1 Kinge Cabït k’Eyuda, ï kin keko ï nïnö na lübö cabït k’Eyuda, Maria më Magadala ëka Maria nökënë öcïdhö gïnï më nënö lyël.

2 Athura oyeyeng na dit oyengo pïny, pïën malaika ka Rwoth n’öya kï ï polo obino pïny cë othwaro kidi ökö kï ï dhö lyël ëka obedo ï wie. 3 Malaika nön onen na ryëny calö lüth köth, ëka böng mërë onwongo tar calö pëë. 4 Ëkürpïny obedo gïnï kï lworo rwök ï karë na gïn önënö malaika ëka komgï ömyël cë ödökö gïnï calö jö n’öthöö.

5 Ëntö malaika okobo both mon nï, "Kür ibed unu kï lworo, pïën an angeo nï un itye ka rangö Yecu n’onwongo eguro ï kor yath arïa. 6 Ën ba tye kany; ën ocer ökö, kite na ën okobo. Bin ïnën unu kanya ën onwongo obuto ïë. 7 Cïdh unu pïöpïö ëk ikob unu both ëlübkörë: ‘Ën ocer ökö kï kin jö n’öthöö, ëka ën tye ka cïdhö anyim niwu yo Galilaya. Un ibino nënö ën kï kunön.’ Po unu ï kom ngö na an akobo niwu."

8 Cë mon öbünyö yaa ökö pïöpïö kï ï wi lyël kï lworo ëka kï yom cwiny na thwönë, cë örïngö gïnï më cïdhö kobo both ëlübkörë. 9 Athura Yecu oromo ködgï, cë omothogï nï, "Kuc obed kodwu!" Gïn obino bothe, ömakö gïnï tyënë cë öwörö gïnï ën. 10 Cë Yecu okobo nïgï nï, "Kür ibed unu kï lworo. Cïdh ikob unu both utmegona ëk öcïdh gïnï yo Galilaya; cë gïn bino nënöna kï kunön."

11 Ï karë na mon tye ka woth ï yoo, ëkürpïny mökö öcïdhö ï taun ëka ödwökö gïnï ripot both ëlamdhök na dito gin na kïbëc n’ötïmërë. 12 Ï karë n’ëlamdhök na dito öcökërë gïnï kanya acël k’edite, cë öyübö gïnï köp më mïö cïlïng na thwönë both acikari, 13 nakun kobo gïnï bothgï nï, "Kob unu both lwak nï, ‘Ëlübkörë obino gïnï kiwor cë ökwalö gïnï kome ï karë n’onwongo wan ënïnö ökö.’ 14 Ka alöc bino winyo köp ni, cë wan ebino kobo nïnë, ëk can mörö kür opodh ï komwu." 15 Cë acikari ögamö gïnï cïlïng, ëka ötïmö gïnï kite n’ëcïkögï ködë. Köp ni obedo këth ï kin Eyuda othuno ködë naka tin.

16 Cë ëlübkörë apar wie acël öcïdhö gïnï yo Galilaya, ï wi kidi na Yecu onwongo okobo bothgï më cïdhö ïë. 17 Ï karë na gïn önënö Yecu, öwörö gïnï ën; ëntö jö mökö obedo k’akalakala. 18 Cë Yecu obino bothgï ëka okobo nï, "Twër kïbëc na tye ï polo ëka ï wi lobo etyeko dong mïö ökö botha. 19 Pï manön cïdh unu dong ëk ïlök unu jö më rok kïbëc ödök gïnï ëlübköra, baticagï unu kï nyïng Apap, ëka Wod ëka Tipo Naleng, 20 pwony unugï më gwökö gin na kïbëc na an atyeko cïköwu ködë. An atye kodwu karë kïbëc, naka ï ajiki pïny."