1 Onu ebino kobo ngö ï kom Abraam, na ënë kwarö onu? Ngö na ën obino ongeo ï kom yee? 2 Ka adyer Abraam onwongo ëkwanö nï kite atïr pï tic, onwongo twërö bedo kï gin mörö na ën wakërë ködë—ëntö pathï ï nyim Obanga. 3 Ngö na Cöc na Leng kobo? Cöc na Leng kobo nï, "Abraam onwongo oyee ï kom Obanga, ëka ömïö ëkwanö ën nï dhanö na kite atïr."✝

4 Dhanö na tio tic, ba ëmïö öcara na calö mïc, ëntö ëmïö ën na calö gin mörö na ën otio pïrë. 5 Ëntö dhanö na ba tio, ëka yee ï kom ngat na kwanö jö na ba lworo gïnï Obanga nï kitegï atïr, koth dhanö na calö manön ëkwanö nï kite atïr pï yee mërë. 6 Daudi thon ötwakö köp acël nön ï kom gum na dhanö tye ködë ka Obanga ökwanö ën nï dhanö na kite atïr abonge tic mörö na ën otio:

7 "Gum obed ï kom jö

na balgï ëtïmö kïca ökö ïë,

jö na balgï ëkwanyö ökö.

8 Gum obed ï kom dhanö

na Rwoth ba bino kwanö bal mörö ï wie."✝

9 Cë gum ni tye pï jö n’ëlïrögï këkën onyo tye thon pï jö na ba ëlïrögï? Onu ekobo nï pï yee ömïö ëkwanö Abraam nï kite atïr. 10 Ï karë mënë na gin ni ötïmërë ködë? Ötïmërë na bara ëlïrö Abraam onyo n’onwongo dong ëlïrö ökö? Ötïmërë na bara ëlïrö ën, pathï na dong ëlïrö. 11 Lïrë onwongo obedo anyuth nï Abraam onwongo dong tye kï yee ëka nï Obanga ökwanö ën nï kite atïr pï yee mërë n’onwongo bara ëlïrö ën. Manön mïö Abraam bedo kwarö ka jö kïbëc na yee gïnï na bara ëlïrögï, ëk gïn thon ëkwan-gï nï kitegï atïr. 12 Man thon mïö Abraam bedo kwarö ka jö kïbëc na yee gïnï na bara ëlïrögï, pathï pï jö n’ëlïrögï këkën, ëntö pï jö n’ëlïrögï na lübö gïnï thon yee na yam kwarö onu Abraam tye ködë n’onwongo bara ëlïrö ën.

13 Ï karë n’Obanga öcïkö Abraam k’ëkwaë mërë nï wi lobo thükül bino bedo mëgï, pathï nï Abraam onwongo ölübö Cïk, ëntö pïën ëkwanö ën nï kite atïr pï yee mërë. 14 Ka cïkërë k’Obanga tye pï jö na lübö Cïk, cë yee pïrë ba tëk ëka cïkërë köny mërë ope, 15 pïën Cïk mïö akëmö makö Obanga ï kom dhanö. Ëntö kanya cïk ope ïë, türö cïk thon ope.

16 Pï manön, cïkërë bino pï yee, ëk obed pï kïca ëka dökï më moko cïkërë mërë both ëkwaë k’Abraam kïbëc. Pathï both jö na lübö Cïk këkën, ëntö thon both jö na tye gïnï kï yee na calö Abraam. Ën obedo kwarö onu kïbëc. 17 Kite n’ëcöö ködë ï Cöc na Leng nï: "An dong akethi ëk ibed kwarö ka rok na pol."✝ Cïkërë ni emoko ï nyim Obanga n’Abraam oye—Obanga na mïö kwö both jö n’öthöö ëka na cwodo gin mökö na komgï ope bedo na tye.

18 Abraam onwongo ope kï gen nï ebino nwongo ëthïnö. Ëntö Abraam oye ï kom Obanga ëka ömëdërë bedo kï gen. Ömïö ën ödökö kwarö ka rok na pol kite na calö ëcöö nï, "Ëkwaëni bino bedo nï kömanön."✝ 19 Ën ba obedo na görü ï yee mërë ï karë n’obedo parö pï kome kënë, n’onwongo röm aröma kï gin n’öthöö, pïën mwaka më dit mërë onwongo dong cwök römö mia acël külü. Mëdö ï kom manön, dhakö mërë thon onwongo obedo alür. 20 Yee mërë ba ödök cen, ba obedo ka cacapa ï thama mërë ï kom cïkërë k’Obanga, ëntö yee mërë ömëdërë amëda ödökö na tëk rwök nakun ën mïö dheo both Obanga. 21 Ën onwongo omoko thama mërë nï Obanga tye kï twër më tïmö gin na ën öcïkö. 22 Manön ënë ömïö "ëkwanö Abraam nï kite atïr pï yee." 23 Köp ni "ëkwanö ën" onwongo ba ëcöö pï ën këkën, 24 ëntö ëcöö thon pï onu, both jö n’Obanga bino kwanögï nï kitegï atïr—pï onu n’eyee ï kom ngat n’ocero Rwoth onu Yecu kï ï kin jö n’öthöö. 25 Yecu n’onwongo eneko pï bal onu, cë Obanga ocero ën ökö ëk ëkwan onu nï kite onu atïr.