1 Ngö na kelo dha ëka lwëny ï kinwu? Pathï miti na reco na un itye ködë ï cwinywu ënë tye ka lwëny ï dul komwu? 2 Un ïmïtö gin mörö ëntö ba inwongo unu. Un ibedo kï miti ï kom jami ka jö nökënë ëka ineko unu nek, ëntö ba inwongo unu gin na un ïmïtö. Ïdhaa ëka ïlwënyö unu. Ba inwongo gin ïmïtö unu, pïën un ba ïkwaö kï both Obanga. 3 Ka ïkwaö unu, ba inwongo unu, pïën ïkwaö unu kï thama na rac, ëk inwong unu gin na un ïmïtö më cobo mitiwu.

4 Un jö nï balö watwu k’Obanga, ba ingeo unu nï makö okone kï lobo mïö dhanö dökö langö k’Obanga? Ngat mörö na yërö më bedo okone kï lobo bedo langö k’Obanga. 5 Onyo un ïthamö nï Cöc na Leng na yam ëcöö obedo köp na thërë ope na kobo nï, "Tipo na yam Obanga oketho ï kom onu tye kï nyeko rwök?" 6 Ëntö ën mïö both onu kïca. Manön ënë ömïö Cöc na Leng kobo nï,

"Obanga pyem kï jö na wakërë,

ëntö mïö kïca both jö na mwol."✝

7 Pï manön dong, mïrë unu kenwu më bedo ï thë löc k’Obanga. Kwër unu Catan, ëka ën bino rïngö ökö kï bothwu. 8 Nyingi unu na cwök both Obanga, ëka ën thon bino nyingo na cwök bothwu. Lwök unu cïngwu, un ëbal, ëka ïlönyërë unu ï cwinywu, un jö na thamawu tye arïö. 9 Bed unu kï cwer cwiny, kum unu, ëka ikok unu. Nyëröwu myero ölökërë ödök kumo, ëka yom cwinywu myero ölökërë ödök kumo. 10 Mwolere unu ï nyim Rwoth, ëka ën bino tingowu malö.

11 Utmegona, kür ïtwak unu köp mörö na rac ï kom awodhi. Ngat na twakö köp na rac ï kom ömïn mërë, onyo ngölö köp ï kom ömïn mërë, nwongo twakö köp na rac ï kom cïk ëka ngölö köp ï kom cïk. Ëntö ka in ïngölö köp kï cïk, in ba ibedo ngat na cobo cïk ëntö ïdökö angöl-köp. 12 Ngat na mïö cïk ëka angöl-köp tye acël, na ënë ngat na twërö larö ëka kï neko. Ëntö in—ibedo nga më ngölö köp ï kom awodhi?

13 Winy unu, un jö na kobo nï, "Tin onyo diki wan ebino cïdhö ï pacö ni onyo maca, wan ebino tyeko mwaka acël kunön, wan ebino cadhö jamiwa ëka enwongo magoba." 14 Un ba ingeo ngö na bino tïmërë diki. Kwöwu tye nïngö? Un ïcal k’edou na nen pï karë mörö na nönök, ëka kinge rwenyo ökö. 15 Nakaka manön, un onwongo myero ikob unu nï, "Ka Rwoth oye, onu ebino bedo na kwö, ëka ëtïmö man onyo maca." 16 Kite na calö, un ïwakërë ëka inyuthere unu. Koth wakërë ni kïbëc obedo gin na rac. 17 Ngat mörö na ngeo gin na bër na ën myero ötïm, ëka ba ötïmö, nwongo ën ötïmö bal.