1 Waraga ni öya kï both Yakobo atic k’Obanga ëka Rwoth Yecu Kiricito.

Both kaka apar wie arïö n’ökëth gïnï ï wi lobo thükül.

Amothowu.

2 Utmegona, bed unu kï yom cwiny na thwönë ka ëtëmöwu ï yodhi na papath, 3 pïën ingeo unu nï tëmö yeewu mïö ïdïö unu cwinywu. 4 Wëk unu dïö cwiny ocob tic mërë ëk ibed unu jö n’otengo, na bal mörö ope ï komwu ëka dökï ibed unu na gin mörö thon ba orem kï bothwu. 5 Ëntö ka ngat mörö tye ï kinwu na ryëkö mërë nönök, myero ën ökwa kï both Obanga na mïö both jö kïbëc kï yom cwiny, nakun ba coko ngat mörö, ëka ebino mïö bothe. 6 Ëntö ka ën lëgö, myero ën oyee ëka kür obed k’akalakala, pïën ngat na tye k’akalakala röm kï pii më nam na tagere, na yamö cwarö. 7 Dhanö nön myero kür ötham nï ën ebino nwongo gin mörö kï both Rwoth, 8 pïën ën obedo dhanö na thama mërë arïö, na ba cung na tëk ï jami kïbëc na ën tïmö.

9 Jö n’oye n’obedo ëcan myero öwakërë gïnï ka etingogï malö, 10 ëka ngat n’obedo alönyö myero öwakërë ka ëdwökö pïny, pïën ën bino rwenyo calö thur lum. 11 Ceng donyo kï lyetho mërë ëka nero lum ökö, thure öny cë lengo mërë bal ökö. Ï kit yoo acël nön, ngat n’ölöny bino rwenyo ökö ï dyere tic mërë më karë kïbëc.

12 Ngat na cung na tëk ï atëmatëma tye kï gum, pïën ka ën ölöö atëmatëma, ën bino nwongo tok më kwö n’Obanga öcïkërë më mïö both jö na marö ën.

13 Ka ëbwölö ngat mörö, ën kür okob nï, "Obanga ënë öbwöla." Pïën gin na rac ba twërö bwölö Obanga, ëka ën thon ba bwölö ngat mörö. 14 Ëntö ngat acëlacël miti mërë kënë ënë bwölö ën, ywaö ën ökö, ëka ömö cwinye. 15 Cë kinge ka miti dong öyac, nywölö bal. Bal ka ödöngö n’otengo dong, nywölö thöö.

16 Utmegona më amara, kür ïwëk ëbwölwu. 17 Gin mörö na bër ëka mïc kïbëc na bal mörö ope ïë bino kï malö both Obanga Apap, na ënë acwec më tar na ryëny, na ba lökërë calö tipo na wïrë. 18 Ën öyërö më nywölö onu kï köp mërë n’adyer, ëk onu ebed calö cem na tye ï pwodho n’öcakö cëk kï kin jami kïbëc n’ecweo.

19 Utmegona më amara, ngee unu köp ni: Dhanö acëlacël myero owiny köp pïöpïö, ëntö kür myero öbünyërë më twak, ëka kür akëmö ömak ën pïöpïö. 20 Pïën akëmö ka dhanö ba cobo kit kwö n’atïr n’Obanga mïtö. 21 Pï manön, kwër unu gin na kïbëc më lewic ëka kï tïm na reco na tye ï kwöwu. Gam unu kï mwolo köp n’Obanga öpïdhö ï cwinywu na twërö laröwu.

22 Ëntö bed unu jö na ketho gin n’ëtwakö ï tic. Kür ibed unu jö na winyo awinya këkën nakun ïbwölërë unu kenwu. 23 Pïën ka dhanö mörö obedo ngat na winyo köp ëka ba ketho ï tic, ën bedo calö ngat na rïpö wangë kï ï kiyo. 24 Ëntö ka otyeko dong rïpërë, cïdhö ökö ëka cücüth wie wil ökö ï kite na ën ebedo ködë. 25 Ëntö ngat na rïpö ï cïk na bal mörö ope ïë na kelo kuc, ëka ketho thama mërë ïë, na wie ba wil ï kom gin na ën owinyo, ëntö tio gin nön—ën bino bedo kï gum ï kom gin na ën tio.

26 Ka ngat mörö thamö nï ën ebedo adini nakun ba gwökö lëbë, ën nwongo tye ka bwölërë kënë kï ï cwinye ëka dini mërë köny mërë ope. 27 Dini na leng ï nyim Obanga Apap na gin mörö na rac ope ïë ënë: më könyö ëthïnö kic ëka mon thöö na tye ï can, ëka më gwökërë kën kür gin mörö më lobo obali.