Lucas 1

Ashi mgbi iDzakaria

67 Ta otsɔn iDzakaria mbwo yi Onodzi Osaan man o wita ogbɔdzɛ mi ela oyegbɔ gbɛɛ:

68 <<Nu ma tsɛ Otsɛ,

Imgbasho mgbi emi Israi,

lubana o ba wa tobyi emidan di nagbɛ ma.

69 O kye otlɛsɛ mgbi owatɔ-watɔ tuo ikye eyi,

mi etɔ mgbi ongwongbɛ mgban iDevedi.

70 Dafi o gbɔ nyɛ mbi

oyegbɔ osaan emi tugbe

71 gbɛɛ ongwu ka dulu eyi tɔ

mi abɔ engyikyili mgbi eyi,

bɛyi mi abɔ mgbi ama ngwu di eyi lanyi

72 ikye otso elela odiidi mbi emi otseyi

diyɛ wɛ ondu odzɛɛdzɛ mgban osaan,

73 ofaafa ngwi o fa

yi otseyi Abrahan:

74 odulu eyi tɔ mi abɔ engyikyili mgbi eyi,

ikye onu eyi sunun yi imio ba

75 mi osaan bɛyi osaan mi iyayi mgban,

mi egbe oshishe mgbi eyi duu.

76 Abu ongwani, a ka kwu abu gbɛɛ,

oyegbɔ mgbi Ongwu Nnghaangha mi esho;

lubana abu ka teyi Otsɛ ikye omɛlun ofɛ.

77 Onu emidan difwi odzɛ mgbi owatɔ-watɔ

mi odzita ma yi ali ibwubwe.

78 Mi ikye elela odiidi oleewo

mgbi Imgbasho mgbi eyi,

ikyegbɛɛ ni osa dafi onɔ mi esho,

gbosa ba esɛ mbi eyi

79 azukwu no wa nu osa mbi ama nwoto iyifu

bɛyi iwulu ikwongye duu,

ongyo eyi afɔ byi ofɛ iyu.>>