João 12

I’sa İyerusalimeeqa paççah xhinne ikkeç’e

12 Qinne yiğıl bayrameeqa abıyne gellesde insanaaşik’le I’sa İyerusalimeeqa ayresva g’ayxhı. 13 Manbışe xurmayn bıtağbı alyaat’u ts’irbı ha’a, Mang’une ögilqa qığeebaç’e. Manbışe eyhen:

– Hosanna!*12:13 Hosanna: cühüt’yaaşine mizel «Şi g’attivxhan hee’eva» eyhen vodun. Məxür Allah axtı qa’a ıxha.

Rəbbine doyuka Qarıyng’us şukur vuxhena!

İzrailyne Paççahıs şukur vuxhena!

14 I’see q’udux t’abal hav’u, çil ilexa. Mane karbışde hək’ee Muq’addasne Otk’unee inəxüd otk’un:

15 «Sionna yiş,*12:15 Sionna yiş: man İyerusalimva eyhen vodun. Sion İyerusalim alyaav’una tepa vobna. qimeeqən!

İleeke, yiğna Paççah

sa q’uduxul alixı vor qöö!»*12:15 İnəxüd Zakariy peyğambarne kitabee otk’un (9:9).

16 Ts’etta telebabışilqa vuççud hiyxhar deş. Allahee I’sa axtı qı’iyle qiyğa, Mang’une vuk’lelqa qadıynbı, telebabışe yik’el qalya’a. Mançine hək’ee ögilycadniy Muq’addasne Otk’uniybışee otk’un. 17 I’see Lazar nyuq’vneençe qort’ul hapt’ıynbışde yı’q’neençe üç’ür qı’iyne gahıl, Mang’une hiqiy-alla sadıyne milletın mançina gaf haa’a. 18 Milletık’le I’see man əlaamat haguva g’ayxhı ıxha, mançil-allad millet Mang’une ögilqa adayle. 19 Mançil-alla Fariseyaaşe*12:19 Fariseyar: Manbı I’sayne gahılin dindarar vuxha. Manbışik’le Allahna Q’aanun yugba vaats’a vuxhal-alla, manbı milletın ç’ak’ınbı vuxha. sana-sang’uk’le eyhen:

– Vuççud yişde xılençe qöö deş. Gırgınbı Mang’uqab qihna əlyhəə!