Mateus 21

Jerusalem ni ruurangrang ih wangta

1 Jisu nyia heliphante Jerusalem thok nanah di, neng Beetpheej ni Olip kong adi dung wang rumta. Jisu ih heliphante wanyi neng ngani ban wang thukta 2 amet baat nyu ano ah: "Set ngah ni wa hadaang adoh wang ansih, erah nah moktoh heh sah reenah bonthiin arah laan japtup ruh ih wang ansih. Eno moktoh ah ja ansih no nga jiinnah siitjah hansih. 3 Mih ih cheng hansih bah, Changte ih jamha ih baat ansih; eno ba moktoh nyi ah roong kaat thuk ha."

4 Erah langla khowah ih banbaatta jengkhaap ah amiisak toom ang raaha ih ang thukta:

5 ✝ 21:5 Jek 9:9 "Jaion samnuthung dowa miloong asuh baat an,

Sok an, sen luungwang ah sen jiinni ra hala!

Heh ah toongtang lam ih moktoh khoh nah raaha

nyia moktoh heh sah damdoh raaha."

6 Eno heliphante nyi ah wang nyu ano heh ih mamet baat nyuuta emamah ih re wang nyuutta: 7 nyi ih moktoh heh sah damdi toonsiit wang nyuutta, eno moktoh tamkhoh adi nengnyuh nengkhat ah dekoh rum ano Jisu ah dung tongta. 8 Miloong hantek ih nengnyuh nengkhat ah lam adi dam rumta, rukho rah ih paam banglak ah dook dam ih karumta.

9 ✝ 21:9 Rsb 118:25,26 Miloong ah Jisu lih ah ngah ih khoom rum ano riingraak rumta, "Dewid sah ah phoong ih! Teesu mendi o ra hala erah suh Rangte ih romseetam koh ah! Rangte phoong ih!

10 Jisu Jerusalem ni nopwang adi, erah samnuthung adi noongrep ni paatja riingraak rumta.

"Heh ah o angla?" Miloong ah ih cheng rumta.

11 "Arah ah Galili juungkhuung, Najaret hadaang khowah Jisu ah," Miloong ah ih ngaakbaat rumta.