ba ënywölö."

25 Cë Yuda, ngat n’oketho örörö ï kom Yecu, okobo nï, "Apwony, adyer pathï an?"

Yecu ögamö nï, "Eyo, in ënön."

26 Ï karë na gïn tye ka cem, Yecu ökwanyö ogati, cë ölëgö gum ï kome, ëka öbarö ïë, cë ömïö both ëlübkörë, nakun kobo nï, "Gam ëka ïcam unu; man ënë koma."

27 Cë ökwanyö okopo, öpwöyö Obanga ëka ömïö bothgï, nakun kobo nï, "Madh unu man, un kïbëc. 28 Man ënë remona më cïkërë, n’ëönyö pï jö na pol më tïmö kïca ï kom bal. 29 An akobo niwu nï cakërë tin, an ba abino madhö nyig pig ölök ni, naka ï nïnö nön ka an abino madhö kodwu ï ker k’Apapna."

30 Ï karë na gïn otyeko wero wer më lëga, öya öcïdhö gïnï ï wi Kidi më Jeituni.

31 Cë Yecu okobo nïgï nï, "Ï kiwor na tin, un kïbëc ibino unu wëköna, pïën ëcö nï:

" ‘An abino gönö akwath,

cë rom bino këth gïnï ökö ata.’✝

32 Ëntö kinge ka an acer ökö, an abino cïdhö anyim niwu yo Galilaya."

33 Petero ögamö nï, "Kadï jö kïbëc bino wëköni, an ba abino wëköni."

34 Yecu okobo nïnë nï, "An akobo nini köp adyer nï ï kiwor na tin ni, na thwön gwënö bara okok, in ibino kwëröna wang adek."

35 Ëntö Petero ögamö nï, "Kadï bed nï myero athöö kanya acël kodi, an ba abino kwëröni." Cë ëlübkörë nökënë kïbëc okobo gïnï nï kömanön.

36 Cë Yecu öcïdhö k’ëlübkörë ï kabedo mörö na nyïngë Gethcemane. Ï karë na gïn othuno kunön, ën okobo both ëlübkörë nï, "Bed unu kany, ëk an kono acïdh ï lëga yo kuca." 37 Cë ën ökwanyö Petero k’awope arïö ka Jebedayo më woth ködë, ëka cwinye öcakö podho rwök kï thwön kumo na dit. 38 Cë Yecu okobo bothgï nï, "Cwinya tye ka cwer rwök, mïtö nekona ökö. Bed unu kany ëk ibed unu na wangwu thwolo köda."

39 Yecu öcïdhö anyim na nönök, cë opodho pïny, okulo wie ëka ölëgö nï, "Apapna, ka twërë, kwany okopo ni ökö kï koma, ëntö kür obed kite na calö an amïtö, ëntö obed gin na in ïmïtö nï myero ötïmërë."

40 Cë ën odwogo both ëlübkörë ëka onwongogï önïnö ökö. Ën okobo both Petero nï, "Un ba ïtwërö bedo na wangwu thwolo pï caa acël köda? 41 Bed na wangwu thwolo ëka ïlëg unu, ëk kür ïdöny unu ï atëmatëma. Cwiny mïtö, ëntö kom görü."

42 Ën dökï ödök wang më arïö ëka ölëgö nï, "Apapna, ka okopo ni ba twërö kwanyërë ökö naka ka an amadhö, ëk dong gin na in ïmïtö ötïmërë."

43 Ï karë na ën odwogo, ën dökï onwongo ëlübkörë tye ka nïnö, pïën nïnö onwongo ömakö wang-gï rwök. 44 Cë Yecu öwëkögï dökï ëka öcïdhö ölëgö wang më adek, nakun nwö köp acël nön.

45 Cë ën odwogo both ëlübkörë ëka openyogï nï, "Un pod ïnïnö ëka itye ka yweo unu? Nën unu, caa onyingo na cwök, ëka Wod ka Dhanö ebino mïö ökö ï cïng ëbal. 46 Yaa unu malö! Eru ecidhu! Nën, dhanö na bino ketho örörö ï koma dong cwök!"

47 Ï karë na Yecu pod tye ka twak, Yuda n’obedo ngat acël ï kin ëkwëna apar wie arïö othuno. Ën obino kï lwak na pol n’ömakö gïnï pele abadë ëka ludhi. Ëlamdhök na dito ëka edite ka lwak ënë oorogï. 48 Won örörö onwongo otyeko dong yübö anyuth ködgï nï: "Ngat na an abino nödhö leme, ën ënön, mak unu ën." 49 Cücüth Yuda obino both Yecu ëka okobo nï, "Apwony, itye!" Cë önödhö leme.

50 Yecu okobo both Yuda nï, "Okona, tïm gin na in ibino më tïmö." Cë gïn obino opodho ï kom Yecu, ëka ömakö gïnï ën ökö.

51 Ëntö ngat acël n’onwongo tye gïnï kï Yecu kanya acël öryëö cïngë cë öwödhö pala abadë mërë, onguno kï ith atic k’Alamdhök na Dit.

52 Cë Yecu okobo bothe nï, "Dwök pala abadëni ï kabedo mërë, pïën jö kïbëc na makö gïnï pala abadë, bino thöö gïnï kï pala abadë. 53 Un ïthamö nï an ba atwërö lëgö Apapna ëk oor nïna emalaika na löö dul mwony apar wie arïö ökö ï caa ni? 54 Ëntö Cöc na Leng na kobo nï myero ötïmërë nï köman bino cobere nïngö?"

55 Ï caa nön Yecu okobo both lwak nï, "Un ibino botha kï pala abadë ëka ludhi më maköna, na calö ibino unu ï kom ayak? Nïnö kïbëc an abedo ï dyekal öt k’Obanga më pwony, ëka un ba ïmaka unu. 56 Ëntö man kïbëc ötïmërë ëk köp n’edwarpïny öcöö ocobere." Cë ëlübkörë kïbëc örïngö öwëkö gïnï ën ökö.

57 Jö n’onwongo ömakö gïnï Yecu otero ën yo both Kayapa, Alamdhök na Dit, kanya onwongo epwony cïk ëka edite öcökërë gïnï ïë. 58 Ëntö Petero obedo ka lübö kör Yecu kï cecen, naka othuno ï dyekal k’Alamdhök na Dit. Kinge na Petero ödönyö ï dyekal, ën obedo pïny kanya acël k’ëkürpïny më nënö gin na bino tïmërë.

59 Ëlamdhök na dito ëka athuko më öd okiko k’edong kïbëc onwongo tye gïnï ka rangö caden më twodo ï kom Yecu ëk enek gïnï ën ökö. 60 Ëntö gïn ba onwongo köp mörö, kadï bed ecaden më twodo na pol obino anyim. Më ajiki mërë jö arïö obino gïnï anyim, 61 ëka okobo gïnï nï, "Dhanö ni okobo nï, ‘An atwërö muko öt k’Obanga ëka agërö ökö ï nïnö adek.’ "

62 Cë Alamdhök na Dit öya malö ëka okobo both Yecu nï, "In ba ïtwërö gamö köp mörö? Kit caden mënë ene na jö ni okelo k’adoth ködë ï komi?" 63 Ëntö Yecu ölïng alïnga.

Alamdhök na Dit okobo nïnë nï, "An amïtö ikwong kwong kï nyïng Obanga na kwö: Kob nïwa ka in ënë Meciya, Wod k’Obanga."

64 Yecu ögamö nïnë nï, "Eyo, kite na in ikobo ködë. Ëntö an akobo niwu nï cakërë kobedini un ibino nënö Wod ka Dhanö n’obedo ï nget cïng më kucem ka Won Twër ëka na tye ka bino kï pöl gïnï më polo."

65 Cë Alamdhök na Dit öyëcö böng mërë ëka okobo nï, "Ën ötwakö köp më yanyö Obanga! Pïngö onu dökï ëmïtö caden nökënë? Kobedini un iwinyo ayeny na ën öyanyö k’Obanga. 66 Ngö na un ïthamö?"

Gïn ögamö nï, "Bal mërë römö nïnë thöö."✝

67 Cë gïn öngülö laö dhögï ï wangë ëka ëgöö ën. Jö mökö odhongo ën 68 nakun kobo gïnï nï, "In ibedo Meciya. Tuc nïwa nga n’ogoi?"

69 Petero onwongo tye yökö, obedo pïny ï dyekal. Cë atic na nyakö obino bothe ëka okobo nïnë nï, "In thon onwongo itye kanya acël kï Yecu më Galilaya."

70 Ëntö Petero ökwërö ökö ï nyim jö kïbëc. Ën okobo nï, "An ba angeo gin na in itye ka twakö."

71 Cë Petero öcïdhö yökö ï dhö wangkac, atic na nyakö nökënë dökï önënö ën, cë okobo both jö n’onwongo tye gïnï kunön nï, "Dhanö ni onwongo tye kanya acël kï Yecu më Najaret."

72 Petero dökï ökwërö ökö, nakun kwongere nï: "An ba angeo ëcwö nön!"

73 Kinge caa na nönök, jö n’onwongo ocung gïnï kany nön obino gïnï both Petero ëka okobo nï, "Adyer, in ibedo ngat acël ï kin-gï, pïën kite na in ïtwak ködë nyutho ökö."

74 Cë ï caa nön, Petero öcakö kwongere nakun kobo nï, "Ba angeo ëcwö ni."

Cücüth thwön gwënö okok. 75 Cë Petero opo ï köp na Yecu ötwakö: "Na bara thwön gwënö okok, in ibino kwëröna wang adek." Cë öcïdhö yökö ëka okok kï cwer cwiny rwök.