1 An dong apenyo: Obanga obino ökwërö jögë? Ba ökwërö! An kikoma abedo dhanö më Icarael, akwar Abraam, n’öya kï ï kaka ka Benjamin. 2 Obanga ba ökwërö jögë, na ën ongeogï cön. Un ingeo gin na Cöc na Leng kobo ï kom Eliya—kite na ën ökwaö Obanga ëk opwod jö Icarael: 3 "Rwoth, oneko gïnï edwarpïnyni ëka örëdhö gïnï keno tyërni gïnï ökö; an këna ënë adong, ëka mïtö gïnï nekona!"✝ 4 Cë Obanga ögamö nïnë nïngö? Ën ögamö nï, "An agwökö jö na mëga elip abïrö n’odong na ba orumo cöng-gï pïny më wörö Baal." 5 Ï kit yoo acël nön, tye jö mökö n’odong ï karë ni n’Obanga öyërögï pï kïca mërë. 6 Ëka ka pï kïca, cë ba dökï bedo pï tic; ka onwongo ba obedo pï kïca, cë kïca onwongo ba dökï mëdërë më bedo kïca.

7 Cë ngö dökï? Jö Icarael ba onwongo gïnï gin na gïn obedo rangö, ëntö jö n’ëyërö këkën ënë onwongo. Jö nökënë cwinygï ödökö na nwang, 8 kite na calö ëcöö ködë nï:

"Obanga ömïögï cwiny n’odhil,

ömïö wang-gï ba neno,

ëka ithgï ëk kür owiny gïnï köp,

naka tin."✝

9 Daudi okobo nï,

"Mïï mëjagï më cem obed owico ëka pawaka na makögï,

ëk obed gin na mïögï twomere më cülö wang balgï.

10 Mïï wang-gï öthöö ökö ëk kür önën gïnï pïny,

ëka ïmïï wang pyërgï ogom ökö na twal."✝

11 An dökï apenyo: Jö Icarael otwomere ëk opodh gïnï pïny na ba twërö yaa gïnï malö? Pathï kömanön! Ëntö pï balgï ënë ömïö larë obino naka both Erok ëk ömïï nyeko ömak jö Icarael. 12 Ka balgï dong okelo gum both lobo ëka thon gin na gïn orwenyo kelo gum both Erok, bër mërë dong bino bedo na röm kwene ka gïn odwogo kïbëc ökö!

13 An atye ka twak kodwu un Erok. Dong kite na calö an abedo akwëna both Erok, an abino wakara pï ticna. 14 An atye kï gen nï abino mïö nyeko makö jö më rokna ëk ömïï alar jö mökö kï ï kin-gï. 15 Ï karë n’ëkwërö jö Icarael ökö, Obanga ödwökö lobo kïbëc yo bothe më rïbërë ködë. Bino bedo nïngö ka ëgamögï? Bino bedo na calö kwö n’öya kï ï kin jö n’öthöö. 16 Ka mökö na nönök n’ëtyërö both Obanga calö wi cem ëmïö obedo na leng, cë mökö kïbëc nwongo bedo na leng. Ka orii yath leng, cë jangë kïbëc thon bedo na leng.

17 Ëntö ka jangë mökö ëtürö ökö kï ï kom yath jeituni na bër, ëka ëtürö jang jeituni mörö më thim cë ëcömö ï kom yath jeituni na bër ca, cë dong cakö nywakö pig yath na bër më jeituni ca. Un Erok ïcal unu kï jang yath jeituni n’ëjakö kï ï thim. 18 Kür iwakiri ï kom jang yath nökënë gïnï ca. Ka in iwakiri, po nï in ba itingo orii yath malö, ëntö orii yath ënë otingi malö. 19 In ibino kobo nï, "Jang yath gïnï onwongo ëtürö ökö ëk ömïï ëcöma ï kom yath." 20 Adyer, ëtürögï ökö pïën gïn ba oyee ï kom Obanga, in pod icung pïën yeeni tye. Kür ibed k’awaka ëntö bed kï lworo. 21 Ka Obanga ba öwëkö jang yath kikome, cë in thon ba ebino wëköni pïën in ba iyee.

22 Nën kïca k’Obanga ëka gero mërë: ën ger ï kom jö na podho, ëntö nyutho kïca mërë bothi, ka imediri nakun icung ï kïca mërë. Ka pe, cë in thon ebino tongoni ökö. 23 Ka Eyuda obedo gïnï kï yee dökï, cë ebino dwökögï cen ï kom yath, pïën Obanga tye kï twërö më dwökögï kunön dökï. 24 Pïën ka kömanön un ibedo Erok ëka ïröm unu kï yath jeituni më thim n’etongo ökö cë ëcömö ï kom yath jeituni na bër ca, na nwongo ba otuu kï kom jeituni n’ëpïdhö apïdha. Bino bedo na yot both Obanga më cömö jang yath jeituni nökënë nön ï kom yath n’ëtürö ën kï ïë.

25 Utmegona, tye müng mörö na an amïtö nï inge unu, ëk ömïï kür ïtham unu kenwu nï ïryëk unu: Jö Icarael cwinygï bino bedo na nwang pï karë mörö na nönök naka ka wel Erok më bino both Obanga örömö. 26 Kinge, Obanga bino larö jö Icarael kïbëc kite n’ëcöö nï:

"Alar bino bino nakun yaa kï ï Cion;

ën bino kwanyö tïm na reco ökö kï both ëkwaë ka Jakob.

27 Man ënë cïkërëna na an aketho ködgï

ï karë na an abino kwanyö balgï ökö."✝

28 Kite na gïn ökwërö köp më Emuth na bër, Eyuda dong obedo gïnï lang k’Obanga pïrwu un Erok. Ëntö pï yër k’Obanga, gïn dong ödökö jö n’Obanga marögï pï kweregï. 29 Pïën Obanga ba twërö lökö thama mërë ï kom ngat na ën öyërö ëka na mïö gum. 30 Na calö un Erok, un ba ïwörö unu Obanga ï karë n’opoth ca; ëntö kobedini un dong inwongo kïca k’Obanga pïën Eyuda ba obedo gïnï kï winy ï kom Obanga. 31 Ï yoo acël nön, pï kïca na un inwongo, Eyuda kobedini ba dökï winyo gïnï Obanga, ëk gïn thon onwong kïca na calö adwogi më kïca k’Obanga bothgï. 32 Pïën Obanga oketho jö kïbëc ï buc më kwërö bedo kï winy ï kome ëk enyuth kïca mërë bothgï kïbëc.

33 Lönyö k’Obanga thwönë rwök! Ryëkö mërë ëka ngec mërë thuth rwök!

Köp na ën ngölö, nïang ï körë tëk,

ëka nïang ï kite na ën tio ködë tëk!

34 "Nga n’ongeo thama ka Rwoth?

Onyo nga n’obedo amïï thama mërë?"

35 "Nga na yam ömïö Obanga gin mörö,

n’Obanga myero öcül ën?"

36 Pïën jami kïbëc ënë ocweo, ëka jami kïbëc obedo na tye pïrë ëka obedo mëgë.

Dheo obed both Obanga naka naka! Amen.