1 An atye ka twakö köp adyer ï Kiricito—an ba atye ka twakö köp më twodo, thama më cwinya na nyutho bal thon obedo caden köda pï Tipo Naleng— 2 an atye kï cwer cwiny rwök ëka arem na ba jik. 3 Pï mitina këna, onwongo athamö nï mïtö ëlama ökö ëk ëkwanya ökö kï both Kiricito pï utmegona n’obedo gïnï rokna, 4 na gïn ënë jö Icarael. Jö n’Obanga ölökögï ödökö ëthïnö mërë, ömïögï dheo ëka cïkërë mërë kïbëc. Ömïögï Cïk ëka kite na myero ëwör ën ködë ëka cïkërë mërë. 5 Kwere onu kïbëc yam obedo mëgï, ëka Meciya thon ënywölö ï kin-gï ï kite ka dhanö. Onu myero ëpwö Obanga na löö jami kïbëc naka naka! Amen.

6 Kür ïtham unu nï köp k’Obanga ba ötïmö gin mörö, pïën jö n’ënywölögï ï kin jö Icarael onwongo ba obedo gïnï jö k’Obanga adyer, 7 ëka thon gïn kïbëc ba obedo ëthïnö k’Abraam adyer pïën onwongo ëcöö nï, "Ëthïnö ka Icaka ënë ebino cwodo nï ëkwaëwu"✝ 8 Man nyutho nï pathï ëthïnö n’ënywölögï ï kite ka dhanö ënë ebino cwodogï nï ëthïnö k’Obanga, ëntö ëthïnö n’ënywölögï pï cïkërë k’Obanga ënë ebino cwodogï nï ëkwaë k’Abraam adyer. 9 Man ënë gin na cïkërë okobo nï, "An abino dwogo ï koth karë ni nwongo dong Cara önywölö wode."✝

10 Pathï manön këkën, ëntö ëthïnö ka Rebeka onwongo tye gïnï k’apapgï acël, na ënë kwarö onu Icaka. 11 Kadï ï karë na bara ënywölögï ëka na bara ötïmö gïnï gin mörö na bër onyo na rac—ëk ömïï yüb k’Obanga më yër ömëdërë: 12 pathï pï tic ëntö pï cwodo mërë. Ekobo both Rebeka nï, "Athïn na dit bino tic pï athïn na tïdï."✝ 13 Kite na calö ëcöö nï, "An amarö Jakob, ëntö ba amarö Ecau."✝

14 Cë ngö na onu ebino kobo? Onu ebino kobo nï Obanga ba ngölö köp atïr ëka kakarë? Pathï nï kömanön! 15 Pïën ën okobo both Muca nï,

"An abino tïmö kïca both dhanö na an atïmö kïca nïnë,

ëka an abino nyutho bërna both dhanö na an abino nyutho bërna nïnë."✝

16 Manön ba cung ï kom gin na dhanö mïtö onyo ï kom tic mërë na ën oyelere ködë ëntö cung ï kom kïca k’Obanga. 17 Pïën Cöc na Leng kobo nï Obanga okobo both Parao nï: "An akethi më bedo rwoth pï köp ni, ëk ömïï anyuth tëköna ï komi ëk nyïnga ëtït pïrë ï wi lobo kïbëc."✝ 18 Pï manön, Obanga tïmö kïca both dhanö na ën mïtö tïmö nïnë kïca, ëka lökö cwiny dhanö na ën mïtö më bedo na nwang.

19 Ngat mörö twërö penyo nï, "Pïngö Obanga pod kobo nï onu ebedo ëbal? Nga na twërö gëngö miti mërë?" 20 Ëntö in dhanö adhana, ibedo nga na in ïgamö dhö Obanga? Gin n’ecweo acwea twërö penyo ngat n’ocweo ën nï, "Pïngö icwea nï köman"? 21 Acwe agulu ope kï twërö ï kom lobo më cweno agulu acël na pïrë tëk ëka nökënë na pïrë ba tëk nakun tio kï ï kom lobo agulu acël nön?

22 Ï yoo acël nön, kadï bed nï Obanga tye kï twër më nyutho akëmö ëka tëkö mërë, ën obedo ngat na dïö cwinye ï kom jö n’akëmö mërë podho ï komgï—jö n’ëyübögï më apwoda. 23 Ën ötïmö koman ëk ömïï lönyö më dheo mërë ongere both jö na ën ötïmö kïca nïgï, jö n’onwongo ën öyübö cön pï dheo mërë— 24 naka thon onu, jö na ën ocwodo, pathï kï ï kin Eyuda këkën ëntö thon kï ï kin Erok. 25 Kite na calö ën okobo ködë ï buk ka Kocea nï,

"An abino cwodo jö n’onwongo ba obedo gïnï jöga nï, ‘Jöga,’

ëka dhakö n’onwongo an ba amarö nï, ‘Ngat na an amarö,’"✝

26 ëka,

"Bino tïmërë ï kabedo n’onwongo ekobo nïgï nï,

‘Un ba ibedo jöga,’

ebino cwodogï nï,

‘ëthïnö k’Obanga na kwö.’ "

27 Icaya oredo kï dwön na malö nï,

"Kadï bed wel jö Icarael bed na calö kwo më dhö nam,

jö n’odong kï ï kin-gï ënë Obanga bino larö.

28 Pïën Rwoth bino ngölö-köp mërë ï kom lobo ëka bino tyeko ökö pïöpïö."✝

29 Icaya thon okobo nï:

"Ka onwongo Rwoth Won Twër

ba öwëkö ëkwaë onu mökö,

onu onwongo ebedo calö Codom,

ëka onu onwongo ebedo calö Gomora."

30 Cë ngö na onu ebino kobo? Onu ebino kobo nï Erok na ba oyelere gïnï më dökö jö na kitegï atïr, ebino kwanögï nï kitegï atïr, kite atïr n’onwongo gïnï pï yee; 31 ëntö jö Icarael n’ötëmö gïnï kï tëk më cobo cïk ëk ebed gïnï jö na kitegï atïr, ba ocobo gïnï cïk nön. 32 Pïngö? Pïën gïn ba obedo rangö ï yoo më yee ëntö obedo gïnï rangö calö gin na cung ï kom tic. Otwomere gïnï kï kidi na mïö jïï twomere. 33 Kite na calö ëcöö nï:

"Nën, an aketho kidi ï Cion na mïö jïï twomere

ëka lëla na mïögï podho,

ëka ngat na bino ketho yee mërë ï kome ba ebino mïö ën lewic."✝