Mateus 21

Cwa-du̱ Faru̱k-u̱ Urusharima

1 Da-u̱ Ye̱so̱ u̱ a-doru̱ wa ne̱ ha m-te Urusharima, u̱ bo̱-u̱ Bafaji u̱ dapu̱s Ro̱r-du̱ Te-su̱ Ze̱tun, Ye̱so̱ tom a-doru̱ wa yu̱r. 2 Wa zu̱ u̱n, <<Cwaan u̱ taas-u̱ o̱ u̱ shu̱ no̱, no̱ u̱t-hyan u-janka m-gag u̱ku̱n u̱ ya-u̱r wa ne̱, ustu̱n e̱ no̱ hatu̱n me̱. 3 A waku̱n u̱ shitu̱ no̱m-u̱ no̱ u̱t-no̱m, waru̱n wa u̱zu̱, <Wa-m-nap wa u̱t-sa e̱,> tu̱msu̱ wa de̱ yasu̱ no̱ e̱ za na-su̱ u-da.>>

4 Na no̱ng sin-se̱ u̱s-be̱e̱t remu̱ na shu̱u̱ste̱ no̱mu̱ wa-warru̱ rem-su̱ u-Ru̱ ware̱ u̱zu̱,

5 <<Waru̱ ne̱t-tu̱ bo̱-u̱ Urusharima,*21:5 U̱t-Girik: Zayon.

<Gwatu̱n faru̱k-u̱ no̱ o̱ haan u̱du̱ no̱,

wa zatte̱ hu̱k-mu̱ u̱r-hi da.

Wa o̱ u̱r-no̱k u̱ do̱m u-janka,

Wa muute̱ hi-u̱r wa za o̱ko̱n, ya-du̱ u-janka wa nokte̱.> >>*21:5b Gwat tu̱msu̱: Ze̱ka 9:9.

6 A-doru̱ Ye̱so̱ yu̱r no̱m u̱ka Ye̱so̱ war-tu̱ e̱. 7 E̱ hatu̱n ya-du̱ u̱r-janka u-janka ne̱ u̱du̱ rò, e̱ su̱k kus-u̱t e̱ u̱ do̱m-u̱ u-janka u̱ ya-u̱r wa ne̱, wa du̱u̱s u̱ do̱m wa shu̱’u̱t u̱ do̱m-u̱ ya-du̱ u-janka. 8 U̱t-ne̱t u-tát e̱ hu̱ nu̱rgu̱sse̱ kus-u̱t e̱ u̱ do̱m-u̱ u-fu̱n, tu̱msu̱ e̱ke̱n getmu̱n fe̱-su̱ u̱s-te e̱ nu̱rgu̱sse̱ u̱ do̱m-u̱ u-fu̱n. 9 Ban-du̱ u̱t-ne̱t o̱ró u̱-shu̱ Ye̱so̱ tu̱msu̱ ban-du̱ u̱t-ne̱t i o̱ dim-u̱ rò be̱e̱t. E̱ jaku̱s u̱s-cwar, e̱ zu̱,

<<U̱t-vam u̱du̱ Wa'-u̱ Dawuda!

Nu-u so̱-o̱ u̱du̱ wu̱ haane̱

u̱ shin-m Yawe,

u̱t-vam u̱du̱ u-Ru̱

wu̱ o̱o̱ge̱ do̱m u-ru̱ u̱ zu̱ge̱ ko̱he̱ne̱!>>*21:9b Gwat tu̱msu̱: Se̱pV 118:25-26; 148:1.

10 Da-u̱ Ye̱so̱ cwaye̱ u̱ Urusharima, gwu̱z yu̱ne̱ u̱zu̱, <<¿Wana unwa?>>

11 Ne̱t-tu̱ o̱ do̱rru̱ Ye̱so̱ e̱ zu̱, <<Unwa o̱ wa-warru̱ rem-su̱ u-Ru̱ Ye̱so̱ du̱gu̱ Nazara u̱ Gariri.>>