1 Onu jö na tëk myero ëköny jö na görü ï kom gin na löögï, ëntö kür onu ëtham më yomo cwiny onu këkën. 2 Ngat acëlacël ï kin onu myero oyom cwiny awodhe, më könyö ën, ëk ödöng ï yee mërë. 3 Pïën Kiricito ba oyomo cwinye kënë, ëntö obedo kï kite na calö ëcöö nï, "Ayeny ka jö n’obedo ka yanyöni opodho ï koma."✝ 4 Gin na kïbëc n’ëcöö ï karë na cön ca onwongo ëcöö më pwonyo onu, ëk onu ebed kï gen më dangö can ëka cükö cwiny na yaa kï ï Cöc na Leng. 5 Dangö can kï cükö cwiny yaa kï both Obanga, myero ën ömïïwu ibed unu kï nïang na bër ï kinwu kekenwu, nakun ïlübö unu kite ka Kiricito Yecu, 6 ëk ïrïbërë unu ka pakö Obanga Apap ka Rwoth onu Yecu Kiricito kï dwön acël.

7 Pï manön, jöl unu ngat acëlacël, kite na calö Kiricito dong öjölöwu ködë, pï dheo k’Obanga. 8 An akobo bothwu nï Kiricito ölökërë ödökö atic na könyö Eyuda, pï nyutho nï Obanga twakö köp adyer, nakun thon cobo gin n’Obanga öcïkërë ïë both kweregï, 9 ëk Erok obed gïnï ka pakö Obanga pï kïca mërë, kite n’ëcöö ködë nï:

"Pï manön an abino paköni ï kin Erok;

an abino wero wer më pakö nyingi."✝

10 Okobo dökï nï,

"Un Erok, bed unu kï yom cwiny kanya acël kï jögë."✝

11 Ëka dökï nï,

"Pak unu Rwoth, un Erok kïbëc,

ëka un jö më lobo kïbëc wer unu wer më pakö ën."✝

12 Ëka dökï Icaya okobo nï,

"Akwar Jece bino bino,

ën ngat na bino më löönö Erok,

Erok bino ketho gen-gï ï kome."✝

13 Obanga na mïö jö kïbëc bedo kï gen, myero ömïï yom cwiny kïbëc kï kuc opong ï ïwu pï yeewu ï kome, ëk genwu obed ka mëdërë amëda pï tëkö më Tipo Naleng.

14 Utmegona, an kikoma angeo atïr nï un ibedo jö na bëcö rwök, itye unu kï ngec n’örömö, ëka ïtwërö unu pwonyere kenwu. 15 Ëntö an dong atyeko cöö bothwu köp mökö kï tëk cwiny na dit, kobedini an amïtö po wiwu ïë. An atïmö kömanön pï mïc n’Obanga ömïa, 16 më bedo atic ka Kiricito Yecu both Erok. An atye ka tic calö alamdhök k’Obanga nakun atïtö köp më Emuth na Bër n’öya kï both Obanga, ëk ömïï Erok obed gïnï calö tyër n’Obanga pwöyö, na Tipo Naleng ölönyö ökö ödökö na leng.

17 Pï manön, an atye kï tyën köp na mïö awakara ï Kiricito Yecu, pï ticna na an atye ka tio pï Obanga. 18 An ba abino twakö köp mörö nökënë, na path kï gin na Kiricito otio pï kelo Erok më bedo kï winy ï kom Obanga, nakun tio kanya acël köda ï köp ëka ï tic— 19 kï tëkö n’onen ï kom anyuth kï tango mökö, pï tëkö ka Tipo Naleng. Man ömïö an atyeko tïtö köp më Emuth na Bër ï kom Kiricito, cakërë kï ï Jerucalem më thuno ködë naka ï Illiriko. 20 An onwongo aketho cwinya më tïtö köp më Emuth na Bër kanya yam dhanö bara owinyo gïnï nyïng Kiricito, ëk ömïï kür agër ï acaki thë öt na yam dong ngat nökënë öcakö gërö mëgë ïë, 21 ëntö ëk obed kite na calö ëcöö nï,

"Jö n’onwongo bara ekobo bothgï köp ï kome bino gïnï nënö ën,

ëka jö na bara owinyo gïnï pïrë bino gïnï nïang ï kome."✝

22 Man ënë gin n’obedo ka jüköna tyën na pol më bino bothwu.

23 Ëntö kobedini dong an ba atye kï kabedo mörö më tic ï lobo ni gïnï, ëka kite na an abedo parö pï mwaka na pol më bino yo bothwu. 24 An ageno nï an abino nënöwu ka awok kï kunön na nwongo apoth më cïdhö yo Cipein. An ageno thon nï ibino unu könyöna ï wothna më cïdhö yo kunön, kinge na dong atyeko bedo bothwu na bër pï karë mörö na nönök. 25 Ëntö kobedini an pod atye ka cïdhö yo Jerucalem më tero jami më köny both jö k’Obanga na leng na tye kunön. 26 Pïën jö k’Obanga na tye gïnï ï Macedonia ëka Akaya omoko gïnï dong thamagï më jwoko lïm më könyö ëcan na tye gïnï ï kin jö k’Obanga na leng na tye ï Jerucalem. 27 Gïn obedo kï yom cwiny më tïmö nï kömanön, ëntö gïn thon tye kï banya both jö më Jerucalem, pïën ka Erok nywakö gïnï gamö mïc më cwiny kanya acël k’Eyuda, myero gïn thon ököny Eyuda kï jami mökö më kom. 28 Ka manön othum dong ökö, nakun nwongo atyeko mïö bothgï gin n’ejwoko pïrgï, cë dong an abino wok kï bothwu ëka apoth acïdhö yo Cipein. 29 An angeo nï ka dong athuno bothwu nwongo abino kï gum na dit n’öya kï both Kiricito.

30 An abakö dhöga bothwu utmegona, ï nyïng Rwoth onu Yecu Kiricito ëka pï mar ka Tipo Naleng, më rïbërë köda ï lëga both Obanga pïra, 31 lëg unu ëk abwöth ökö kï both jö na ba oyeo gïnï Kiricito na tye gïnï ï Yudea, ëka ëk ömïï jö k’Obanga na leng na tye gïnï ï Jerucalem öpwö gïnï tic na an acïdhö më tïmö yo kunön. 32 Pï manön ka Obanga oye ëk an abin bothwu kï yom cwiny na thwönë, cë aywe kanya acël kodwu. 33 Obanga won kuc obed kodwu. Amën.