Lucas 24

Emmais lamko ih kata

13 Erah saasa adi Jisu liphante wanyi Emmais hadaang ni kah nyuuta, erah hah ah Jerusalem nawa ih me sinet taan haloh angta, 14 eno nengnyi ih erah mamah angta tiit loong ah thoidi waan kah nyuuta. 15 Nengnyi erah tiit ah thoidi roongwaan lam ih khoom nyu adi, Jisu ah nengnyi reeni dong haano nyi damdi roong khoom kata; 16 eno nengnyi ih Jisu ah tup bah tup et nyuuta ang abah uh, tasamjat nyuuta. 17 Jisu ih nyi suh liita, "Setnyi lam khoom damdi, tumjih tiit waan lansih?"

Nyi ah thungjoong damdi chap ruh ih nyuuta. 18 Eno wasiit, heh men Koleopas, rah ih heh suh chengta, "Jerusalem ni dongkhoomte an luulu tam anglu miinyah manbah tumjih angti loong ah lajat thang ah?"

19 "Tumjih akoh?" heh ih we ngaak chengta.

"Najaret nawa Jisu angta tiit ah," nyi ih ngaakbaat nyuuta. "Erah mina ah khowah angta eno Rangte nyia mina loong ih uh heh suh chaan apaan mih et thiikta heh jengkhaap nyia heh reeraang loong asuh ah. 20 Seng romwah phokhoh loong nyia hadaang phansiitte loong ih heh ah tek haat thuk rumta. 21 Eno seng ih heh suh taat laalomti Ijirel mina loong pangte heh esiit eah! Erah ang khodi, chiinyah dowa ih hesa sa jom angla. 22 Sengdung nawa minuh loong ih paatja thuk hali, neng rangkhano mangbeng ni taat sokkah rum ano, 23 heh mang ah tajaptup karumta. Neng ih mot amang ni rangsah thong japtup rumta tih eno Jisu bah ejen ngaakthing eta ih baat rum arah tiit ah ngaakbaat wan rumhala. 24 Eno sengdung dowa marah marah ih sokkah rum ano minuh loong ih baatta rah amiisak angta, eno neng ih heh mang ah takap tup rumta."

25 Eno Jisu ih neng suh li rumta, "Sen mame thungko lan, khowah ih baat tahan jengkhaap loong ah adi mamah lahanpi elan! 26 Kristo ah emamah ih chamnaang ano heh men raksiit jih taba angta?" 27 Eno Jisu ih heh teewah tiitwaan Rangteele ni mamet raangta loong rah huk jangbaat korumta, Moses leedap nawa phang baat ano wahoh khowah loong leedap ni raangta tiit loong anep baat korumta.

28 Neng marah hadaang ni karumta erah hah re adi thokkhoom rum adi, Jisu ah nengnyi miksok di haloot ni moongkhoom kala likhiik ih reeraangta; 29 erah thoidi nyi ih tang nyuuta, "Sek damdoh roongtang jamho; rangsa tham ih kala. "Erah thoih ih heh nyi damdi roongtang jamta. 30 Heh ah nengnyi damdi phaksat suh roongtong adi, baanlo ah toonpi ano, romseetam jengkhaap jengta; eno baanlo ah bunphiit ano nyi suh koh nyuuta. 31 Erah lidi ba nengnyi mik ah laang ano heh ah kok samjat nyuutta, enoothong nyi miktup nawa emat eta. 32 Eno waan nyuuta, "Heh lam ni sek damdi Rangteele ni raangha tiit roongwaan taha adi sek sak ni weeluungla likhiik angta ni ih?"

33 Eno echaan ih Jerusalem ko ih ngaakwang nyuuta, eno erah di heliphante loong asih wasiit ah miloong damdi eroom ih lomtong rum arah japtup wang nyuuta 34 eno baat nyuuta, "Teesu ah amiimi ih ngaakthing eta! Heh Simoon reeni nep dong taha!"

35 Nyi ih lam ni tumjih angta loong ah neng suh jangbaat koh nyuuta, nyi ih Teesu ih baanlo bunphiitta adi mamet jat nyuuta loong tiit anep baat korumta.