Mateus 4

Reg-m Ye̱so̱

1 Se̱ Yar u-Ru̱ dor-u̱t Ye̱so̱ m-cwa u̱t-kanda u̱ remu̱ faru̱k-u̱ no̱m u̱s-te no̱m-tu̱ wa m-reg. 2 Da-u̱ Ye̱so̱ no̱me̱ u-swaat m-roog u̱t-shik u̱t-yu̱r u̱t-ho̱ ne̱ u̱t-shik u̱t-yu̱r, se̱ wa hog u̱s-me̱r. 3 Faru̱k-u̱ no̱m u̱s-te haan u̱du̱ ro wa zu̱, <<Abite̱ Wa'-u̱ u-Ru̱ wa bo̱ o̱ye̱, zu̱ ta’ar-u̱r rinde̱ de̱ mu no̱m u̱t-re̱.>> 4 Ye̱so̱ shu̱s wa zu̱, <<Rem-su̱ u-Ru̱ zu̱u̱g, a-no̱m u̱t-re̱ u̱ war-o̱ ne̱t do̱te̱ u̱r-fat da, se̱ rem-su̱ rwu̱ne̱ du̱gu̱ nu-u̱ u-Ru̱.>>*4:4 Gwat tu̱msu̱: Muut 8:3.

5 Faru̱k-u̱ no̱m u̱s-te ku̱b wu̱n m-ha u̱ bo̱-u̱ Urusharima bo̱-u̱ u-he̱n, se̱ wa du̱u̱t wu̱n u̱ be-du̱ m-ja be-du̱ u̱r-shu̱’u̱t du̱ Wa-ko̱-uyan. 6 Tu̱msu̱ wa zu̱ wu̱n, <<Abite̱ Wa'-u̱ u-Ru̱ wa bo̱ o̱ye̱, tane̱ tari mak bo̱ he̱e̱n u-dak. Remu̱ zu̱ na panu̱g u̱zu̱,

<< <Ru̱-u̱ de̱ wadu̱ a-to̱mu̱ wa, e̱ 'e̱ bo̱,

E̱ e̱r bo̱ u̱ kom-u̱t e̱,

Taas u̱ na-u ro u̱ gap u̱r-ta’ar da.>*4:6 Gwat tu̱msu̱: Se̱pV 91:11-12.>>

7 Ye̱so̱ shu̱s wa zu̱, <<Na panu̱g u̱zu̱, <A-bo̱ no̱mu̱ Wa-ko-uyan Ru̱-u ro m-reg da.>*4:7 Gwat tu̱msu̱: Muut 6:16. >>

8 Se̱ faru̱k-u̱ no̱m u̱s-te ku̱b wu̱n m-ha ro̱r-du̱ zege̱ m-ja, wa ko̱se̱ wu̱n faru̱k-tu̱ dak-u uno̱, u̱ zwar-u̱r wa ne̱. 9 Se̱ wa zu̱, <<Me̱ ya u̱ bo̱ no̱m-u̱t to̱ u̱t-be̱e̱t, a-bo̱ no̱mu̱ me̱ u̱t-huuk.>>

10 Se̱ Ye̱so̱ zu̱ wu̱n, <<Faru̱k-u̱ no̱m u̱s-te, hate̱ du̱gu̱ kit-u̱ ri, remu̱ na panu̱g u̱zu̱, <Bo̱ no̱mu̱ Wa-ko-uyan Ru̱-u ró u̱t-huuk, tu̱msu̱ wa bo̱ do̱’e̱ u̱t-do̱r, wa u-gan.>*4:10 Gwat tu̱msu̱: Muut 6:13. >>

11 Faru̱k-u̱ no̱m u̱s-te yage̱ wu̱n, se̱ a-to̱m u-Ru̱ haan, e̱ no̱mu̱ wu̱n u̱r-se̱ge̱.