1‏ పేతుర్‍ 5

దేవ్ను గళ్లొ

1 కేడెఛాతె మోట్ట అద్మినా, క్రీస్తు ష్రమను గూర్చిన్‍ సాబుత్‍ మాలంహుసేతే మహిమమా భాగ్‍హుతె మే తుమారమా మోట్ట అద్మియేనా గుర్ఖాంకరూస్, 2 తాహాఃత్‍తి కాహేతిం దేవ్ను చిత్తప్రకారంతి ఇష్టపుర్వకంతి, దుర్లాభా పేక్చతోకాహేతిం సిద్ధందిల్తి తుమారు ఇచ్ఛమాఛాతె దేవ్నుమందనా జతన్తి ఇనా దెక్తొరాజొ. 3 తుమ్నా ధారైయిదిదుతే ఇవ్నఫర్ అధికారంకరకొయిన్తిం గల్లొ మాదిరుల్‍తార రావో. 4 ప్రధాన్ కాపరి దెఖ్కాయోతెదె తుమె వాడబారిని మహిమ కిరీటంన పొంద్సు.

5 కవ్వార అద్మీ, తుమే మోట్టావ్‍తి లోబడీన్‍ ర్హవొ; తుమె హాఃరుజణు అలాదు అద్మితి దీనాదిల్‍తి అను లుమ్‍గాడ్డా పేర్‍లిన్‍ తూమే అలంకరించిలేవో; దేవ్‍ అహాంకాలున ఎదిరొంచీన్‍ దీనులనా కృప దిసే కరి లేఖనంమా లీఖారుస్‍ 6 దేవ్‍ తగినా సమయ్‍నా తూమ్నా హెచ్చించిచేతిం ఇను తాహాఃత్‍హుయుతే హత్నాహేట్‍ దినదిల్‍తి రావో. 7 యో తూమ్నాగూర్చి చింతించుకారస్ అనటేకే తూమరు చింతనాబి హాఃరుబి ఇనాపార్ నాకో. 8 నిబ్బరంను దిమాక్‍వాలహుయిన్‍ హోసార్తి రావో; తూమారు వైరిహుయోతే సాతాన్‍ గర్జింతే వాగ్‍నితర కినా గలిలేనుకరి దుడుకార్తు పారుకారస్. 9 ములక్‍మా తూమారు భైయ్యేవ్‍నా హాఃమే అంనితారా స్రమలు పడుకారస్‍కరి ఇనా మాలాంహుస్, విష్వాస్‍మా స్ధిరులై ఇనా ఎదిరించో. 10 ఇను నిత్యమహిమనా క్రీస్తుయేసుకాంతు తుమ్నా బులాయోతె సర్వకృపానిదియగు దేవ్నా, థోడు ధన్మా తుమే స్రమపడితో బద్మా, యోస్ తుమనా పూర్ణల్‍గా కారిన్‍ స్ధిరపార్‍చే బలపర్చే. 11 పిడిపడినా కెదేబి తాహఃత్‍బి ఇనా ఇమ్మాస్‍హువదా, ఆమేన్‍.

ఆఖరీను హాఃలామ్‍

12 తూమ్నా హెచ్చరించుకురుస్‍, ఆస్ దేవ్‍ను హాఃచ్ఛిహుయుతె కృప కరి సాబుత్‍ బోల్‍ వివరంతి లిఖూకురాస్, తుమ్నా నమ్మకమ్‍ ఛాతే భైయోనా మే బోల్యొతె సిల్వాన్‍తి ఇనా బోలిమోకులుకురుస్, ఆ హాఃఛినుకృపమా హుబిరిన్ రావో.

13 బబులోనుమా తూమరింతార హుయుతే యోబి, మారో ఛీయోహుయుతే మార్కుబీ, తూమ్నా వందనమ్ కరి బోలుకురుస్‍. 14 ఫ్యార్‍తి ఏక్నుఏక్‍ బుచ్చాలిన్‍ వందనమ్‍ కారో, క్రీస్తుమా తూమార హాఃరావ్నా సమాధానంబి హువదాకరి. ఆమేన్‍.