1 Ï karë nonu Jon Abatica obino nakun tïtö köp k’Obanga ï thim më Yudea 2 ëka kobo nï, "Ngut unu, pïën ker më polo onyingo na cwök." 3 Man ënë ngat n’adwarpïny Icaya ötwakö pïrë:

"Dwön dhanö mörö tye ka redo ï thim nï,

‘Yüb unu yoo pï Rwoth,

mïï unu yoo ocung atïr nïnë.’ "✝

4 Jon onwongo ruko böng n’ëyübö kï kom yer kïnaga, ëka onwongo tweo wang pyërë kï del. Cem mërë onwongo obedo bonyo ëka möö kic më thim. 5 Jïï onwongo yaa kï ï Jerucalem, kï ï lobo Yudea kïbëc ëka kï ï lobo kïbëc na tye ï nget kulo Jordan më cïdhö bothe. 6 Gïn onwongo tuco balgï ëka Jon baticagï ï kulo Jordan.

7 Ëntö ka ën önënö Eparicayo ëka Ecadukayo tye ka bino kanya ën onwongo tye ka batica jïï ïë, ën okobo bothgï nï: "Un ëthïn ororo! Nga n’okobo niwu nï ïrïng unu kï ï akëmö k’Obanga na tye ka bino? 8 Tii unu dong gin na nyutho nï ingut unu. 9 Kür dök ïtham unu më kobo nï, ‘Wan etye k’Abraam na calö apapwa.’ An akobo niwu nï kï kom kite ni Obanga twërö mïö ëkwaë k’Abraam donyo kï ïë. 10 Kobedini dong etyeko ketho atong ï tyën orii yen, ëka yath mörö na ba nyakö nyige na bër ebino tongo ökö pïny cë ebolo ï mac.

11 "An abaticawu kï pii më nyutho nï ingut unu ökö kï kom balwu, ëntö ngat na bino kï köra tëk na löa ökö, an ba apora më ködö wörë. Ën bino baticawu kï Tipo Naleng ëka kï mac. 12 Odheru mërë tye ï cïngë, ëka ën bino yübö larü moo mërë, cë cökö kal mërë ketho ï dërö ëka wangö cüngë kï mac na ba thöö."

13 Cë Yecu öya kï ï Galilaya öcïdhö yo kulo Jordan, ëk Jon obatica ën. 14 Ëntö Jon ötëmö kwërö ökö nakun kobo nï, "An amïtö nï in ënë ibatica an, ëntö pïngö in dökï ibino nï an abatica in?"

15 Yecu ögamö nï, "Wëk ötïmërë nï kömanön kobedini; pïën pore nï ön më cobo gin na kïbëc më kite atïr." Cë Jon oyeo.

16 Kinge na dong Yecu ebatica, cë ën odonyo malö kï ï pii. Cücüth ï caa nön polo öyabërë, ëka ën önënö Tipo k’Obanga ka bino calö amam, cë opye ï kome. 17 Cë dwön mörö owinyere kï ï polo na kobo nï, "Man ënë Woda më amara; na ïya yom ï kome."