1యోహాన్‍ 1

1 జమానమతూ హల్లూతి మాలంకర్యతె, హమారుహాత్‍ కినా ఛీమిన్‍ దేఖ్యకి, హమె షాత్‍ హఃమ్జకి, ఢోలాతి షాత్‍ దేఖ్యకి యో తుమ్న మాలం కరాంకరియేస్‍. 2 యోజీవమ్‍ దెఖ్కాయు భా కంతూ హమ్నా దెఖ్కాయుతే యో నిత్యజీవంను బారెమా హాఃఛి బోల్తొహుయీన్‍, ఇనా హమే తునా మాలం కరాంకరియేస్‍. 3 హమారేతి తుమ్నా సహవాసమ్‍ కల్గుతిమ్‍ హమె దేఖ్యతె ఇనా హఃమ్జతె ఇనా తుమ్నా బొలాంకరియేస్‍. అప్ను భా తి ఇనొ ఛియ్యో హుయోతె యేసుక్రీస్తునాకేడె ఛా. 4 అప్ను ఖుషి పరిపూర్ణం హువనటేకె హమే ఆ సంగతినా లిఖ్కుకరియేస్‍.

దేవ్ను ఉజాళు

5 హమే ఇనా బారేమా హఃమ్జీన్‍ తుమ్నా ప్రచార్‍ కరుకరతే వర్తమాన్‍ షాత్‍కతొ దేవ్‍ ఉజాళు హుయీన్‍ ఛా ఇనకనా అంధారు ధరాషుబి కొయిని. 6 ఇనకేడె సహవాసమ్‍ హుయతెవాలకరి బొల్లీన్‍ అంధారమా చాల్తొ ర్హయోతో తెదె అప్నె చ్హాడ్‍ బోల్తాహుయీన్‍ హాఃఛినా చలావకొయిని తిమ్‍ ఛియ్యే. 7 పన్కి ఇను ఉజాళుమా ఛాతిమ్‍ అప్నే ఉజాళుమా చాల్యతొ తెదె. అప్నె అన్యోన్యా సహవాసం తీ వాలా హుయీన్‍ ర్హాసు. తెదె ఇను ఛియ్యో హుయోతె యేసు ల్హొయి హర్యేక్‍ పాప్‍మతూ అప్నా పవిత్ర గోని కర్సె.

8 అప్నె పాప్‍ కొయింతెవాలాకరీ బొలి లీదాతో, అప్ను అప్నెస్‍ మోసం కర్లిదా వాల హుసూ బుజు అప్నమా హాఃఛి కోర్హాయిని. 9 అప్ను పాప్నా అప్నెస్‍ ఒప్పి లిదాతో, యో నమ్మకం వాలో నీతిమంతుడ్‍ అనటేకే యో అప్న పాప్నా మాప్‍ కరీన్‍ సమస్త దుర్నీతి మతూ అప్నా పవిత్రుల్‍ ఘోని కర్సే. 10 అప్నే పాప్‍ కర్యా కొయినీ కరి ఒప్పి లిదాతొ, ఇనా జూటివాలొకరి కరవాలంతరా హుసూ బుజూ ఇను వాక్యం అప్నమా కోర్హాసెని.